Kapitulo 46

Gintandog Niya ang Iya Panapton

ANG balita tuhoy sa pagbalik ni Jesus gikan sa Decapolis nakalab-ot sa Capernaum, kag daku nga kadam-an ang nagtipon sa baybayon agod abiabihon ang iya pagbalik. Wala sing duhaduha nga nabatian nila kon paano niya ginpatunong ang unos kag gin-ayo ang ginsuuban sang demonyo nga mga tawo. Karon, sang pagdungka niya sa baybayon, nagtipon sila sa palibot niya, nga may kalangkag kag pagpaabot.

Ang isa sa mga nalangkag gid nga makita si Jesus amo si Jairo, ang nagadumala nga opisyal sang sinagoga. Naghapa sia sa tiilan ni Jesus kag nagpakiluoy sing makapila: “Ang akon diutay nga bata nga babayi tagumatayon. Kari ka kag pandungan mo sia sang imo kamot, agod nga mag-ayo sia, kag mabuhi.” Sanglit bugtong sia nga anak niya kag 12 anyos pa lang sia, hamili gid sia kay Jairo.

Nagsugot si Jesus kag, upod sa kadam-an, nagkadto sia sa balay ni Jairo. Mahanduraw naton ang kakunyag sang mga tawo samtang nagapaabot sila sing isa pa ka milagro. Apang ang igtalupangod sang isa ka babayi sa kadam-an nasentro sa iya daku nga problema.

Sa sulod sang 12 ka tuig, ining babayi gintagasan sing dugo. Nagpabulong sia sa lainlain nga doktor kag naubos ang iya kuwarta sa pagpabulong. Apang wala sia mag-ayo; sa baylo naggrabe tapat ang iya palaligban.

Subong mahimo mahangpan mo, luwas sa nagluya gid sia, ang iya balatian makahuluya man. Sa masami ang isa wala nagahambal sa publiko nahanungod sini nga balatian. Dugang pa, sa idalom sang Mosaikong Kasuguan ang pagtagas sang dugo nagahimo sa isa ka babayi nga dimatinlo, kag ang bisan sin-o nga makatandog sa iya ukon sa iya naduguan nga mga panapton dapat manghugas kag mangin dimatinlo tubtob sa gab-i.

Nabatian sang babayi ang mga milagro ni Jesus kag ginpangita niya sia. Bangod sang iya pagkadimatinlo, nag-agi sia sa tunga sang kadam-an sing patago, nga nagasiling sa iya kaugalingon: “Kon matandog ko ang iya panapton magaayo ako.” Sang ginhimo niya ini, sa gilayon nabatyagan niya nga natugon ang pagtagas sang iya dugo!

“Sin-o bala ang nagtandog sa akon?” Nakibot gid sia sa ginsiling ni Jesus! Paano naton mahibal-an? ‘Manunudlo,’ protesta ni Pedro, ‘ginaipit ka sang kadam-an, kag nagasiling ka bala, “Sin-o bala ang nagtandog sa akon?” ’

Sang nagapanghulunghulong sa babayi, si Jesus nagpaathag: “May nagtandog sa akon, kay nahantop ko nga ang gahom nagguwa sa akon.” Sa pagkamatuod, indi yadto ordinaryo nga pagtandog, kay ang pag-ayo nga resulta nagkuha sa kusog ni Jesus.

Sang makita sang babayi nga natalupangdan sia, nagpalapit ang babayi kag naghapa sa atubangan ni Jesus, nga nahadlok kag nagakurog. Sa atubangan sang tanan nga tawo, ginsugid niya ang bug-os nga kamatuoran nahanungod sa iya balatian kag kon paano sia nag-ayo bag-o lang.

Bangod sang iya bug-os nga pagtu-ad, maluluy-on nga ginlipay sia ni Jesus: “Anak, ang imo pagtuo nag-ayo sa imo. Lakat sa paghidait, kag mag-ayo sa imo balatian.” Daw ano katahom mahibal-an nga ang Isa nga ginpili sang Dios sa paggahom sa duta isa ka mahigugmaon kag maluluy-on nga tawo, nga nagaulikid sa katawhan kag may gahom sa pagbulig sa ila! Mateo 9:18-22; Marcos 5:21-34; Lucas 8:40-48; Levitico 15:25-27.

▪ Sin-o si Jairo, kag ngaa nagpalapit sia kay Jesus?

▪ Ano ang problema sang isa ka babayi, kag ngaa ang pagpalapit kay Jesus agod magpabulig tuman kabudlay para sa iya?

▪ Paano nag-ayo ang babayi, kag paano sia ginlipay ni Jesus?