Kapitulo 12

Ang Pagbawtismo kay Jesus

MGA anom ka bulan sa tapos si Juan nagsugod sa pagbantala, si Jesus, nga karon 30 anyos na, nagkari sa iya sa Jordan. Sa ano nga rason? Agod magduaw bala? Interesado lamang bala si Jesus kon kamusta ang pag-uswag sang hilikuton ni Juan? Indi, ginpangabay ni Jesus si Juan nga bawtismuhan sia.

Sa gilayon nagpamatok si Juan: “Ako ang dapat magpabawtismo sa imo, kag ikaw pa karon ang nagkari sa akon?” Nahibaluan ni Juan nga ang iya pakaisa nga si Jesus amo ang pinasahi nga Anak sang Dios. Ti, nagkibo si Juan sa kalipay sa tiyan sang iya iloy sang si Maria, nga nagabusong sadto kay Jesus, nagduaw sa ila! Wala sing duhaduha nga ang iloy ni Juan nga si Elisabet nagsugid sa iya nahanungod sini. Kag mahimo nga ginsugiran niya sia nahanungod sa mga anghel nga nagpahibalo sang pagkatawo ni Jesus kag sang pagpakita sang mga anghel sa mga manugbantay sing karnero sang gab-i nga si Jesus natawo.

Gani si Jesus indi isa ka dumuluong kay Juan. Kag nahibaluan ni Juan nga ang iya pagbawtismo indi para kay Jesus. Para ini sa mga nagahinulsol sang ila mga sala, apang si Jesus wala sing sala. Walay sapayan sang pagpamatok ni Juan, si Jesus namilit: “Pabayai ini karon, kay amo ini ang nagakaigo sa aton sa pagtuman sang bug-os nga pagkamatarong.”

Ngaa nagakaigo nga magpabawtismo si Jesus? Bangod ang pagbawtismo ni Jesus isa ka simbulo, indi sang paghinulsol sa mga sala, kundi sang iya pagpresentar sang iya kaugalingon sa paghimo sang kabubut-on sang iya Amay. Si Jesus isa ka panday, apang nag-abot na karon ang tion nga sugdan niya ang ministeryo nga ginapahimo sa iya ni Jehova sa duta. Nagahunahuna ka bala nga si Juan nagapaabot sing butang nga tumalagsahon nga matabo kon bawtismuhan niya si Jesus?

Si Juan nagreport sang ulihi: “Ang Isa gid nga nagpadala sa akon sa pagbawtismo sa tubig nagsiling sa akon, ‘Sa iya nga makita mo ang espiritu nga nagakunsad kag nagapabilin, ini amo sia ang nagabawtismo sa balaan nga espiritu.’” Gani ginpaabot ni Juan ang espiritu sang Dios nga magakunsad sa isa nga bawtismuhan niya. Busa, mahimo nga wala sia makibot nga, sang pagtakas ni Jesus sa tubig, nakita ni Juan “ang espiritu sang Dios nga nagapanaug subong sang salampati.”

Apang indi lamang ini ang natabo sang ginbawtismuhan si Jesus. ‘Nabuksan ang mga langit’ sa iya. Ano ang buot silingon sini? Mahimo gid nga nagakahulugan ini nga samtang ginabawtismuhan sia, nagbalik sa handumanan ni Jesus ang iya nagligad tuhoy sa iya kabuhi sa langit sa wala pa sia mangin tawo. Sa amo, nadumduman na karon ni Jesus ang iya kabuhi subong isa ka espiritu nga anak ni Jehova nga Dios, lakip ang tanan nga butang nga ginhambal sang Dios sa iya sa langit sa tion sang iya pagluntad sa wala pa sia mangin tawo.

Dugang pa, sa tion nga ginbawtismuhan sia, may tingog gikan sa langit nga nagsiling: “Ini ang hinigugma ko nga Anak, nga akon nahamut-an.” Kay sin-o tingog yadto? Kaugalingon bala nga tingog ni Jesus? Sa pagkamatuod indi! Tingog yadto sang Dios. Maathag nga si Jesus Anak sang Dios, indi ang Dios mismo, subong ginapangangkon sang iban nga mga tawo.

Apang, si Jesus isa ka tawhanon nga anak sang Dios, subong nga amo anay ang nahauna nga tawo, nga si Adan. Si disipulo Lucas, sa tapos malaragway ang pagbawtismo kay Jesus, nagsulat: “Si Jesus, sang nagsugod sia sa pagpanudlo, mga katluan ka tuig sa panuigon, nga anak, suno sa ginahunahuna, ni Jose, ang anak ni Heli, . . . anak ni David, . . . anak ni Abraham, . . . anak ni Noe, . . . anak ni Adan, nga anak sang Dios.”

Subong nga si Adan isa ka tawhanon nga “anak sang Dios,” amo man si Jesus. Si Jesus amo ang labing dungganon nga tawo nga nabuhi, nga nagaathag kon usisaon naton ang kabuhi ni Jesus. Apang, sa tion sang iya bawtismo, si Jesus nagsulod sa isa ka bag-o nga kaangtanan sa Dios, kag nangin espirituwal man nga Anak sang Dios. Daw subong bala nga ginatawag sia karon sang Dios pabalik sa langit, paagi sa pagpasugod sa iya sa isa ka dalanon nga magadul-ong sa iya paghalad sang iya tawhanon nga kabuhi sing dayon sa isa ka halad para sa ginkondenar nga katawhan. Mateo 3:​13-17; Lucas 3:​21-38; 1:​34-36, 44; 2:​10-14; Juan 1:​32-34; Hebreo 10:​5-9.

▪ Ngaa si Jesus indi isa ka dumuluong kay Juan?

▪ Sanglit wala sia sing sala, ngaa ginbawtismuhan si Jesus?

▪ Bangod sang nahibaluan ni Juan tuhoy kay Jesus, ngaa mahimo nga wala sia makibot sang magkunsad kay Jesus ang espiritu sang Dios?