Kapitulo 32

Ano ang Tugot sa Adlaw nga Inugpahuway?

SA ISA pa ka Adlaw nga Inugpahuway nagduaw si Jesus sa isa ka sinagoga malapit sa Dagat sang Galilea. May isa didto ka tawo nga may kamot nga itos. Nagabantay sing maayo ang mga escriba kag mga Fariseo kon bala ayuhon sia ni Jesus. Sang ulihi namangkot sila: “Tugot bala ang pagpang-ayo sa adlaw nga inugpahuway?”

Ang Judiyong mga lider sang relihion nagapati nga ang pagpang-ayo sa Adlaw nga Inugpahuway tugot lamang kon ang kabuhi yara sa katalagman. Halimbawa, nagatudlo sila nga sa Adlaw nga Inugpahuway indi tugot ang manghilot ukon magbendahe sang bali. Gani ginapamangkot sang mga escriba kag mga Fariseo si Jesus sa panikasog nga may isumbong batok sa iya.

Apang, nahibaluan na ni Jesus ang ila mga pangatarungan. Subong man, nahibaluan niya nga sobra kag indi makasulatanhon ang ila pagtamod sa kon ano ang makabig nga isa ka paglalis sa ginapatuman sang Adlaw nga Inugpahuway nga nagadumili sang pagpangabudlay. Sa amo ginbuksan ni Jesus ang danyag para sa isa ka dramatiko nga engkwentrohanay paagi sa pagsugo sa tawo nga may kamot nga itos: “Tindog ka kag magkadto sa tunga.”

Nian nagliso si Jesus sa mga escriba kag mga Fariseo kag nagsiling: “Sin-o bala ang tawo sa inyo, nga may isa ka karnero kag kon ini mahulog sa buho sa adlaw nga inugpahuway, indi bala niya kaptan kag batakon pa guwa?” Sanglit ang isa ka karnero nagarepresentar sing pinansial nga puhunan, indi nila pagpabay-an ini sa buho tubtob sa masunod nga adlaw, nga ayhan magmasakit kag mapierdi sila. Luwas pa, ang Kasulatan nagasiling: “Ang matarong nagaatipan sa kalag sang iya ginasagod nga sapat.”

Sa pagpaanggid, si Jesus nagpadayon: “Daw ano ka mahal pa ang tawo sa karnero! Busa tugot ang paghimo sing kaayuhan sa adlaw nga inugpahuway.” Indi mapamatukan sang relihioso nga mga lider ang makatarunganon kag maluluy-on nga pangatarungan, kag naghipos lamang sila.

Upod ang kaakig, subong man ang kasubo sa ila matig-a nga kabuangan, ginpalibot ni Jesus ang iya panulok. Nian nagsiling sia sa tawo: “Untaya ang imo kamot.” Kag gin-untay niya ini kag ang kamot nag-ayo.

Sa baylo nga malipay nga nag-ayo ang kamot sang tawo, nagguwa ang mga Fariseo kag sa gilayon naghimbon upod sa mga sumulunod ni Herodes nga patyon si Jesus. Ining politikal nga partido maathag nga nagalakip sa mga katapo sang relihioso nga mga Saduceo. Sa kinaandan, ining politikal nga partido kag ang mga Fariseo dayag nga batok sa isa kag isa, apang malig-on sila nga nahiusa sa ila pagpamatok kay Jesus. Mateo 12:​9-14; Marcos 3:​1-6; Lucas 6:​6-11; Hulubaton 12:​10; Exodo 20:​8-10.

▪ Ano ang danyag sang isa ka dramatiko nga pag-engkwentrohanay sa ulot ni Jesus kag sang Judiyong mga lider sang relihion?

▪ Ano ang ginapatihan sang mga Judiyo tuhoy sa pagpang-ayo sa Adlaw nga Inugpahuway?

▪ Anong ilustrasyon ang gingamit ni Jesus sa pagsaway sang ila sayop nga mga pagtamod?