Kapitulo 69

Ang Pamangkot Tuhoy sa Pagkaamay

SA TION sang piesta, nag-init pa ang pagpakigsugilanon ni Jesus sa Judiyong mga lider. “Ako nakahibalo nga mga kaliwatan kamo ni Abraham,” siling ni Jesus, “apang kamo nagatinguha sa pagpatay sa akon, bangod nga ang akon pulong wala sing duog sa inyo. Ako nagapamulong sang akon nakita sa akon Amay; kag kamo nagahimo sang inyo nabatian sa inyo amay.”

Bisan pa wala nagapakilala sang ila amay, maathag nga ginpakita ni Jesus nga ang ila amay tuhay sa iya amay. Wala makahibalo kon sin-o ang ginahunahuna ni Jesus, ang Judiyo nga mga lider nagsabat: “Ang amon amay amo si Abraham.” Ginabatyag nila nga may pagtuo sila kaangay ni Abraham, nga abyan sang Dios.

Apang, nakibot sila sa ginsabat ni Jesus: “Kon kamo mga anak ni Abraham, nagahimo kamo kuntani sang mga buhat ni Abraham.” Sa pagkamatuod, ang matuod nga anak nagailog sa iya amay. “Apang karon nagatinguha kamo sa pagpatay sa akon,” siling ni Jesus, “isa ka tawo nga nagsugid sa inyo sang kamatuoran nga akon nabatian sa Dios. Ini wala paghimua ni Abraham.” Gani nagsiling liwat si Jesus: “Kamo nagahimo sang mga buhat sang inyo amay.”

Wala gihapon nila mahangpi kon sin-o ang ginapatuhuyan ni Jesus. Nagasiling sila nga sila mga anak ni Abraham, nga nagasiling: “Kami wala matawo gikan sa pagpakighilawas.” Gani, nagaangkon nga matuod nga mga sumilimba kaangay ni Abraham, nagsiling sila: “Kami may isa ka Amay, ang Dios.”

Apang ang Dios bala amo gid ang ila Amay? “Kon ang Dios inyo Amay,” sabat ni Jesus, “nagahigugma kamo kuntani sa akon, kay ako nagikan sa Dios. Wala ako magkari sa akon kaugalingon nga kabubut-on, kundi ginpadala Niya ako. Ngaa bala wala ninyo ginahangop ang akon hambal?”

Gintinguhaan ni Jesus nga ipakita sa sining relihioso nga mga lider ang mga resulta sang pagsikway nila sa iya. Apang karon nagsiling sia sing prangka: “Kamo iya sang inyo amay nga Yawa, kag buot ninyo himuon ang mga kailigbon sang inyo amay.” Ano nga sahi sang amay ang Yawa? Ginpakilala sia ni Jesus subong manugpatay sang tawo kag nagsiling man: “Butigon sia kag amay sang kabutigan.” Gani naghinakop si Jesus: “Ang nagagikan sa Dios nagapamati sa mga pulong sang Dios. Amo ini kon ngaa wala kamo nagapamati, bangod indi kamo gikan sa Dios.”

Naakig sa pagpakamalaut ni Jesus, ang mga Judiyo nagsabat: “Indi bala husto ang amon ginasiling, Ikaw Samariahanon kag may demonyo?” Ang tinaga nga “Samariahanon” ginagamit subong ekspresyon sang pagpakahuya kag pagpasipala, kay ang mga Samariahanon mga tawo nga ginadumtan sang mga Judiyo.

Nagasikway sa mapasipalahon nga pulong nahanungod sa pagka-Samariahanon, si Jesus nagsabat: “Wala ako sing demonyo, kundi nagapadungog ako sa akon Amay, kag kamo wala nagapadungog sa akon.” Nagapadayon, si Jesus naghimo sing makatilingala nga saad: “Kon ang tawo magbantay sang akon pulong, indi gid sia makakita sang kamatayon.” Sa pagkamatuod, indi buot silingon ni Jesus nga ang tanan nga nagasunod sa iya indi gid literal nga makakita sang kamatayon. Sa baylo, buot niya silingon nga indi gid sila makakita sing dayon nga kalaglagan, ukon “ikaduha nga kamatayon,” diin wala sing pagkabanhaw.

Apang, ginhangop sang mga Judiyo sing literal ang pinamulong ni Jesus. Gani, nagsiling sila: “Karon nakahibalo kami nga may demonyo ikaw. Si Abraham napatay, kag ang mga manalagna; kag nagasiling ikaw, ‘Kon ang isa ka tawo magbantay sang akon pulong, indi gid sia makatilaw sang kamatayon.’ Daku ka pa bala sa amon amay nga si Abraham, nga napatay? Kag ang mga manalagna nagkamatay. Nagapakasin-o ka bala?”

Sa sining bug-os nga paghambalanay, maathag nga ginpakita ni Jesus sa sining mga tawo ang kamatuoran nga sia amo ang ginsaad nga Mesias. Apang sa baylo nga sabton sing direkta ang ila pamangkot sa kon sin-o sia, si Jesus nagsiling: “Kon ako nagahimaya sang akon kaugalingon, ang akon himaya wala sing pulos. Ang akon Amay amo ang nagahimaya sa akon, nga nahanungod sa iya ginasiling ninyo nga sia inyo Dios; apang kamo wala makakilala sa iya. Ako nakakilala sa iya. Kag kon ako nagsiling nga wala ako makakilala sa iya, nangin kaangay ako sa inyo nga butigon.”

Sa pagpadayon, ginpatuhuyan liwat ni Jesus ang matutom nga si Abraham, nga nagasiling: “Si Abraham nga inyo amay nagkalipay sa pagtan-aw sang akon adlaw, kag nakita niya ini kag sia nagkasadya.” Huo, paagi sa mata sang pagtuo, ginhulat ni Abraham ang pag-abot sang ginsaad nga Mesias. Sing maduhaduhaon, ang mga Judiyo nagsabat: “Wala ka pa magkalim-an ka tuig, kag nakakita ka na kay Abraham?”

“Sa pagkamatuod nagasiling ako sa inyo,” sabat ni Jesus, “sa wala pa matawo si Abraham, amo na ako.” Si Jesus, sa pagkamatuod, nagapatuhoy sa iya wala pa mangin tawo nga pagluntad subong gamhanan nga espiritu nga persona sa langit.

Naakig sa ginsiling ni Jesus nga natawo sia antes kay Abraham, ang mga Judiyo nagpulot sing mga bato nga ihaboy sa iya. Apang nagpanago sia kag nagguwa gikan sa templo nga wala maano. Juan 8:37-59; Bugna 3:14; 21:8.

▪ Paano ginpakita ni Jesus nga sia kag ang iya mga kaaway may tuhay nga mga amay?

▪ Ano ang kahulugan sang pagtawag sang mga Judiyo kay Jesus nga Samariahanon?

▪ Sa anong kahulugan si Jesus nagsiling nga ang iya mga sumulunod indi makakita sang kamatayon?