Kapitulo 119

Gindala kay Annas, Dayon kay Caifas

GINGAPOS subong isa ka kriminal, si Jesus gindala kay Annas, ang impluwensiado nga mataas nga saserdote anay. Mataas nga saserdote sadto si Annas sang ginpadayaw sang 12-anyos nga si Jesus ang rabiniko nga mga manunudlo sa templo. Madamo sa mga anak nga lalaki ni Annas ang nangin mataas nga saserdote sang ulihi, kag sa karon ang iya umagad nga si Caifas ang may amo sina nga posisyon.

Mahimo nga gindala primero si Jesus sa balay ni Annas bangod madugay na nga bantog inang mataas nga saserdote sa relihioso nga pagkabuhi sang mga Judiyo. Ining paghapit kay Annas naghatag sa mataas nga saserdote nga si Caifas sing tion sa pagtipon sang Sanhedrin, ang 71-ka-miembro nga mataas nga hukmanan sang Judiyo, kag sa pagtipon man sang dimatuod nga mga saksi.

Ginpamangkot ni Annas nga puno nga saserdote si Jesus nahanungod sa iya mga disipulo kag sa iya pagtulun-an. Apang, si Jesus nagsabat: “Nakapamulong ako sing dayag sa kalibutan. Nakapanudlo ako pirme sa mga sinagoga kag sa templo, diin ang tanan nga Judiyo nagatipon; kag wala ako sing napamulong sa tago. Ngaa bala nagapamangkot ka sa akon? Pamangkuta ang mga nakabati sa akon kon ano ang ginpamulong ko sa ila. Tan-awa! Sila nakahibalo sang akon ginsiling.”

Sa sini, isa sang mga tulugyanan nga nagatindog malapit kay Jesus ang nagtampa sa iya, nga nagasiling: “Amo bala ina ang pagsabat mo sa pinakamataas nga saserdote?”

“Kon nakapamulong ako sing malaut,” sabat ni Jesus, “magsaksi ka sang malaut; apang kon nakapamulong ako sing maayo, ngaa bala gintampa mo ako?” Pagkatapos sini nga pagsabtanay, ginpadala ni Annas ang nagapos nga si Jesus kay Caifas.

Sa karon ang tanan nga puno nga mga saserdote kag mga escriba, huo, ang bug-os nga Sanhedrin, nagtipon. Ang ila duog tilipunan amo ang balay ni Caifas. Ang pagbista sa gab-i sang Paskuwa maathag gid nga supak sa Judiyong kasuguan. Apang wala ini nagpugong sa relihiosong mga lider gikan sa ila malaut nga tinutuyo.

Mga semana antes pa sang ginbanhaw ni Jesus si Lazaro, ang Sanhedrin nakapamat-od na nga patyon sia. Kag sang nagligad lamang nga duha ka adlaw, sang Mierkoles, ang relihiosong mga awtoridad naghimbon sa pagdakop kay Jesus sa limbong agod ­patyon sia. Hunahunaa lamang, kondenado na sia sa wala pa sia mabista!

Nagpangita sila sing mga saksi nga magsaksi sing dimatuod agod may kaso nga isumbong batok kay Jesus. Apang, wala sila makakita sing mga saksi nga nagahisanto sa ila panaksi. Sang ulihi, nagpalapit ang duha kag nagsiling: “Nabatian namon sia nga nagasiling, ‘Akon gub-on ining templo nga hinimo sang mga kamot kag sa tatlo ka adlaw patindugon ko ang isa na man nga indi hinimo sang mga kamot.’ ”

“Wala ka bala sing isabat?” pamangkot ni Caifas. “Ano bala ining ginasaksi nila batok sa imo?” Apang si Jesus naghipos. Bisan sa sining dimatuod nga sumbong, sa kahuya sang Sanhedrin, wala magsinanto ang sugilanon sang mga saksi. Gani gintilawan sang mataas nga saserdote ang lain nga taktika.

Nahibaluan ni Caifas kon daw ano ka sensitibo ang mga Judiyo nahanungod kay bisan sin-o nga nagaangkon nga Anak sang Dios. Sa nahaunang duha ka okasyon, makahas nga gintawag nila si Jesus nga isa ka manugpasipala nga takus sang kamatayon, sa pagdumdom nga sia nagapakatupong sa Dios. Si Caifas nagsiling sa iya: “Ginapasumpa ko ikaw sa Dios nga buhi nga magsugid ka sa amon kon ikaw si Cristo ang Anak sang Dios!”

Walay sapayan sang kon ano ang ginahunahuna sang mga Judiyo, si Jesus amo gid ang Anak sang Dios. Kag ang paghipos mahimo magakahulugan nga ginapanghiwala niya nga sia si Cristo. Gani si Jesus maisog nga nagsabat: “Amo ako; kag makita ninyo ang Anak sang tawo nga nagalingkod sa tuo sang gahom kag nagakari upod sang mga panganod sang langit.”

Bangod sini, ginkusnit ni Caifas ang iya panapton kag nagsiling: “Nagpasipala sia! Ano pa bala ang kinahanglan ta sang mga saksi? Tan-awa! Karon nakabati kamo sang pasipala niya. Ano bala sa hunahuna ninyo?”

“Takus sia sa kamatayon,” siling sang Sanhedrin. Nian gin-uligyat kag ginpasipalahan nila sia. Gintampa kag ginduplaan nila sia sa nawong. Ang iban nagtabon sang iya nawong kag nagsumbag sa iya kag mayagutaon nga nagsiling: “Itagna sa amon, ikaw nga Cristo. Sin-o bala ang nagsumbag sa imo?” Ining matinamayon kag supak sa kasuguan nga buhat natabo sa isa ka bista sa gab-i. Mateo 26:​57-68; 26:​3, 4; Marcos 14:​53-65; Lucas 22:​54, 63-65; Juan 18:​13-24; 11:​45-53; 10:​31-39; 5:​16-18.

▪ Diin una gindala si Jesus, kag ano ang natabo sa iya didto?

▪ Diin masunod nga gindala si Jesus, kag para sa anong katuyuan?

▪ Paano nahimo ni Caifas nga magsiling ang Sanhedrin nga si Jesus takus sa kamatayon?

▪ Anong matinamayon kag supak sa kasuguan nga buhat ang natabo sa bista?