Kapitulo 75

Ang Tuburan sang Kalipay

SA TION sang iya ministeryo sa Galilea, naghimo si Jesus sing mga milagro, kag ginliwat niya ini karon sa Judea. Halimbawa, gintabog niya sa isa ka tawo ang demonyo nga nagapugong sa iya sa paghambal. Ang kadam-an natingala, apang ang mga kritiko nagpautwas sing pareho nga pamatok nga nag-utwas sa Galilea. “Nagatabog sia sang mga demonyo paagi kay Beelzebub nga prinsipe sang mga demonyo,” siling nila. Nagpangayo ang iban sing daku pa nga pamatuod gikan kay Jesus tuhoy sa iya identidad, kag gintilawan nila sia paagi sa pagpangabay sing tanda gikan sa langit.

Nakahibalo sang ginahunahuna nila, amo gihapon nga sabat ang ginhatag ni Jesus sa iya mga kritiko sa Judea subong sang ginhatag niya didto sa Galilea. Nagsiling sia nga ang tagsa ka ginharian nga napihak batok sa iya kaugalingon mapukan. “Kag,” pamangkot niya, “kon si Satanas man napihak batok sa iya kaugalingon, paano bala ang pagtindog sang iya ginharian?” Ginapakita niya ang makatalagam nga tindog sang iya mga kritiko paagi sa pagsiling: “Kon ako paagi sa tudlo sang Dios nagatabog sang mga demonyo, nian ang ginharian sang Dios nag-abot na sa inyo.”

Ang reaksion sang mga nakakita sang mga milagro ni Jesus dapat nga pareho sa reaksion sang mga nakakita kay Moises nga naghimo sing milagro sang nagligad nga mga siglo. Nagsiling sila: “Tudlo sang Dios ini!” “Tudlo sang Dios” man ang nagsulat sang Napulo ka Sugo sa mga tapitapi nga bato. Kag “tudlo sang Dios”​—⁠ang iya balaan nga espiritu, ukon aktibo nga puwersa⁠—​ang nagpaposible nga matabog ni Jesus ang mga demonyo kag maayo ang mga masakiton. Gani ang Ginharian sang Dios tunay nga nag-abot sa sining mga kritiko, bangod kay si Jesus, ang gintangdo nga Hari sang Ginharian, yara mismo sa tunga nila.

Nian gin-ilustrar ni Jesus nga ang iya ikasarang sa pagtabog sa mga demonyo pamatuod sang iya gahom labaw kay Satanas, subong sang paggubat kag pagdaug sang makusog pa nga tawo sa lupit sa armas nga tawo nga nagabantay sa iya palasyo. Ginsugid niya liwat ang ilustrasyon nga ginsugid niya anay sa Galilea nahanungod sa dimatinlo nga espiritu. Ang espiritu nagguwa sa tawo, apang sang wala pagpunui sang tawo ang basiyo sing maayong butang, ang espiritu nagbalik upod ang pito pa, kag ang kahimtangan sang tawo naggrabe pa sang sa nagligad.

Samtang nagapamati sa sining mga panudlo, ang isa ka babayi gikan sa kadam-an napahulag sa pagsiling sing mabaskog: “Malipayon ang tiyan nga nagdala sa imo kag ang suso nga imo ginsusuhan!” Bangod kay ang handum sang tagsa ka Judiyo nga babayi amo ang mangin iloy sa isa ka manalagna kag labi na sa Mesias, halangpunon nga ining babayi magasiling sini. Sing maathag naghunahuna sia nga si Maria labi nga mangin malipayon bangod sia ang iloy ni Jesus.

Apang, gilayon nga gintadlong ni Jesus ang babayi nahanungod sa matuod nga tuburan sang kalipay. “Indi,” sabat niya, “hinunuo, Malipayon ang mga nagapamati sang pulong sang Dios kag nagabantay sini!” Wala gid magsiling si Jesus nga ang iya iloy, si Maria, dapat hatagan sing pinasahi nga kadungganan. Sa baylo, ginpakita niya nga ang matuod nga kalipay masapwan sa pagkamangin isa ka matutom nga alagad sang Dios, indi sa bisan anong pisikal nga relasyon ukon hinimuan.

Subong sang ginhimo niya sa Galilea, ginsabdong man ni Jesus ang katawhan sa Judea bangod sang pagpangabay nila sing tanda gikan sa langit. Ginsilingan niya sila nga wala sing tanda ang ihatag luwas sa tanda ni Jonas. Si Jonas nangin tanda bangod sang iya tatlo ka adlaw sa isda kag bangod sang iya masidla nga pagbantala, nga nagresulta sa paghinulsol sang mga taga-Ninive. “Apang, yari karon!” siling ni Jesus, “ang daku pa kay Jonas yari diri.” Sing kaanggid, ang reyna sang Sheba nagdayaw sa kaalam ni Solomon. “Apang, yari karon!” siling man ni Jesus, “ang daku pa kay Solomon yari diri.”

Ginapaathag ni Jesus nga kon ang tawo nakasindi sing suga, wala niya ini ginabutang sa talaguan ukon sa idalom sang sulukban, kundi sa ibabaw sang tulungtungan agod makita sang mga tawo ang kapawa. Ayhan ginasiling niya nga ang pagtudlo kag paghimo sing mga milagro sa atubang sining matig-a sing ulo nga mga tawo sa iya tumalambong kaanggid sa pagtago sa kapawa sang suga. Ang mga mata sinang mga nakakita indi simple, ukon nakasentro, gani ang katuyuan sang iya mga milagro wala matigayon.

Bag-o lang matabog ni Jesus ang demonyo kag napahambal ang apa nga tawo. Dapat sini napahulag ang mga tawo nga may simple, ukon nakasentro, nga mga mata sa pagdayaw sa sining mahimayaon nga buhat kag sa pagbantala sing maayong balita! Apang, sa sining mga kritiko, indi amo sini ang natabo. Gani si Jesus naghinakop: “Busa, mangin alisto. Ayhan ang kapawa nga yara sa imo mangin kadudulman. Busa, kon ang bug-os mo nga lawas puno sang kapawa, nga walay bahin nga madulom, ini mangin masanag sing bug-os, subong nga ang suga nagaiwag sa imo sang iya kasanag.” Lucas 11:​14-36; Exodo 8:​18, 19; 31:​18; Mateo 12:​22, 28.

▪ Ano ang reaksion sa pag-ayo ni Jesus sa tawo?

▪ Ano ang “tudlo sang Dios,” kag paano ang Ginharian sang Dios nag-abot na sa mga tagpalamati ni Jesus?

▪ Ano ang tuburan sang matuod nga kalipay?

▪ Paano ang isa ka tawo may simple nga mata?