Kapitulo 68

Dugang Pa nga Pagpanudlo sa Ikapito nga Adlaw

WALA pa matapos ang katapusan nga adlaw sang Piesta sang mga Payagpayag, ang ikapito nga adlaw. Nagapanudlo si Jesus sa isa ka bahin sang templo nga ginatawag “bahandian.” Mahimo nga ini sa duog nga ginatawag Korte sang Kababayin-an nga sa diin may mga kaban nga ginahulugan sang mga tawo sang ila mga amot.

Kada gab-i sa tion sang piesta, may yara pinasahi nga pagpasundayag sing kapawa sa sini nga bahin sang templo. Apat ka higante nga kandelero ang ginapatindog diri, ang tagsatagsa may apat ka dalagku nga batiya nga puno sing lana. Ang kapawa gikan sa sining mga suga, ang nagadabdab nga lana gikan sa 16 ka batiya, bastante na sa pag-iwag sa mga palibot tubtob sa malayo kon gab-i. Ang ginasiling karon ni Jesus mahimo nga magapahanumdom sa iya mga tagpalamati sini nga pasundayag. “Ako ang kapawa sang kalibutan,” siling ni Jesus. “Sia nga nagasunod sa akon indi maglakat sa kadudulman, kundi may kapawa nga nagahatag sing kabuhi.”

Nagpamatok ang mga Fariseo: “Ikaw nagasaksi sa imo kaugalingon; ang imo panaksi indi matuod.”

Si Jesus nagsabat: “Bisan kon ako magsaksi sa akon kaugalingon, ang akon panaksi matuod, kay nakahibalo ako kon diin ako naghalin kag kon diin ako nagakadto. Apang kamo wala makahibalo kon diin ako maghalin ukon diin ako nagakadto.” Nagdugang pa sia: “Ako ang nagasaksi sa akon kaugalingon, kag ang Amay nga nagpadala sa akon nagasaksi sa akon.”

“Diin ang imo Amay?” luyag mahibaluan sang mga Fariseo.

“Wala kamo makakilala sa akon ukon sa akon Amay,” sabat ni Jesus. “Kon kamo nakakilala sa akon, makilala ninyo ang akon Amay man.” Bisan pa luyag gihapon sang mga Fariseo nga ipadakop si Jesus, wala sing nagtandog sa iya.

“Ako malakat,” siling liwat ni Jesus. “Kon diin ako makadto, indi kamo makakadto.”

Sa sini nagsugod sa pagpalibog ang mga Judiyo: “Manginmatay bala sia? Bangod sia nagasiling, ‘Kon diin ako makadto, indi kamo makakadto.’ ”

“Kamo gikan sa idalom,” paathag ni Jesus. “Ako gikan sa ibabaw. Kamo iya sining kalibutan; ako indi iya sining kalibutan.” Nian nagdugang pa sia: “Kon indi kamo magtuo nga ako amo sia magakalapatay kamo sa inyo mga sala.”

Ginapatuhuyan, sa pagkamatuod, ni Jesus ang iya pagluntad sa wala pa sia nangin tawo kag ang ginsaad nga pagka-Mesias niya, ukon Cristo. Walay sapayan, namangkot sila, nga wala sing duhaduha may daku nga pagtamay: “Sin-o ka?”

Walay sapayan sang ila pagsikway, si Jesus nagsabat: “Ngaa nagapakighambal pa ako sa inyo?” Apang nagpadayon sia sa pagsiling: “Ang nagpadala sa akon matuod, kag ang akon nabatian sa iya ginpahayag ko sa kalibutan.” Si Jesus nagpadayon: “Kon mabayaw ninyo ang Anak sang tawo, nian mahibaluan ninyo nga ako amo sia, kag nga ako wala nagahimo sing bisan ano sa akon kaugalingon nga pagbulut-an; kundi suno sa gintudlo sa akon sang Amay ginapamulong ko ining mga butang. Kag ang nagpadala sa akon kaupod nakon; wala niya ako pagbayai nga isa lamang, kay nagahimo ako sa gihapon sang kalahamut-an sa iya.”

Sang ginsiling ni Jesus ining mga butang, madamo ang nagtuo sa iya. Sa ila sini sia nagsiling: “Kon kamo magpadayon sa akon pulong, kamo matuod gid nga mga disipulo nakon, kag kamo makakilala sang kamatuoran, kag ang kamatuoran magahilway sa inyo.”

“Kami mga kaliwatan ni Abraham,” siling sang mga nagapamatok sa iya, “kag wala pa gid maulipon sa bisan kay sin-o. Paano nga nagasiling ka, ‘Hilwayon kamo’?”

Bisan pa ang mga Judiyo gingamhan sang mga dumuluong, wala nila ginakilala ang bisan sin-o nga manugpigos subong agalon. Indi nila luyag magpatawag nga mga ulipon. Apang ginapakita ni Jesus nga sila sa pagkamatuod mga ulipon. Sa anong paagi? “Sa pagkamatuod nagasiling ako sa inyo,” siling ni Jesus, “ang tagsatagsa nga nagapakasala ulipon sang sala.”

Ang pagdumili sa pagbaton sang ila pagkaulipon sa sala nagabutang sa mga Judiyo sa isa ka makatalagam nga kahimtangan. “Ang ulipon wala nagapadayon sa panimalay sing dayon,” paathag ni Jesus. “Ang anak nagapadayon sing dayon.” Sanglit ang isa ka ulipon wala sing mga kinamatarong sa pagpanubli, mahimo nga yara sia sa katalagman nga pahalinon sa bisan ano nga tion. Ang anak lamang nga natawo ukon gin-adoptar sa panimalay ang magapadayon “sing dayon,” kon sayoron, tubtob nagakabuhi sia.

“Gani kon ang Anak maghilway sa inyo,” padayon ni Jesus, “matuod gid nga mangin hilway kamo.” Sa amo, ang kamatuoran nga nagahilway sa mga tawo amo ang kamatuoran nahanungod sa Anak, si Jesucristo. Paagi lamang sa iya ginsakripisyo nga himpit nga tawhanon nga kabuhi nga ang bisan sin-o mahilway gikan sa makamamatay nga sala. Juan 8:12-36.

▪ Sa diin nagpanudlo si Jesus sang ikapito nga adlaw? Ano ang natabo sang gab-i didto, kag paano ini nagaangot sa gintudlo ni Jesus?

▪ Ano ang ginsiling ni Jesus nahanungod sa iya ginhalinan, kag ano ang ginapahayag sini nahanungod sa iya identidad?

▪ Sa anong paagi mga ulipon ang mga Judiyo, apang anong kamatuoran ang magahilway sa ila?