Kapitulo 2

Ginpadunggan sa Wala Pa Sia Matawo

SA TAPOS ginsugiran ni anghel Gabriel ang dalaga nga si Maria nga sia magaanak sing isa ka lalaki nga mangin hari sa walay katubtuban, si Maria namangkot: “Paano ini matabo, kay wala pa ako bana?”

“Ang balaan nga espiritu magakara sa imo,” paathag ni Gabriel, “kag ang gahom sang Labing Mataas magalandong sa imo. Bangod man sina ang matawo sa imo tawgon nga balaan, ang Anak sang Dios.”

Sa pagbulig kay Maria nga patihan ang iya mensahe, si Gabriel nagpadayon: “Kag, yari karon! si Elisabet nga imo paryente nagpanamkon man sing anak nga lalaki sa iya katigulangon, kag ikan-om nga bulan niya karon, ang gintawag nga baw-as nga babayi; kay sa Dios wala sing bisan ano nga indi mahimo.”

Ginbaton ni Maria ang ginsiling ni Gabriel. Kag ano ang iya ginsabat? “Yari karon! ang ulipon nga babayi ni Jehova!” tuaw niya. “Kabay nga matuman ini sa akon suno sa imo ginsiling.”

Sang wala na si Gabriel, naghanda si Maria kag nagduaw kay Elisabet, nga nagapuyo upod sa iya bana, nga si Zacarias, sa bakulod nga duog sang Judea. Gikan sa puluy-an ni Maria sa Nazaret, isa ini ka malawig nga paglakbay ayhan tatlo ukon apat ka adlaw.

Sang mag-abot si Maria sa balay ni Zacarias, nagsulod sia kag nagtamyaw. Sa sina, si Elisabet napuno sing balaan nga espiritu, kag nagsiling sia kay Maria: “Bulahan ka sa tunga sang mga babayi, kag bulahan ang bunga sang imo tiyan! Kag ngaa bala gintugot sa akon, nga ang iloy sang akon Ginuo magkari sa akon? Kay, yari karon! sang pagkabati ko sang imo pag-abiabi sa akon mga igdulungog, ang bata sa akon tiyan nagkibo sa kalipay.”

Sang mabatian ini, nagsabat si Maria nga may tinagipusuon nga pagpasalamat: “Ang akon kalag nagapakadaku kay Jehova, kag ang akon espiritu nagakalipay sa Dios nga akon Manluluwas; kay nagtamod sia sang kubos nga kahimtangan sang iya ulipon. Kay, yari karon! kutob karon ang tanan nga kaliwatan magatawag sa akon nga malipayon; kay ang gamhanan nga Isa naghimo sa akon sing dalagku nga mga butang.” Apang, walay sapayan sang kahamuot nga ginpakita sa iya, ginpatuhoy ni Maria ang tanan nga kadungganan sa Dios. “Balaan ang iya ngalan,” siling niya, “kag ang iya kaluoy yara sa mga nahadlok sa iya sa mga kaliwatan kag mga kaliwatan.”

Padayon nga gindayaw ni Maria ang Dios sa inspirado nga matagnaon nga ambahanon, nga nagasiling: “Nagpakita sia sing kusog sa iya butkon, ginpaaplaag niya ang mga palabilabihon sa hunahuna sang ila mga tagipusuon. Ginhulog niya ang mga gamhanan gikan sa ila mga trono kag ginbayaw ang mga kubos; ang mga gutom ginbusog niya sing maayo nga mga butang kag ang mga manggaranon ginpahalin niya nga walay dala. Naghatag sia sing bulig sa Israel nga iya alagad, agod nga makadumdom sia sing kaluoy, suno sa ginpamulong niya sa aton mga ginikanan, kay Abraham kag sa iya binhi, tubtob sa walay katubtuban.”

Nagpabilin si Maria upod kay Elisabet sa tatlo ka bulan, kag wala sing duhaduha nga daku sia nga bulig sa tion sining hingapusan nga mga semana sang pagbusong ni Elisabet. Maayo gid nga ining duha ka matutom nga mga babayi, nga lunsay nagadala sing bata sa bulig sang Dios, nag-updanay sa sining ginpakamaayo nga tion sang ila kabuhi!

Natalupangdan bala ninyo ang pagpadungog nga ginpatuhoy kay Jesus bisan sa wala pa sia matawo? Gintawag sia ni Elisabet nga “akon ginuo,” kag ang iya wala pa matawo nga anak nagkibo sa kalipay sang mag-abot si Maria. Sa pihak nga bahin, sang ulihi ang iban wala magpakita sing pagtahod kay Maria kag sa iya malapit na matawo nga anak, subong makita naton. Lucas 1:26-56.

▪ Ano ang ginsiling ni Gabriel agod buligan si Maria sa paghangop kon paano sia magbusong?

▪ Paano ginpadunggan si Jesus sa wala pa sia matawo?

▪ Ano ang ginsiling ni Maria sa isa ka matagnaon nga ambahanon sang pagdayaw sa Dios?

▪ Daw ano kadugay nagpabilin si Maria upod kay Elisabet, kag ngaa nagakaigo nga si Maria magpabilin upod kay Elisabet sa sini nga tion?