Kapitulo 42

Ginsabdong ni Jesus ang mga Fariseo

KON paagi sa gahom ni Satanas nga ginapaguwa niya ang mga demonyo, pangatarungan ni Jesus, nian si Satanas nabahinbahin batok sa iya kaugalingon. “Himua ninyo nga maayo ang kahoy kag ang iya bunga maayo,” padayon niya, “ukon himua ninyo nga malain ang kahoy kag ang iya bunga malain; kay ang kahoy makilala sa iya bunga.”

Binuang silingon nga ang maayong bunga sang pagpaguwa sa mga demonyo resulta sang pag-alagad ni Jesus kay Satanas. Kon ang bunga maayo, indi mahimo nga malain ang kahoy. Sa pihak nga bahin, ang malain nga bunga sang walay pulos nga mga panumbungon kag wala sing sadsaran nga pagpamatok sang mga Fariseo kay Jesus mga pamatuod nga malain sila. “Kamo nga mga kaliwat sang mga man-ug,” tuaw ni Jesus, “paano kamo, nga malaut, makapamulong sing mga butang nga maayo? Kay sa kabuganaan sang tagipusuon nagapamulong ang baba.”

Sanglit ginapakita sang aton mga pulong ang kahimtangan sang aton tagipusuon, ang aton ginasiling amo ang pasaran sang paghukom. “Ako nagasiling sa inyo,” siling ni Jesus, “nga ang tagsa ka pulong nga wala sing pulos nga ipamulong sang mga tawo, magahatag sila sing husay sa sini sa Adlaw sang Paghukom; kay bangod sang imo mga pulong pakamatarungon ka, kag bangod sang imo mga pulong tagudilian ka.”

Walay sapayan sang tanan nga gamhanan nga binuhatan ni Jesus, ang mga escriba kag mga Fariseo nangabay: “Manunudlo, luyag namon magtan-aw sing tanda gikan sa imo.” Bisan pa mahimo nga ining partikular nga mga tawo gikan sa Jerusalem wala sing personal makakita sang iya mga milagro, may yara indi masuay nga pamatuod sang mga nakasaksi sini. Gani ginsilingan ni Jesus ang Judiyong mga lider: “Ang isa ka kaliwatan nga malaut kag makilahion nagapangita sing tanda, apang wala sing tanda nga ihatag sa sini kundi ang tanda ni Jonas nga manalagna.”

Nagapaathag kon ano ang iya buot silingon, si Jesus nagpadayon: “Subong nga si Jonas didto sa tiyan sang isda nga daku sing tatlo ka adlaw kag tatlo ka gab-i, subong man ang Anak sang tawo magapabilin sa alibutod sang duta sing tatlo ka adlaw kag tatlo ka gab-i.” Sa tapos gintulon sang isda, nagguwa si Jonas nga subong bala ginbanhaw sia, gani nagtagna si Jesus nga mapatay sia kag sa ikatlo nga adlaw banhawon sia. Apang, ang Judiyong mga lider, bisan sang mabanhaw si Jesus, nagsikway sa “tanda ni Jonas.”

Sa amo nagsiling si Jesus nga ang mga tawo sang Nineve nga naghinulsol sang magbantala si Jonas magabangon sa paghukom agod kondenahon ang mga Judiyo nga nagsikway kay Jesus. Subong man, gingamit niya nga ilustrasyon ang hara sang Seba, nga nagkari gikan sa kaukbungan sang duta agod mamati sa kaalam ni Solomon kag natingala sa iya nakita kag nabatian. “Apang, yari karon!” siling ni Jesus, “may isa diri nga daku pa kay Solomon.”

Nian naghatag si Jesus sing ilustrasyon tuhoy sa isa ka tawo nga gikan sa iya nagguwa ang isa ka espiritu nga dimatinlo. Apang, wala ginpun-an sang tawo ang bakante sing maayong mga butang, gani ginsudlan sia sing pito pa ka espiritu nga malaut. “Amo man ang mahanabo sa sining malaut nga kaliwatan,” siling ni Jesus. Ang pungsod sang Israel gintinluan kag ginbag-o​—⁠kaangay sang temporaryo nga pagtaliwan sang espiritu nga dimatinlo. Apang ang pagsikway sang pungsod sa mga manalagna sang Dios, nga nagdangat sa ila pagpamatok kay Cristo mismo, nagpahayag sang malaut nga kahimtangan sini nga mas grabe pa sa ginsuguran sini.

Samtang nagahambal si Jesus, nag-abot ang iya iloy kag ang iya mga utod kag nagtindog sa kiliran sang kadam-an. Gani may isa nga nagsiling: “Yari karon! Ang imo iloy kag ang imo mga utod nagatindog sa guwa, nga nagahimulat sa pagpakighambal sa imo.”

“Sin-o ang akon iloy, kag sin-o ang akon mga utod?” pamangkot ni Jesus. Gin-untay niya ang iya kamot nayon sa iya mga disipulo, kag nagsiling: “Yari karon! Ang akon iloy kag ang akon mga utod! Kay ang bisan sin-o nga maghimo sang kabubut-on sang akon Amay nga yara sa langit, sia amo ang akon utod nga lalaki, kag utod nga babayi, kag iloy.” Sa sining paagi ginpakita ni Jesus nga walay sapayan kon daw ano ka suod ang kaangtanan niya sa iya mga paryente, mas suod gihapon ang iya kaangtanan sa iya mga disipulo. Mateo 12:33-50; Marcos 3:31-35; Lucas 8:19-21.

▪ Paano napaslawan ang mga Fariseo sa paghimo sa “kahoy” kag sa “bunga” nga maayo?

▪ Ano ang “tanda ni Jonas,” kag paano ini ginsikway sang ulihi?

▪ Paano ang pungsod sang Israel kaangay sang tawo nga ginguwaan sang espiritu nga dimatinlo?

▪ Paano ginpadaku ni Jesus ang iya suod nga kaangtanan sa iya mga disipulo?