Kapitulo 15

Ang Nahauna nga Milagro ni Jesus

ISA ukon duha ka adlaw pa lang ang nagligad sugod sang sanday Andres, Pedro, Juan, Felipe, Natanael, kag ayhan si Santiago nangin nahauna nga mga disipulo ni Jesus. Nagapauli na sila karon padulong sa distrito sang Galilea, nga ginhalinan nila tanan. Manugkadto sila sa Cana, ang banwa nga natawhan ni Natanael, nga yara sa pukatod indi malayo gikan sa Nazaret, nga gindak-an mismo ni Jesus. Gin-agda sila sa isa ka punsyon sang kasal sa Cana.

Nagkadto man sa kasal ang iloy ni Jesus. Subong abyan sang pamilya sang kalaslon, daw nadalahig si Maria sa pag-atipan sang mga kinahanglanon sang madamo nga bisita. Gani madali niya nga natalupangdan ang pagkulang, nga ginsugid niya kay Jesus: “Wala na sila sing alak.”

Sang ginpanugda ni Maria kay Jesus nga maghimo sia sing paagi nahanungod sa pagkulang sang alak, nagpang-alag-ag sang primero si Jesus. “Ano bala ang imo sa akon?” pamangkot niya. Subong gintangdo nga Hari sang Dios, indi sia dapat suguon sang pamilya ukon mga abyan kon ano ang himuon niya. Gani maalamon nga ginpabay-an ni Maria ang kahimtangan sa iya anak, kag nagsiling lamang sa mga alagad: “Ang bisan ano nga isiling niya sa inyo, buhata ninyo.”

Anom ang tadyaw nga bato, nga ang tagsa makasulod sing kapin sa 40 litro. Ginsugo ni Jesus ang mga alagad: “Pun-a ninyo sing tubig ang mga tadyaw.” Kag ginpuno nila ini tubtob sa bibig. Nian nagsiling si Jesus: “Magsandok kamo karon kag dalha ini sa manugtatap sang sinalusalo.”

Nahamuot ang manugtatap sa maayo nga kalidad sang alak, nga wala makahibalo nga ini nahimo paagi sa milagro. Gintawag niya ang nobyo, kag nagsiling: “Ang tagsa ka tawo nagabutang sing una sang maayong alak, kag sang nakainom sing tama ang mga tawo, ugaling ang kubos nga alak. Apang natago mo ang maayong alak tubtob karon.”

Amo ini ang nahauna nga milagro ni Jesus, kag sang makita ini, napalig-on ang pagtuo sang iya bag-o nga mga disipulo. Pagkatapos sadto, upod sa iya iloy kag sa iya mga utod sa iloy, naglakbay sila padulong sa siudad sang Capernaum malapit sa Dagat sang Galilea. Juan 2:​1-12.

▪ San-o sa tion sang ministeryo ni Jesus natabo ang kasal sa Cana?

▪ Ngaa namatok si Jesus sa panugda sang iya iloy?

▪ Ano nga milagro ang ginhimo ni Jesus, kag ano ang epekto sini sa iban?