Kapitulo 9

Ang Pamilya ni Jesus sang Bata Pa Sia

SANG nagadaku si Jesus sa Nazaret, isa ini ka medyo diutay kag indi importante nga siudad. Nahamtang ini sa bakulod nga duog nga gintawag Galilea, indi malayo gikan sa matahom nga Nalupyakan sang Jezreel.

Sang si Jesus, nga ayhan mga duha ka tuig ang edad, gindala diri gikan sa Egipto ni Jose kag ni Maria, mahimo nga sia lamang ang anak ni Maria. Apang wala ini magdugay. Sang ulihi, natawo sanday Santiago, Jose, Simon, kag Judas, kag nanganak man si Maria kag si Jose sing mga babayi. Sa dimagkubos, nakatigayon si Jesus sang ulihi sing anom ka manghod nga mga lalaki kag mga babayi.

Si Jesus may iban pa nga mga paryente man. Nakilala na naton ang iya pakaisa nga magulang sa iya nga si Juan, nga nagapuyo sa Judea nga madamo nga kilometro ang kalayuon. Apang ang nagapuyo sa malapit sa Galilea amo si Salome, nga mahimo gid utod ni Maria. Si Salome kasal kay Zebedeo, gani ang ila duha ka anak nga lalaki, sanday Santiago kag Juan, mga pakaisa ni Jesus. Indi naton mahibal-an kon bala, samtang nagadaku sila, si Jesus naghinguyang sing daku nga tion upod sa sining mga bata nga lalaki, apang sang ulihi nangin suod sila nga magkaupod.

Dapat magpangabudlay sing lakas si Jose agod sakdagon ang iya nagadaku nga pamilya. Isa sia ka panday. Ginpadaku ni Jose si Jesus subong iya kaugalingon nga anak, gani si Jesus gintawag nga “anak sang panday.” Gintudluan man ni Jose si Jesus nga mangin panday, kag nangin maayo sia nga panday. Amo kon ngaa sang ulihi ginpatuhuyan nila si Jesus nga, “Ini ang panday.”

Ang pagkabuhi sang pamilya ni Jose nasentro sa pagsimba kay Jehova. Sa pagsunod sa Kasuguan sang Dios, ginahatagan ni Jose kag ni Maria ang ila mga anak sing espirituwal nga instruksion ‘kon sila nagalingkod sa ila balay, kon sila nagalakat sa dalan, kon sila nagahida, kag kon sila nagabangon.’ May isa ka sinagoga sa Nazaret, kag mapat-od naton nga regular nga ginadala ni Jose ang iya pamilya agod magsimba didto. Apang wala sing duhaduha nga nakasapo sila sing labing daku nga kalipay sa regular nga paglakbay padulong sa templo ni Jehova sa Jerusalem. Mateo 13:55, 56; 27:56; Marcos 15:40; 6:3; Deuteronomio 6:6-9.

▪ Sa dimagkubos pila ang manghod nga mga lalaki kag mga babayi ni Jesus, kag ano ang mga ngalan nila?

▪ Sin-o ang tatlo ka kilala nga mga pakaisa ni Jesus?

▪ Ano sang ulihi ang sekular nga trabaho ni Jesus, kag ngaa?

▪ Anong importante nga instruksion ang gin-aman ni Jose para sa iya pamilya?