Kapitulo 22

Apat ka Disipulo ang Gintawag

SA TAPOS sang plano nga patyon si Jesus sa iya dutang natawhan sa Nasaret, nagsaylo sia sa siudad sang Capernaum malapit sa Dagat sang Galilea. Gintuman sini ang isa pa ka tagna ni Isaias. Ang tagna amo nga ang katawhan sang Galilea sa higad sang dagat makakita sing daku nga kapawa.

Samtang ginahimo ni Jesus ang iya nagadala sing kapawa nga hilikuton sang pagbantala sang Ginharian diri, ginpangita niya ang iya apat ka disipulo. Naglakbay sila anay upod kay Jesus, apang nangisda sila liwat sang magpauli sila upod kay Jesus gikan sa Judea. Mahimo nga ginpangita sila ni Jesus karon, bangod tion na nga dapat may yara sia regular nga mga kabulig nga mahanas niya sa pagpadayon sang ministeryo kon wala na sia.

Gani samtang nagalakat si Jesus sa higad sang dagat, nakita niya si Simon Pedro kag ang iya mga kaupod nga nagahugas sang ila mga sahid, kag nagpalapit sia sa ila. Nagsaka sia sa sakayan ni Pedro kag ginpangabay sia nga magtulak palayo. Sang malayolayo na sila, nagpungko si Jesus sa sakayan kag nagpanudlo sa mga kadam-an sa higad sang baybayon.

Pagkatapos, si Jesus nagsiling kay Pedro: “Magpalawod ka kag iladlad ang inyo sahid, agod nga makakuha kamo sing mga isda.”

“Manunudlo,” sabat ni Pedro, “nagpanahid kami sa bug-os gid nga gab-i kag wala kami sing may nakuha, apang kon amo ina ang siling mo, iladlad ko ang sahid.”

Sang ginladlad nila ang sahid, nakakuha sila sing madamo nga isda sa bagay nga ang ila sahid nagisi. Dalidali nga ginpaypay nila ang ila mga kaupod sa isa ka sakayan agod magpabulig sa ila. Wala madugay napuno ang ila duha ka sakayan tubtob nga daw malunod na sila. Sang makita ini, nagluhod si Pedro sa atubangan ni Jesus kag nagsiling: “Palayo ka sa akon, Ginuo, kay makasasala ako nga tawo.”

“Dili mahadlok,” sabat ni Jesus. “Kutob karon magapangisda ka sing mga tawo.”

Gin-agda man ni Jesus ang utod ni Pedro nga si Andres. “Upod kamo sa akon,” siling niya sa ila, “kag himuon ko kamo nga mga mangingisda sang mga tawo.” Ang ila mga kaupod sa pagpangisda nga sanday Santiago kag Juan, mga anak ni Zebedeo, gin-agda man, kag sila man nag-upod dayon. Gani ginbiyaan sining apat ang ila pagpangisda kag sila ang nangin una nga apat ka regular nga mga sumulunod ni Jesus. Lucas 5:1-11; Mateo 4:13-22; Marcos 1:16-20; Isaias 9:1, 2.

▪ Ngaa gintawag ni Jesus ang iya mga disipulo nga magsunod sa iya, kag sin-o sila?

▪ Ano nga milagro ang nagpahadlok kay Pedro?

▪ Sa ano nga sahi sang pagpangisda gin-agda ni Jesus ang iya mga disipulo?