Kapitulo 128

Buhi si Jesus!

SANG nakita sang mga babayi nga walay unod ang lulubngan, si Maria Magdalena nagdalagan agod sugiran sanday Pedro kag Juan. Apang, ang iban nagpabilin sa lulubngan. Sang ulihi, nagpakita ang isa ka anghel kag nag-agda sa ila sa sulod.

Nakita diri sang mga babayi ang isa pa ka anghel, kag ang isa sa mga anghel nagsiling sa ila: “Dili kamo mahadlok, kay nakahibalo ako nga kamo nagapangita kay Jesus nga ginlansang. Wala sia diri, kay nabanhaw sia, subong sang ginsiling niya. Kari kamo, tan-awa ninyo ang duog nga ginhamyangan niya. Nian lakat kamo sing dalidali kag sugiran ang iya mga disipulo nga nabanhaw sia.” Gani may kahadlok kag daku nga kalipay, nagdalagan man ining mga babayi.

Sini nga tion, nakita na ni Maria sanday Pedro kag Juan, kag nagbalita sia sa ila: “Ginkuha nila ang Ginuo sa lulubngan, kag wala namon mahibalui kon diin nila ginpahamtang sia.” Sa gilayon nagdalagan ang duha ka apostol. Si Juan madasig magdalagan​—⁠bangod mas bata⁠—​kag una nga nakalab-ot sa lulubngan. Nakahalin na ang mga babayi, gani wala na sing tawo. Nagduko si Juan kag ginlingling ang sulod sang lulubngan kag nakita niya ang mga bendahe, apang wala sia magsulod.

Sang nag-abot si Pedro, wala sia magpangalag-ag kundi nagsulod dayon. Nakita niya didto ang mga bendahe kag ang panyo man nga sa ulo anay ni Jesus. Naburambod ini sa isa ka lugar. Nagsulod man si Juan, kag nagtuo sia sa ginbalita ni Maria. Apang wala mahangpi nanday Pedro kag Juan nga si Jesus ginbanhaw, bisan pa nga masunson Niya sila ginsugiran nga banhawon Sia. Naligban, nagpauli ang duha, apang si Maria, nga nagbalik sa lulubngan, nagpabilin.

Samtang, ang iban nga mga babayi nagdalidali sa pagbalita sa mga disipulo nga si Jesus ginbanhaw, subong sang ginsugo sang mga anghel sa ila. Samtang nagadalagan sila sing madasig, si Jesus nagsugata sa ila kag nagsiling: “Maayong adlaw!” Nagluhod sila sa iya mga tiil, kag nagsimba sa iya. Nian si Jesus nagsiling: “Dili kamo mahadlok. Kadto kamo kag sugiran ang akon mga utod nga magkadto sila sa Galilea; kag didto makita ako nila.”

Sang nagligad, sang naglinog kag nagpakita ang mga anghel, ang mga soldado nga nagabantay naurungan kag nangin subong sang mga patay. Sang maulian, nagkadto sila gilayon sa siudad kag ginsugid sa puno nga mga saserdote ang natabo. Sa tapos masapol ang “mga tigulang” sang mga Judiyo, gindesisyonan ini paagi sa pagtabon sang natabo kag paghiphip sa mga soldado. Ginsugo sila: “Isiling ninyo, ‘Ang iya mga disipulo nagkari sa kagab-ihon kag nagkawat sa iya sang nagakatulog kami.’ ”

Bangod kay ang Romanong mga soldado mahimo silutan sing kamatayon kon makatulog sa ila istasyon, ang mga saserdote nagsaad: “Kon ini [report sang inyo pagtulog] mabatian sang pangulo-puod, buyukon namon sia kag luwason kamo sa kaliligban.” Bangod daku nga kantidad ang ginhiphip, ginhimo sang mga soldado ang ginsugo sa ila. Subong resulta, ang dimatuod nga balita nahanungod sa pagkawat sa lawas ni Jesus naglapta sa mga Judiyo.

Si Maria Magdalena, nga nagpabilin sa lulubngan, nagkasubo sing daku. Diin na si Jesus? Sang magduko sia kag maglingling sa lulubngan, nakita niya ang duha ka anghel nga napanaptan sing maputi, nga nagpakita liwat! Ang isa nagalingkod sa uluhan kag ang isa sa tiilan sa ginhamtangan anay sang lawas ni Jesus. “Babayi, ngaa bala nagahibi ka?” pamangkot nila.

“Bangod nga ginkuha nila ang akon Ginuo,” sabat ni Maria, “kag wala ako makahibalo kon diin ginpahamtang sia nila.” Nian nagliso sia kag nakita niya ang isa nga nagliwat sang pamangkot: “Babayi, ngaa bala nagahibi ka?” Kag ini sia nagpamangkot man: “Sin-o ang imo ginapangita?”

Nagahunahuna nga ini sia amo ang manugbantay sang katamnan nga nahamtangan sang lulubngan, sia nagsiling sa iya: “Ginuo, kon ikaw ang nagkuha sa iya, sugiri ako kon diin mo sia ginbutang, kag kuhaon ko sia.”

“Maria!” siling sang tawo. Kag sa gilayon nakilala niya nga sia si Jesus, bangod sang pamilyar nga pagpakigsugilanon niya sa iya. “Rab·boʹni!” (nagakahulugan “Manunudlo!”) siling niya. Sa daku nga kalipay, nagkapyot sia sa iya. Apang si Jesus nagsiling: “Dili ka magkapyot sa akon. Kay wala pa ako makakayab sa Amay. Apang kadto ka sa akon mga kauturan kag isiling sa ila, ‘Makayab ako sa akon Amay kag inyo Amay kag sa akon Dios kag inyo Dios.’ ”

Si Maria nagkadto sa gintipunan sang mga apostoles kag mga disipulo. Gindugangan niya ang balita nga ginsugid na sang iban nga mga babayi nahanungod sa pagkakita sa ginbanhaw nga si Jesus. Apang, ining mga lalaki, nga wala magpati sa nahaunang mga babayi, wala man magpati kay Maria. Mateo 28:​3-15; Marcos 16:​5-8; Lucas 24:​4-12; Juan 20:​2-18.

▪ Sang nakita nga wala sing unod ang lulubngan, ano ang ginhimo ni Maria Magdalena, kag ano ang naeksperiensiahan sang iban nga mga babayi?

▪ Ano ang reaksion nanday Pedro kag Juan sang makita nila nga wala sing unod ang lulubngan?

▪ Ano ang nakita sang iban nga mga babayi sang nagapakadto sila sa pagsugid sa mga disipulo tuhoy sa pagbanhaw kay Jesus?

▪ Ano ang natabo sa mga soldado nga guardia, kag ano ang sabat sang mga saserdote sa ginsugid nila?

▪ Ano ang natabo sang nagaisahanon si Maria Magdalena sa lulubngan, kag ano ang reaksion sang mga lalaki sa balita sang mga babayi?