Kapitulo 129

Dugang Pa nga mga Pagpakita

MASUBO gihapon ang mga disipulo. Indi nila mahangpan kon ngaa wala sing unod ang lulubngan, kag wala man sila magpati sa ginbalita sang mga babayi. Gani sang Domingo, si Cleopas kag ang isa pa ka disipulo nagbiya sa Jerusalem pa Emaus, mga napulog-isa ka kilometro ang kalayuon.

Sa dalanon, samtang ginahambalan nila ang nagakatabo sa sulod sang adlaw, may nagbuylog sa ila nga isa ka dumuluong. “Ano ang ginabaisan ninyo samtang nagalakat kamo?” pamangkot niya.

Nagdulog ang mga disipulo, nga ang ila mga nawong masubo, kag si Cleopas nagsabat: “Dumuluong ka bala nga nagapuyo sing isahanon sa Jerusalem kag amo kon ngaa wala ka makahibalo sang mga butang nga nahanabo didto sa sining mga adlaw?” “Ano nga mga butang?” pamangkot niya.

“Ang nahanungod kay Jesus nga Nazaretnon,” sabat nila. “Ang amon puno nga mga saserdote kag mga manugdumala nagtugyan sa iya nga pagapatyon kag ginlansang sia. Apang naglaum kami nga ini nga tawo amo ang magatubos sa Israel.”

Ginpaathag ni Cleopas kag sang iya kaupod ang makatilingala nga mga natabo sadto nga adlaw​—⁠ang balita nahanungod sa mga anghel nga nakita kag ang lulubngan nga wala sing unod​—⁠apang nagsiling sila nga indi nila mahangpan ang kahulugan sining mga butang. Ginsabdong sila sang dumuluong: “O mga tawo nga buangbuang kag mahinay sing tagipusuon sa pagtuo sa tanan nga napamulong sang mga manalagna! Indi bala kinahanglan nga ang Cristo mag-antos sining mga butang kag magsulod sa iya himaya?” Nian ginsaysay niya sa ila ang mga dinalan gikan sa balaan nga kasulatan nahanungod kay Cristo.

Sang ulihi nagahinampot na sila sa Emaus, kag ang dumuluong daw mapadayon pa kuntani sa paglakat. Bangod luyag nila makabati sing dugang pa, ang mga disipulo nagsiling: “Pabilin ka sa amon, kay hapon na.” Gani nagpabilin sia agod magkaon. Sang makapangamuyo sia kag gintipiktipik niya ang tinapay kag ginhatag ini sa ila, nakilal-an nila nga sia gid amo si Jesus nga nagmateryalisar sa lawas sang tawo. Apang nadula sia dayon.

Nahangpan na nila karon kon ngaa kadamo gid sing nahibal-an ang dumuluong! “Wala bala nagadabdab ang aton tagipusuon sa sulod naton,” pamangkot nila, “samtang nagapakighambal sia sa aton sa dalanon, samtang ginasaysay niya sa aton ang mga Kasulatan?” Sa gilayon, nagtindog sila kag dalidali nga nagbalik sa Jerusalem, nga sa diin nakita nila ang mga apostoles kag ang mga nagtipon kaupod nila. Sa wala pa makahambal si Cleopas kag ang iya kaupod, ang iban pa makunyagon nga nagbalita: “Matuod gid nga nabanhaw ang Ginuo kag nagpakita kay Simon!” Nian ginsaysay sang duha kon paano si Jesus nagpakita man sa ila. Makap-at na ini sa sulod sang adlaw nga nagpakita sia sa nanuhaytuhay sang iya mga disipulo.

Si Jesus hinali nga nagpakita sa ikalima nga tion. Bisan pa sirado ang mga ganhaan bangod nahadlok ang mga disipulo sa mga Judiyo, nagsulod sia, nga nagatindog sa tunga nila, kag nagsiling: “Paghidait sa inyo.” Kinulbaan sila, kay pagdumdom nila nakakita sila sing espiritu. Gani, sa pagpaathag nga indi sia espiritu, si Jesus nagsiling: “Ngaa bala natublag kamo, kag ngaa nagapangduhaduha kamo? Tan-awa ninyo ang akon mga kamot kag mga tiil, kay ako gid ini; hikapa ninyo ako kag tan-awa, kay ang espiritu wala sing unod kag tul-an subong sang ginatan-aw ninyo nga ako may akon.” Sa gihapon, nagpang-alag-ag sila sa pagpati.

Agod mabuligan sila sa paghangop nga sia matuod si Jesus, namangkot sia: “May kalan-on bala kamo diri?” Sa tapos mabaton ang sinugba nga isda kag makaon ini, sia nagsiling: “Ini amo ang akon mga pulong nga ginpamulong ko sa inyo sang kaupod pa ako ninyo [antes sang iya pagkamatay], nga ang tanan nga butang nga nasulat sa kasuguan ni Moises kag sa mga Manalagna kag sa mga Salmo nahanungod sa akon kinahanglan nga matuman.”

Nagapadayon sang, sa epekto, daw isa ka pagtuon sa Biblia upod sa ila, si Jesus nagpanudlo: “Amo ini ang nasulat nga ang Cristo dapat mag-antos kag pagabanhawon sa ikatlo nga adlaw, kag sa iya ngalan ang paghinulsol para sa kapatawaran sang mga sala dapat iwali sa tanan nga kapungsuran​—⁠sugod sa Jerusalem, mangin mga saksi kamo sining mga butang.”

Bangod sang pila ka rason si Tomas wala sa tion sining importante nga pagtinipon sadtong Domingo sang gab-i. Gani sang masunod nga mga adlaw, malipayon nga ginsugiran sia sang iban: “Nakita namon ang Ginuo!”

“Kon indi ko makita ang agi sang mga lansang sa iya kamot,” protesta ni Tomas, “kag magulo ko ang akon tudlo sa agi sang mga lansang, kag magulo ko ang akon kamot sa iya kilid, indi ako magtuo.”

Ti, pagligad sang walo ka adlaw ang mga disipulo nagtipon liwat sa sulod sang isa ka hulot. Sini nga tion si Tomas kaupod nila. Bisan pa sirado ang mga ganhaan, si Jesus nagtindog liwat sa tunga nila kag nagsiling: “Paghidait sa inyo.” Nian, nagliso sia kay Tomas, kag gin-agda sia: “Idab-ot diri ang imo tudlo, kag tan-awa ang akon mga kamot, kag igulo sa akon kilid, kag indi ka na magpangduhaduha.”

“Ginuo ko kag Dios ko!” tuaw ni Tomas.

“Bangod nga nakita mo ako nagatuo ka na bala?” pamangkot ni Jesus. “Malipayon ang wala makakita apang nagatuo.” Lucas 24:​11, 13-48; Juan 20:​19-29.

▪ Ano ang ginpamangkot sang isa ka dumuluong sa duha ka disipulo samtang sa dalanon pa Emaus?

▪ Ano ang ginsiling sang dumuluong nga nagpadabdab sang tagipusuon sang mga disipulo sa sulod nila?

▪ Paano nahantop sang mga disipulo kon sin-o ang dumuluong?

▪ Sang magbalik si Cleopas kag ang iya kaupod sa Jerusalem, anong makakulunyag nga balita ang nabatian nila?

▪ Ano ang ikalima nga pagpakita ni Jesus sa iya mga disipulo, kag ano ang natabo sa tion sini?

▪ Ano ang natabo sang ikawalo nga adlaw sa tapos sang ikalima nga pagpakita ni Jesus, kag paano si Tomas nakombinse sang ulihi nga si Jesus buhi?