Kapitulo 27

Ang Pagtawag kay Mateo

WALA madugay sa tapos maayo ang paralitiko, si Jesus nagkadto sa Dagat sang Galilea halin sa Capernaum. Sa liwat ginkadtuan sia didto sang katawhan, kag nagpanudlo sia sa ila. Samtang nagalakat sia, nakita niya si Mateo, nga ginatawag man nga Levi, nga nagalingkod sa opisina sang buluhisan. “Sunod ka sa akon,” pangagda ni Jesus.

Ayhan pamilyar na si Mateo sa mga panudlo ni Jesus, kaangay nanday Pedro, Andres, Santiago, kag Juan sang gintawag sila. Kag kaangay nila, gilayon nga ginbaton ni Mateo ang pangagda. Nagtindog sia, ginbilin ang iya mga responsabilidad subong manugsukot sing buhis, kag nagsunod kay Jesus.

Sang ulihi, ayhan agod isaulog ang pagbaton niya sa iya panawag, si Mateo naghiwat sing daku nga sinalusalo sa iya balay. Wala labot kay Jesus kag sa Iya mga disipulo, nagtambong man ang mga kaupdanan anay ni Mateo. Ining mga tawo ginatamay sang ila mga masigka-Judiyo bangod nagasukot sila sing buhis para sa ginakaugtan nga Romanong awtoridad. Dugang pa, masami nga indi sila bunayag kay mas daku nga kuwarta ang ginakuha nila sa mga tawo sa baylo sang regular nga buhis.

Sang makita si Jesus sa sinalusalo kaupod sina nga mga tawo, ginpamangkot sang mga Fariseo ang iya mga disipulo: “Ngaa bala nga nagakaon ang inyo manunudlo upod sa mga manugsukot sing buhis kag makasasala?” Sang mabatian ang pamangkot, ginsabat ni Jesus ang mga Fariseo: “Ang mga maayo wala nagakinahanglan sing mga manugbulong, kundi ang mga nagamasakit. Lakat kag magtuon kon ano ang kahulugan sini, ‘Buot ko ang kaluoy, kag indi ang halad.’ Kay wala ako magkari sa pagtawag sang mga matarong, kundi sang mga makasasala.”

Ayhan gin-agda ni Mateo ining mga manugsukot sing buhis sa iya balay agod makapamati sila kay Jesus kag makabaton sing espirituwal nga pag-ayo. Gani nakig-upod sa ila si Jesus agod buligan sila nga matigayon ang maayo nga kaangtanan sa Dios. Wala sila gintamay ni Jesus kaangay sang nagapakamatarong sa kaugalingon nga mga Fariseo. Sa baylo, bangod sang kaluoy, nangin espirituwal sia nga manugbulong sa ila.

Ang pagkaluoy ni Jesus sa mga makasasala wala nagakahulugan nga ginaugyunan niya ang ila mga sala kundi ginpabutyag lamang niya ang malum⁠-​ok nga balatyagon nga ginpakita man niya sa mga nagamasakit sa pisikal. Dumduma, halimbawa, sang maluluy-on nga ginpalapitan kag gintandog niya ang aruon, nga nagasiling: “Buot ko. Mag-ayo ka.” Kabay nga ipakita man naton ang kaluoy paagi sa pagbulig sa mga tawo nga nagakinahanglan, labi na sa pagbulig sa ila sa espirituwal nga paagi. Mateo 8:​3; 9:​9-13; Marcos 2:​13-17; Lucas 5:​27-32.

▪ Diin si Mateo sang makita sia ni Jesus?

▪ Ano ang obra ni Mateo, kag ngaa ginatamay sila sang iban nga mga Judiyo?

▪ Ano ang reklamo batok kay Jesus, kag paano niya ini ginsabat?

▪ Ngaa nakig-upod si Jesus sa mga makasasala?