Kapitulo 81

Dugang nga mga Panikasog sa Pagpatay kay Jesus

SANGLIT tigtulugnaw, si Jesus nagalakatlakat sa may atop nga lugar nga kilala subong portico ni Solomon. Tupad ini sang templo. Diri ginlibutan sia sang mga Judiyo kag nagsugod sa pagsiling: “Tubtob pa bala san-o ang pagpahawathawat mo sa amon? Kon ikaw ang Cristo, sugiri kami sing maathag.”

“Ginsiling ko sa inyo,” sabat ni Jesus, “kag wala kamo magtuo.” Wala sila pagsugiri sing direkta ni Jesus nga sia amo ang Cristo, subong sang ginsugid niya sa Samariahanon nga babayi sa bubon. Apang, sa katunayan, ginsugid niya ang iya identidad sang ginpaathag niya sa ila nga naghalin sia sa mga ginharian sa hitaas kag nagkabuhi antes kay Abraham.

Apang, luyag ni Jesus nga ang katawhan mismo ang maghimo sang konklusion nga sia amo ang Cristo paagi sa pagpaanggid sang iya mga hilikuton sa kon ano ang gintagna sang Biblia nga himuon sang Cristo. Amo sina kon ngaa nga una sa sina ginsilingan niya ang iya mga disipulo nga indi pagsugiran ang bisan sin-o nga sia amo ang Cristo. Kag amo sina kon ngaa padayon sia nga nagsiling sa sining dimainabyanon nga mga Judiyo: “Ang mga buhat nga akon ginahimo sa ngalan sang akon Amay, sila nagasaksi sa akon. Apang wala kamo magtuo.”

Ngaa bala wala sila magtuo? Bangod bala sang kakulang sing ebidensia nga si Jesus amo ang Cristo? Indi, kundi bangod sang rason nga ginhatag ni Jesus sang magsiling sia sa ila: “Kamo indi sa akon mga karnero. Ang akon mga karnero nagapamati sang akon tingog, kag nakilala ko sila, kag nagasunod sila sa akon. Kag nagahatag ako sa ila sing kabuhi nga wala sing katapusan, kag indi na gid sila mawala, kag wala sing isa nga makaagaw sa ila sa akon kamot. Ang akon Amay nga naghatag sa ila sa akon daku pa sa tanan, kag wala sing makaagaw sa ila sa kamot sang Amay.”

Nian ginlaragway ni Jesus ang iya suod nga kaangtanan sa iya Amay, nga nagapaathag: “Ako kag ang Amay isa.” Sanglit si Jesus yari sa duta kag ang iya Amay yara sa langit, maathag nga wala sia nagasiling nga sia kag ang iya Amay sa literal ukon sa pisikal, isa. Sa baylo, buot niya silingon nga isa sila sa katuyuan ukon nahiusa sila.

Naakig sa ginsiling ni Jesus, ang mga Judiyo nagpulot sing mga bato sa pagpatay sa iya, subong sang ginhimo nila sang nagligad, sa panahon sang Piesta sang mga Tabernakulo, ukon mga Layanglayang. Maisugon nga gin-atubang ang iya mga manugpatay, si Jesus nagsiling: “Madamo nga maayong buhat ang ginpakita ko sa inyo gikan sa Amay. Diin bala sadtong mga buhat ginabato ako ninyo?”

“Indi tungod sa maayong mga buhat nagabato kami sa imo,” sabat nila, “kundi nga ikaw, nga tawo, nagapakadios.” Sanglit wala gid mag-angkon si Jesus nga dios, ngaa ginsiling ini sang mga Judiyo?

Maathag nga bangod gin-angkon ni Jesus sa iya kaugalingon ang mga gahom nga sa pagpati nila natungod lamang sa Dios. Halimbawa, bag-o lang sia magsiling nahanungod sa “mga karnero,” “nagahatag ako sa ila sing kabuhi nga wala sing katapusan,” butang nga wala sing tawo ang makahimo. Apang, wala matalupangdi sang mga Judiyo ang kamatuoran nga ginakilala ni Jesus nga nagbaton sia sing awtoridad gikan sa iya Amay.

Nga si Jesus nagaangkon nga kubos sa Dios, masunod niya nga ginpakita paagi sa pagpamangkot: “Wala bala masulat sa inyo Kasuguan [sa Salmo 82:​6], ‘Ako nagasiling: “Mga dios kamo” ’? Kon gintawag niya nga ‘mga dios’ sila nga batok sa ila nag-abot ang pulong sang Dios, . . . ginasiling bala ninyo sa akon nga ginpakabalaan sang Amay kag gin­padala sa kalibutan, ‘Ikaw nagapasipala,’ bangod nga ako nagsiling, Ako ang Anak sang Dios?”

Bangod ginatawag sang Kasulatan nga “mga dios” bisan ang dimakatarunganon nga tawhanon nga mga hukom, ano nga sayop ang makita sining mga Judiyo kay Jesus sa pagsiling, “Ako Anak sang Dios”? Si Jesus nagadugang: “Kon ako wala nagahimo sang mga buhat sang akon Amay, nian dili kamo magpati sa akon. Apang kon nagahimo ako sa ila, bisan wala kamo magpati sa akon, magpati kamo sang mga buhat, agod nga inyo mahibaluan kag mahangpan nga ang Amay sa akon kag ako sa Amay.”

Sang ginsiling ini ni Jesus, ang mga Judiyo nagtinguha sa pagdakop sa iya. Apang nakapalagyo sia, subong sang natabo man anay sa Piesta sang mga Tabernakulo. Naghalin sia sa Jerusalem kag nagtabok sa Suba sang Jordan diin si Juan nagbawtismo anay sang mga apat ka tuig na ang nakaligad. Ining lokasyon maathag nga indi malayo gikan sa nabagatnan nga baybayon sang Dagat sang Galilea, duha ka adlaw nga paglakbay ukon kapin pa halin sa Jerusalem.

Madamo nga tawo ang nagkadto kay Jesus sa sining lugar kag nagsiling: “Si Juan, sa pagkamatuod, wala maghimo sing tanda, apang ang tanan nga ginpamulong ni Juan nahanungod sining tawo matuod.” Busa madamo ang nagtuo kay Jesus diri. Juan 10:​22-42; 4:​26; 8:​23, 58; Mateo 16:⁠20.

▪ Paagi sa ano nga luyag ni Jesus nga kilalahon sia sang katawhan subong ang Cristo?

▪ Paano si Jesus kag ang iya Amay isa?

▪ Ngaa nagasiling ang mga Judiyo nga ginahimo ni Jesus ang iya kaugalingon nga dios?

▪ Paano ang pagbalikwat ni Jesus halin sa Salmo nagapakita nga wala sia nagaangkon nga pareho sa Dios?