Kapitulo 61

Gin-ayo ang Bata nga May Demonyo

SAMTANG wala sanday Jesus, Pedro, Santiago, kag Juan, ayhan didto sila sa kiliran sang Bukid Hermon, ang iban nga mga disipulo nakasugata sing isa ka problema. Sang pagbalik niya, gilayon nga nakita ni Jesus nga may malain nga natabo. May kadam-an nga nagalibot sa iya mga disipulo, kag ang mga escriba nagapakigpuyas sa ila. Sang makita si Jesus, ang katawhan nakibot sing daku kag nagdalagan sa pagsug-alaw sa iya. “Ano bala ang ginapakigpuyas ninyo sa ila?” pamangkot niya.

Gikan sa kadam-an, isa ka tawo ang nagluhod kay Jesus kag nagpaathag: “Manunudlo, gindala ko sa imo ang akon anak nga lalaki nga may espiritu nga apa; kag kon madakpan sia sini, ginalampos sia sa duta, kag nagabura sia kag nagabagrot sang iya mga ngipon kag nagatiskog ang bug-os niya nga lawas. Ginpangabay ko ang imo mga disipulo sa pagtabog sini, apang indi sila makasarang.”

Mahimo gid nga ginhingalitan sang mga escriba ang kapaslawan sang mga disipulo sa pag-ayo sa bata, ayhan ginayaguta ang ila mga panikasog. Sa sini gid nga tion, nag-abot si Jesus. “O kaliwatan nga dimatinuuhon,” siling niya, “tubtob san-o pa bala nga ako magaupod sa inyo? Tubtob san-o pa bala nga ako magabatas sa inyo?”

Daw ginapatuhoy ni Jesus ang iya ginahambal sa tagsatagsa nga yadto didto, apang wala sing duhaduha nga ang iya ginapabatibatian gid amo ang mga escriba, nga nagagamo sa iya mga disipulo. Masunod, si Jesus nagsiling tuhoy sa bata: “Dal-a sia sa akon.” Apang sang nagapalapit na ang bata kay Jesus, ginpakurog sia sang demonyo sa bagay nga napukan sia sa duta. Ang bata nagligid sa duta kag nagabura ang baba.

“Kasan-o pa nga nagsubong sia sini?” pamangkot ni Jesus.

“Kutob sang bata pa,” sabat sang amay. “Kag sa makapila ginpilak sia [sang demonyo] sa kalayo kag sa tubig man sa paglaglag sa iya.” Nian ang amay nagpakiluoy: “Kon ikaw makahimo sing bisan ano, kaluuyi kami kag tabangi kami.”

Ayhan sa sulod sang mga tinuig, ang amay nagpangayo sing bulig. Kag, karon, bangod sang kapaslawan sang mga disipulo ni Jesus, daku gid ang iya kasubo. Nahangpan ang halos wala na sing paglaum nga pangabay sang amay, makapalig-on nga nagsiling si Jesus: “Inang ekspresyon, ‘Kon ikaw makahimo’! Ang tanan nga butang mahimo kon ang isa nagatuo.”

“Nagatuo ako!” gilayon nga singgit sang amay, kag nagpakiluoy sia: “Tabangi ang akon pagkadimatinuuhon!”

Sang matalupangdan nga ang kadam-an nagadalagan kaupod nila, ginsabdong ni Jesus ang demonyo: “Ikaw nga espiritu nga apa kag bungol, nagasugo ako sa imo, guwa ka sa iya kag dili na magsulod sa iya.” Sang manugguwa ang demonyo, ginhimo sini ang bata nga magsinggit kag magkombulsion sing madamong beses. Nian ang bata nahimo nga daw patay sa duta, sa bagay nga ang kalabanan nagsiling: “Patay na sia!” Apang ginkaptan ni Jesus sa kamot ang bata, kag ginbangon sia.

Sang nagligad, sang ang mga disipulo ginpadala sa pagbantala, nagpaguwa sila sang mga demonyo. Gani karon, sang magsulod sila sa balay, ginpamangkot nila si Jesus sing pahain: “Ngaa bala nga indi kami makasubol sa iya?”

Nagapakita nga bangod ini sa ila kakulang sing pagtuo, si Jesus nagsabat: “Ini nga bagay indi mapaguwa sa bisan ano kundi sa pangamuyo kag puasa.” Maathag nga kinahanglan ang paghanda para mapaguwa ang makusog nga demonyo nga naulamid sa sini nga kaso. Kinahanglan ang makusog nga pagtuo upod ang pangamuyo nga nagapangabay sa nagahatag sing gahom nga bulig sang Dios.

Kag si Jesus nagdugang: “Sa pagkamatuod nagasiling ako sa inyo, Kon kamo may pagtuo subong sa lamigas sang mustasa, magasiling kamo sa sining bukid, ‘Saylo didto,’ kag ini magasaylo, kag wala gid sing dimahimo ninyo.” Daw ano ka gamhanan ang pagtuo!

Ang mga sablag kag mga kabudlayan nga nagaupang sang pag-uswag sa pag-alagad kay Jehova mahimo nga daw indi malandas kag indi madula subong sang dakung literal nga bukid. Apang, ginapakita ni Jesus nga kon palambuon naton ang pagtuo sa aton mga tagipusuon, bunyagan kag palig-unon ini nga magtubo, magahamtong ini kag makasarang sa paglandas sa katulad-bukid nga mga sablag kag mga kabudlayan. Marcos 9:14-29; Mateo 17:19, 20; Lucas 9:37-43.

▪ Ano nga kahimtangan ang nasapwan ni Jesus sang magbalik sia halin sa Bukid Hermon?

▪ Ano nga pagpalig-on ang dugang nga ginhatag ni Jesus sa amay sang may demonyo nga bata nga lalaki?

▪ Ngaa wala mapaguwa sang mga disipulo ang demonyo?

▪ Daw mangin ano ka gamhanan ang pagtuo subong sang ginpakita ni Jesus?