Kapitulo 23

Dugang nga mga Milagro sa Capernaum

SANG Inugpahuway sa tapos gintawag ni Jesus ang iya nahauna nga apat ka disipulo​—sanday Pedro, Andres, Santiago, kag Juan​—sila tanan nagkadto sa lokal nga sinagoga sa Capernaum. Didto si Jesus nagsugod sa pagpanudlo, kag ang mga tawo natingala bangod nagapanudlo sia sa ila subong isa nga may awtoridad kag indi subong sang mga escriba.

Yari diri sa sining Inugpahuway ang tawo nga ginsudlan sang demonyo. Wala madugay, nagsinggit sia sa mabaskog nga tingog: “Ano bala ang labot mo sa amon, Jesus nga Nasareno? Nagkari ka bala sa paglaglag sa amon? Nakahibalo ako kon sin-o ikaw, Balaan sang Dios.”

Ang demonyo nga nagakontrol sa tawo sing aktuwal isa sang mga anghel ni Satanas. Nagsabdong sa demonyo, si Jesus nagsiling: “Hipos ka, kag guwa sa iya!”

Ti, gindusmo sang demonyo ang tawo kag nagsinggit sing mabaskog. Apang nagguwa ini sa tawo nga wala sing samad nga nahimo sa iya. Nahiurongan ang tanan! “Ano bala ini?” pamangkot nila. “Sa may pagbulut-an nagasugo sia bisan sa mga espiritu nga dimatinlo, kag nagatuman sila sa iya.” Ang balita nahanungod sini naglapnag sa palibot nga mga duog.

Paghalin sa sinagoga, si Jesus kag ang iya mga disipulo nagkadto sa balay ni Simon, ukon Pedro. Didto ang ugangan nga babayi ni Pedro mataas sing hilanat. ‘Buligi sia palihog,’ pakiluoy nila. Gani nagpalapit si Jesus, kag gin-uyatan ang iya kamot kag ginbangon sia. Sa gilayon nag-ayo sia kag nagsugod sa pagluto sing kalan-on para sa ila!

Sang ulihi, sang makatunod na ang adlaw, ang katawhan gikan sa tanan nga duog nagsugod sa pagkadto sa balay ni Pedro nga dala ang ila mga masakiton. Sang ulihi ang bilog nga siudad natipon sa ganhaan! Kag ginbulong ni Jesus ang tanan nila nga masakiton, bisan ano man ang balatian. Ginhilway pa gani niya ang mga ginapanag-iyahan sang mga demonyo. Sang magguwa sila, ang mga demonyo nga iya ginpaguwa nagasinggit: “Anak ka sang Dios.” Apang ginsabdong sila ni Jesus kag wala gintugutan sa paghambal bangod nahibaluan nila nga sia amo ang Cristo. Marcos 1:21-34; Lucas 4:31-41; Mateo 8:14-17.

▪ Ano ang natabo sa sinagoga sang Inugpahuway sa tapos matawag ni Jesus ang iya apat ka disipulo?

▪ Diin nagkadto si Jesus sang maghalin sa sinagoga, kag anong milagro ang ginhimo niya didto?

▪ Ano ang natabo sang ulihi sadto man nga gab-i?