Kapitulo 106

Ginbuyagyag sang Ilustrasyon Nahanungod sa Ulubasan

SI Jesus yara sa templo. Bag-o lang niya magumon ang hunahuna sang relihioso nga mga lider nga luyag makahibalo kon sa kay sin-o awtoridad ginahimo niya ang mga butang. Antes sila maulian sa ila pagkagumon, si Jesus namangkot: “Ano bala sa hunahuna ninyo?” Kag nian paagi sa isa ka ilustrasyon, ginpakita niya sa ila kon ano gid sila nga sahi sang mga tawo.

“Ang isa ka tawo may duha ka anak nga lalaki,” asoy ni Jesus. “Nagpalapit sia sa nahauna kag nagsiling, ‘Anak ko, kadto ka sa pagpangabudlay karon sa ulubasan.’ Kag nagsabat ining isa, ‘Makadto ako, ginuo,’ apang wala sia magkadto. Nagpalapit sia sa ikaduha, kag amo man ang iya ginsiling. Nagsabat ining isa, ‘Indi ako.’ Sang ulihi naghinulsol sia kag naglakat. Sin-o sa duha ang naghimo sang kabubut-on sang iya amay?” pamangkot ni Jesus.

“Ang naulihi,” sabat sang iya mga kaaway.

Gani nagpaathag si Jesus: “Sa pagkamatuod nagasiling ako sa inyo nga ang mga manugsukot sing buhis kag ang makihilawason nga mga babayi nagasulod sing una sa inyo sa ginharian sang Dios.” Ang mga manugsukot sing buhis kag ang makihilawason nga mga babayi nagdumili sang primero sa pag-alagad sa Dios. Apang, kaangay sang ikaduha nga anak, naghinulsol sila kag nag-alagad sa iya. Sa pihak nga bahin, ang relihioso nga mga lider, kaangay sang nahauna nga anak, nagpangangkon nga nagaalagad sa Dios, apang subong ginsiling ni Jesus: “Nagkari si Juan [Bautista] sa inyo sa dalan sang pagkamatarong, apang wala kamo magtuo sa iya. Apang ang mga manugsukot sing buhis kag ang makihilawason nga mga babayi nagtuo sa iya, kag bisan nakita ninyo ini, wala gid kamo maghinulsol sang ulihi kag magtuo sa iya.”

Masunod nga ginpakita ni Jesus nga ang kapaslawan sadtong relihioso nga mga lider indi lamang ang pagpatumbaya sa pag-alagad sa Dios. Indi, kundi sila sa kamatuoran malain kag malaut nga mga tawo. “May isa ka agalon sang panimalay,” asoy ni Jesus, “nga naghimo sing ulubasan kag ginkudalan niya ini sa palibot kag nagpakutkot sia sing linasan sang ubas kag nagpatindog sing balantayan, kag nagpanlakatan sa malayo nga duta. Sang tion na sa pagpamupo sang patubas, ginpakadto niya ang iya mga ulipon sa mga agsador sa pagkuha sang iya parti. Apang, gindakop sang mga agsador ang iya mga ulipon, kag ang isa ginbunal, ang isa ginpatay, kag ang isa ginbato. Liwat ginpakadto niya ang iban nga mga ulipon, nga madamo pa sa mga nahauna, kag ginhimo nila sa ila ang subong man.”

Ang “mga ulipon” amo ang mga manalagna nga ginpadala sang “agalon sang panimalay,” si Jehova nga Dios, sa “mga agsador” sang iya “ulubasan.” Ining mga agsador amo ang nagapanguna nga mga tiglawas sang pungsod sang Israel, ang pungsod nga ginapakilala sang Biblia subong “ulubasan” sang Dios.

Sanglit ginpintasan kag ginpatay sang “mga agsador” ang “mga ulipon,” si Jesus nagpaathag: “Sa katapusan ginpakadto niya [sang tag-iya sang ulubasan] sa ila ang iya anak, nga nagasiling, ‘Tahuron nila ang akon anak.’ Sang nakita sang mga agsador ang anak, nagsinilingay sila, ‘Ini amo ang manunubli; kari kamo, patyon ta sia kag kuhaon ang iya panublion!’ Kag gindakop nila sia kag ginhaboy sia sa guwa sang ulubasan kag ginpatay sia.”

Karon, ginpamangkot ni Jesus ang relihioso nga mga lider: “Kon magkari ang agalon sang ulubasan, ano ang iya himuon sa sadtong mga agsador?”

“Bangod malaut sila,” sabat sang relihioso nga mga lider, “laglagon niya sila sing wala kaluoy kag ipaagsa niya ang ulubasan sa iban nga mga agsador nga magahatag sa iya sang iya parti sa tagsa ka patubas.”

Sa amo, wala sing hinalung-ong nga ginhukman nila ang ila kaugalingon, kay nalakip sila sa Israelinhon nga “mga agsador” sang pungsodnon nga “ulubasan” sang Israel ni Jehova. Ang patubas nga ginapaabot ni Jehova gikan sa sadtong mga agsador amo ang pagtuo sa iya Anak, ang matuod nga Mesias. Bangod napaslawan sila sa paghatag sina nga patubas, si Jesus nagpaandam: “Wala gid bala ninyo mabasahi sa mga Kasulatan [sa Salmo 118:​22, 23], ‘Ang bato nga ginsikway sang mga manunukod amo ang ginhimo nga pangulo sang pamag-ang. Nagikan ini kay Jehova, kag makatilingala ini sa aton mga mata’? Busa nagasiling ako sa inyo, Ang Ginharian sang Dios kuhaon sa inyo kag ihatag sa pungsod nga makapatubas sing mga bunga sa sini. Kag ang mahulog sa sini nga bato mapusa. Apang ang mahulugan sini, madugmok subong sang yab-ok.”

Nahangpan karon sang mga escriba kag sang pangulo nga mga saserdote nga sila ang ginapatuhuyan ni Jesus, kag nagplano sila nga patyon sia, ang may kinamatarong nga “manunubli.” Gani ang pribilehiyo nga maggahom sa Ginharian sang Dios kuhaon gikan sa ila subong isa ka pungsod, kag tugahon ang isa ka bag-ong pungsod sang ‘mga agsador sang ulubasan,’ nga magapatubas sing nagakaigo nga mga bunga.

Bangod nahadlok ang relihioso nga mga lider sa kadam-an, nga nagakabig kay Jesus nga isa ka manalagna, wala sila magtinguha nga patyon sia sa sining okasyon. Mateo 21:​28-46; Marcos 12:​1-12; Lucas 20:​9-19; Isaias 5:​1-7.

▪ Sin-o ang ginalaragway sang duha ka anak sa nahauna nga ilustrasyon ni Jesus?

▪ Sin-o ang ginalaragway sang “agalon sang panimalay,” sang “ulubasan,” sang “mga agsador,” sang “mga ulipon,” kag sang “manunubli” sa ikaduha nga ilustrasyon?

▪ Ano ang matabo sa ‘mga agsador sang ulubasan,’ kag sin-o ang magabulos sa ila?