Kapitulo 118

Ang Pagluib kag Pagdakop

PASADO na sa tungang gab-i sang ginpangunahan ni Judas ang dakung kadam-an sang mga soldado, mga punong saserdote, mga Fariseo, kag iban pa sa katamnan sang Getsemani. Ang mga saserdote nagsugot nga bayaran si Judas sing 30 ka bilog nga pilak agod luiban si Jesus.

Sang nagligad, sang ginpahalin si Judas sa panihapon sang Paskuwa, mahimo nga nagdiretso sia sa mga punong saserdote. Gintipon nila gilayon ang ila mga opisyal, kag mga soldado man. Mahimo nga sang primero gintuytuyan sila ni Judas sa duog nga ginahiwatan ni Jesus kag sang iya mga apostoles sing Paskuwa. Sang nakita nga nakalakat na sila, ang dakung kadam-an nga may mga hinganiban kag mga suga kag mga sulu nagsunod kay Judas paguwa sa Jerusalem kag patabok sa Nalupyakan sang Kidron.

Samtang ginapangunahan ni Judas ang prosesyon pakadto sa Bukid sang Olivo, sigurado gid sia kon sa diin makita si Jesus. Sang nagligad nga semana, sang si Jesus kag ang mga apostoles naglakbay pakadto-pakari sa Betania kag Jerusalem, masunson sila nagdulog sa katamnan sang Getsemani agod magpahuway kag magsugilanunay. Apang, sa karon, bangod mahimo nga si Jesus natago sa kadudulman sa idalom sang mga kahoy nga olivo, paano sia makilala sang mga soldado? Mahimo nga wala pa nila sia anay makita. Si Judas naghatag sing tanda, nga nagasiling: “Kon sin-o ang akon halukan, amo ina sia; dakpa sia kag dalha sia.”

Ginpangunahan ni Judas ang dakung kadam-an pasulod sa katamnan, nakita niya si Jesus kag ang iya mga apostoles, kag nagdiretso sa iya. “Maayo nga adlaw, Rabbi!” nagsiling sia kag naghalok sa iya.

“Abyan, ngaa bala yari ka?” sabat ni Jesus. Nian, nagsabat sang iya kaugalingon nga pamangkot, sia nagsiling: “Judas, ginatugyan mo bala ang Anak sang tawo paagi sa halok?” Apang tuman na sa nagluib sa iya! Si Jesus nagguwa sa kapawa sang nagadabdab nga mga sulu kag mga suga kag namangkot: “Sin-o bala ang ginapangita ninyo?”

“Si Jesus nga Nazaretnon,” amo ang sabat.

“Ako amo sia,” sabat ni Jesus, samtang nagatindog sia sing maisog sa atubangan nila tanan. Nakibot sa iya kasidla kag wala nakahibalo kon ano ang matabo, ang mga tawo nag-isol kag napukan sa duta.

“Nagsugid ako sa inyo nga ako amo sia,” kalmante nga siling ni Jesus. “Gani, kon ginapangita ninyo ako, palakta ninyo ini sila.” Wala lamang madugay antes sini sa naibabaw nga hulot, ginsilingan ni Jesus ang iya Amay sa pangamuyo nga gintipigan niya ang iya matutom nga mga apostoles kag wala sing isa sa ila ang nadula “luwas sa anak sang kalaglagan.” Gani, agod ang iya pulong matuman, nangabay sia nga ang iya mga sumulunod palakton.

Sang ang mga soldado naulian, nagtindog, kag gingapos si Jesus, nahangpan sang mga apostoles kon ano ang matabo. “Ginuo, ilabo bala namon ang amon espada?” pamangkot nila. Sa wala pa makasabat si Jesus, si Pedro, nga naggabot sang isa sa duha ka espada nga dala sang mga apostoles, naglabo kay Malco, nga ulipon sang mataas nga saserdote. Wala maigo ni Pedro sa ulo ang ulipon apang nagilangan ang iya dulunggan nga tuo.

“Tuman na ini,” siling ni Jesus. Sang gintandog niya ang dulunggan ni Malco, nag-ayo ang pilas. Nian nagtudlo sia sing importante nga leksion, nga nagasugo kay Pedro: “Itagob ang imo espada, kay ang tanan nga nagagamit sang espada sa espada mapatay. Nagahunahuna ka bala nga indi ako makapangayo sa akon Amay kag sa gilayon padalhan ako niya sing kapin sa napulog duha ka legion nga mga anghel?”

Si Jesus handa magpadakop, kay sia nagpaathag: “Paano bala nian ang pagkatuman sang mga Kasulatan nga amo ini ang dapat mahanabo?” Kag nagdugang sia: “Ang tagayan nga ginhatag sa akon sang Amay indi ko bala pag-imnon?” Ugyon gid sia sa kabubut-on sang Amay para sa iya!

Nian si Jesus nagpamulong sa kadam-an. “Nagakari bala kamo nga may mga espada kag mga lampos sa pagdakop sa akon subong nga isa ka buyong?” pamangkot niya. “Adlaw-adlaw naglingkod ako sa templo nga nagapanudlo, kag wala ninyo ako pagdakpa. Apang tanan ini nahanabo agod matuman ang kasulatan sang mga manalagna.”

Sa sina gindakop si Jesus sang mga soldado kag sang pangulo sang militar kag sang mga opisyal sang mga Judiyo kag gingapos sia. Sang nakita ini, ginbayaan sang mga apostoles si Jesus kag nagpalagyo. Apang, isa ka lamharon nga lalaki​—⁠ayhan si disipulo Marcos​—⁠ang nagpabilin sa tunga sang kadam-an. Mahimo nga yara sia sa balay sang ginsaulog ni Jesus ang Paskuwa kag pagkatapos ginsundan ang kadam-an gikan didto. Apang, nakilal-an sia, kag gintinguhaan sia nga dakpon. Apang ginbilin niya ang iya lino nga kunop kag nagpalagyo nga hublas. Mateo 26:​47-56; Marcos 14:​43-52; Lucas 22:​47-53; Juan 17:12; 18:​3-12.

▪ Ngaa sigurado gid si Judas nga makita niya si Jesus sa katamnan sang Getse­mani?

▪ Paano ginpakita ni Jesus ang kabalaka para sa iya mga apostoles?

▪ Ano nga buhat ang ginhimo ni Pedro sa pagpangapin kay Jesus, apang ano ang ginsiling ni Jesus kay Pedro tuhoy sini?

▪ Paano ginpakita ni Jesus nga ugyon gid sia sa kabubut-on sang Dios para sa iya?

▪ Sang ginbiyaan sang mga apostoles si Jesus, sin-o ang nagpabilin, kag ano ang natabo sa iya?