Kapitulo 92

Ang Napulo ka Aruon nga Gin-ayo ni Jesus sang Hingapusan nga Paglakbay Niya Pa Jerusalem

GINPASLAW ni Jesus ang mga panikasog sang Sanhedrin nga patyon sia sang maghalin sia sa Jerusalem kag nagkadto sa siudad sang Efraim, nga ayhan mga 24 kilometros lamang ukon kapin sa aminhan-sidlangan sang Jerusalem. Nagpabilin sia didto upod sa iya mga disipulo, nga malayo sa iya mga kaaway.

Apang, malapit na sadto ang Paskuwa sang 33 C.⁠E. kag wala madugay naglakbay liwat si Jesus. Nag-agi sia sa Samaria kag nagtaklad sa Galilea. Amo ini ang iya katapusan nga pagduaw sa sining duog antes sia mapatay. Samtang sa Galilea sia, mahimo gid nga sia kag ang iya mga disipulo nagbuylog sa iban pa nga nagkadto sa Jerusalem para sa pagsaulog sing Paskuwa. Ginpili nila ang alagyan sa distrito sang Perea, sa sidlangan sang Suba Jordan.

Sa maaga nga bahin sang paglakbay nila, samtang nagapasulod si Jesus sa isa ka minuro sa Samaria ukon sa Galilea, nasugata sia sang napulo ka aruon. Amat-amat nga ginakaon sining makangilidlis nga balatian ang mga bahin sang lawas sang tawo​—⁠ang mga tudlo sang iya kamot, ang mga tudlo sang iya tiil, ang iya mga dulunggan, ang iya ilong, kag ang iya bibig. Agod indi malatnan ang iban, ang Kasuguan sang Dios nagasiling tuhoy sa isa ka aruon: “Dapat niya lipnan ang naibabaw nga bibig kag magsinggit, ‘Dimatinlo, dimatinlo!’ Sa tanan nga mga adlaw nga yara sa iya ang balatian mangin dimatinlo sia. . . . Magpuyo sia nga isa lamang.”

Gintuman sang napulo ka aruon ang mga pagdumili sang Kasuguan para sa mga aruon kag nagtindog sa malayo gikan kay Jesus. Apang, nagsinggit sila sing mabaskog: “Jesus, Manunudlo, kaluy-i kami!”

Sang makita sila sa malayo, si Jesus nagsugo: “Lakat kag ipakita ang inyo kaugalingon sa mga saserdote.” Ginsiling ini ni Jesus bangod ang Kasuguan sang Dios nag-awtorisar sa mga saserdote nga hukman nga nag-ayo ang mga aruon nga nag-ayo na gikan sa ila balatian. Sa sining paagi ini sila ginatugutan na sa pagpuyo liwat upod sa mapagros nga mga tawo.

Ang napulo ka aruon may pagsalig sa milagruso nga gahom ni Jesus. Gani nagdalidali sila sa pagkadto sa mga saserdote, bisan wala pa sila mag-ayo. Samtang sa dalanon pa lamang sila, ang ila pagtuo kay Jesus ginpadyaan. Nakita nila kag nabatyagan ang ila napasag-uli nga kapagros!

Ang siam sa nagtinlo nga aruon nagpadayon sa ila dalanon, apang ang isa pa ka aruon, isa ka Samariahanon, nagbalik agod pangitaon si Jesus. Ngaa? Bangod mapinasalamaton gid sia sa natabo sa iya. Gindayaw niya ang Dios sa mabaskog nga tingog, kag sang makita niya si Jesus, naghapa sia sa iya tiilan, kag nagpasalamat sa iya.

Bilang sabat si Jesus nagsiling: “Indi bala napulo ang gin-ayo? Apang diin ang siam? Wala na gid bala sing nagbalik sa paghatag sing himaya sa Dios luwas sining dumuluong?”

Nian ginsilingan niya ang Samariahanon nga lalaki: “Tindog kag lakat ka; ang imo pagtuo nag-ayo sa imo.”

Kon basahon naton ang pag-ayo ni Jesus sa napulo ka aruon, dapat naton batyagon ang leksion nga ginpahangop sang iya pamangkot: “Apang diin ang siam?” Ang pagkawalay kabalaslan sang siam isa ka serioso nga sala. Kita bala, kaangay sang Samariahanon, mangin mapinasalamaton sa mga butang nga nabaton naton gikan sa Dios, lakip ang pat-od nga saad tuhoy sa kabuhi nga wala sing katapusan sa matarong nga bag-ong kalibutan sang Dios? Juan 11:​54, 55; Lucas 17:​11-19; Levitico 13:​16, 17, 45, 46; Bugna 21:​3, 4.

▪ Paano ginpaslaw ni Jesus ang mga panikasog nga patyon sia?

▪ Sa diin masunod naglakbay si Jesus, kag ano ang iya kaladtuan?

▪ Ngaa nagtindog sa malayo ang mga aruon, kag ngaa ginsugo niya sila nga magkadto sa mga saserdote?

▪ Anong leksion ang dapat matun-an naton gikan sa sining eksperiensia?