Kapitulo 11

Ginhanda ni Juan ang Dalan

NAPULOG-PITO ka tuig ang nagligad kutob sang si Jesus isa ka 12 anyos nga bata nga nagapamangkot sa mga manunudlo sa templo. Tigpamulak ini sang tuig 29 C.E., kag daw subong bala nga ang ginahambalan sang tanan amo ang pakaisa ni Jesus nga si Juan, nga nagabantala sa bug-os nga duog sa palibot sang Suba Jordan.

Si Juan isa gid ka makahalamuot nga tawo, sa dagway kag sa panghambal. Ang iya panapton bulbol sang kamelyo, kag ang iya balikawang nawagkusan sing panit. Ang iya ginakaon mga apan kag pulot. Kag ang iya mensahe? “Maghinulsol, kay ang ginharian sang mga langit malapit na.”

Ini nga mensahe nagpakunyag sa iya mga manugpalamati. Madamo ang nakarealisar nga dapat sila maghinulsol, kon sayoron, bag-uhon ang ila panimuot kag sikwayon ang ila nagligad nga dalanon sang pagkabuhi subong indi maayo. Gani gikan sa bug-os nga teritoryo sa palibot sang Jordan, kag bisan gani gikan sa Jerusalem, ang katawhan nagkari kay Juan sa daku nga kadamuon, kag ginbawtismuhan niya sila, nga ginatum-oy sila sa idalom sang tubig sang Jordan. Ngaa?

Ginbawtismuhan ni Juan ang mga tawo subong simbulo, ukon pagkilala, sa ila tinagipusuon nga paghinulsol para sa mga sala batok sa Kasuguan nga katipan sang Dios. Sa amo, sang magkadto sa Jordan ang pila ka mga Fariseo kag mga Saduceo, ginkondenar sila ni Juan. “Kamo nga mga kaliwat sang man-ug,” siling niya. “Patubas kamo sing bunga nga takus sa paghinulsol; kag dili kamo magsiling sa inyo kaugalingon, ‘May amay kami nga si Abraham.’ Kay nagasiling ako sa inyo nga ang Dios sarang makabangon sing mga anak kay Abraham sa sining mga bato. Ang wasay napahamtang na sa gamot sang mga kahoy; ang tagsa ka kahoy nga wala nagadala sing maayong bunga ginapulod kag ginadap-ong sa kalayo.”

Bangod sang tanan nga igtalupangod nga ginabaton ni Juan, ang mga Judiyo nagpadala sa iya sing mga saserdote kag mga Levita. Namangkot ini sila: “Sin-o bala ikaw?”

“Indi ako ang Cristo,” tu-ad ni Juan.

“Kon amo, sin-o ka?” pamangkot nila. “Ikaw bala si Elias?”

“Indi,” sabat niya.

“Ikaw bala Ang Manalagna?”

“Indi!”

Gani namilit sila: “Sin-o bala ikaw? agod nga may isabat kami sa mga nagpadala sa amon. Ano bala ang ginasiling mo nahanungod sa imo kaugalingon?”

Si Juan nagpaathag: “Ako amo ang tingog sang isa nga nagasinggit sa kamingawan, ‘Tadlunga ang dalanon ni Jehova,’ subong sang ginsiling ni Isaias nga manalagna.”

“Nian ngaa bala nagabawtismo ka,” luyag nila mahibaluan, “kon indi ikaw ang Cristo ukon si Elias ukon Ang Manalagna?”

“Nagabawtismo ako sa tubig,” sabat niya. “Sa tunga ninyo nagatindog ang isa nga wala ninyo makilala, ang isa nga nagasunod sa akon.”

Ginhanda ni Juan ang dalan agod ipahamtang sa nagakaigo nga kahimtangan ang tagipusuon sang mga tawo sa pagbaton sa Mesias, nga mangin Hari. Tuhoy sa sining Isa, si Juan nagsiling: “Ang isa nga nagasunod sa akon gamhanan pa sa akon, kag indi ako takus sa paghubad sang higot sang iya sandalyas.” Sa kamatuoran, si Juan nagsiling: “Nagasunod sa akon ang isa ka tawo nga nahauna sa akon, kay una sia sa akon.”

Sa amo, ang mensahe ni Juan, “ang ginharian sang mga langit malapit na,” nangin isa ka pahibalo sa publiko nga ang ministeryo sang gintangdo nga Hari ni Jehova, si Jesucristo, malapit na magsugod. Juan 1:6-8, 15-28; Mateo 3:1-12; Lucas 3:1-18; Binuhatan 19:4.

▪ Ano nga sahi sang tawo si Juan?

▪ Ngaa ginbawtismuhan ni Juan ang mga tawo?

▪ Ngaa nasiling ni Juan nga ang Ginharian malapit na?