Kapitulo 5

Ang Pagkatawo ni Jesus—Sa Diin kag San-o?

ANG emperador sang Romanong Emperyo, nga si Cesar Augusto, nagmando nga ang tagsatagsa dapat magpauli sa siudad nga iya natawhan agod magparehistro. Gani nagpauli si Jose sa duog nga iya natawhan, ang siudad sang Betlehem.

Madamo nga tawo ang yara sa Betlehem agod magparehistro, kag ang lamang nga duog nga nasapwan ni Jose kag ni Maria agod madayunan amo ang kwadra. Diri sini, nga sa diin ginatago ang mga asno kag iban pa nga mga sapat, natawo si Jesus. Ginputos sia ni Maria sa mga lampin kag ginkulan sa pasungan, ang duog nga ginabutangan sang kalan-on para sa mga sapat.

Sa pagkamatuod Dios ang nagpahanabo nga si Cesar Augusto magpaguwa sing sugo sa pagparehistro. Sa sining paagi si Jesus natawo sa Betlehem, ang siudad nga madugay na gintagna sa Kasulatan nga matawhan sang ginsaad nga manuggahom.

Daw ano ka importante nga gab-i ini! Sa guwa sa latagon may masanag nga kapawa nga nagsilak sa palibot sang isa ka grupo sang mga manugbantay. Himaya ini ni Jehova! Kag ang anghel ni Jehova nagsiling sa ila: “Dili kamo mahadlok, kay, yari karon! ginatunda ko sa inyo ang maayong balita sang dakung kalipay nga mangin sa bug-os nga katawhan, kay natawo sa inyo karon nga adlaw sa siudad ni David ang Manluluwas, nga si Cristo nga Ginuo. Kag ini amo ang tanda sa inyo: makita ninyo ang bata nga naputos sa mga lampin kag nakulan sa pasungan.” Sa hinali madamo pa nga mga anghel ang nagpakita kag nag-amba: “Himaya sa kahitaasan sa Dios, kag paghidait sa duta sa tunga sang mga tawo nga may maayong kabubut-on.”

Sang maghalin ang mga anghel, ang mga manugbantay sang karnero nagsinilingay: “Makadto kita karon sa Betlehem kag tan-awon ta ining butang nga nahanabo, nga ginpahayag ni Jehova sa aton.” Dalidali sila nga naglakat kag nakita nila si Jesus sa duog nga ginsiling sang anghel. Sang ginsaysay sang mga manugbantay sang karnero ang ginsugid sa ila sang anghel, natingala ang tanan nga nakabati sini. Gintipigan ni Maria ining tanan nga pulong kag ginhuptan ini sa iya tagipusuon.

Madamo nga tawo karon ang nagapati nga si Jesus natawo sang Disiembre 25. Apang ang Disiembre isa ka maulan, matugnaw nga panahon sa Betlehem. Ang mga manugbantay sang karnero wala nagaguwa sa latagon sa bug-os nga gab-i upod sa ila mga panong sa sina nga tion sang tuig. Subong man, daw indi mahimo nga palakbayon sang Romanong Cesar ang mga tawo nga may huyog na sa pag-alsa batok sa iya sa tion sang tigtulugnaw agod magparehistro. Mahimo gid nga si Jesus natawo sang maaga nga bahin sang tigragas sang tuig. Lucas 2:1-20; Miqueas 5:2.

▪ Ngaa naglakbay si Jose kag si Maria pa Betlehem?

▪ Anong makatilingala nga butang ang natabo sang gab-i nga natawo si Jesus?

▪ Paano naton nahibaluan nga si Jesus wala matawo sang Disiembre 25?