Kapitulo 124

Gintugyan kag Gindala

SANG gintilawan liwat ni Pilato, nga natandog bangod sang mahim-ong nga dignidad sang ginsakit nga si Jesus, nga hilwayon sia, ang punong mga saserdote labi nga naakig. Determinado sila nga indi pagtugutan ang bisan ano nga magbalabag sa ila malaut nga tuyo. Gani ginliwat nila ang ila singgit: “Ilansang sia! Ilansang sia!”

“Dalha ninyo sia kag ilansang sia,” sabat ni Pilato. (Kabaliskaran sa ila nagligad nga mga pangabay, ang mga Judiyo mahimo nga may awtoridad sa pagpatay sa mga kriminal bangod sang relihioso nga mga sala nga may igo nga kabug-aton). Nian, sa ikalima nga beses, gindeklarar ni Pilato si Jesus nga wala sing sala, nga nagasiling: “Wala ako sing nakita nga kasal-anan sa iya.”

Sang nakita sang mga Judiyo nga ang ila politikal nga mga sumbong napaslawan, nagbalik sila sa relihioso nga sumbong sang pasipala nga gingamit nila sang nagligad nga mga oras sang ginbista si Jesus sa atubangan sang Sanhedrin. “Kami may kasuguan,” siling nila, “kag sa sinang kasuguan dapat sia mapatay, bangod nga sia nagpakaanak sang Dios.”

Ining sumbong bag-o kay Pilato, kag hinadlukan sia sing kapin. Narealisar niya karon nga si Jesus indi ordinaryo nga tawo, subong ginpakita sang damgo sang iya asawa kag sang tumalagsahon nga kabakod sa personalidad ni Jesus. Apang “anak sang Dios”? Nahibaluan ni Pilato nga si Jesus naghalin sa Galilea. Apang, mahimo bala nga nagkabuhi sia anay? Ginpabalik sia liwat ni Pilato sa palasyo, kag ginpamangkot: “Diin ka bala maghalin?”

Si Jesus nagpabilin nga hipos. Sang nagligad ginsingganan niya si Pilato nga hari sia, apang nga ang iya Ginharian indi bahin sining kalibutan. Indi na kinahanglan karon ang dugang nga paathag. Apang, nasaklaw ang bugal ni Pilato bangod sang indi niya pagsabat, kag nagsilabo sia kay Jesus paagi sa mga pulong: “Indi ka bala maghambal sa akon? Wala ka bala makahibalo nga ako may gahom sa pagbuhi sa imo kag may gahom sa paglansang sa imo?”

“Ikaw wala kuntani sing gahom sa akon kon wala mahatag ini sa imo gikan sa ibabaw,” sabat ni Jesus sing matinahuron. Ginapatuhuyan niya ang ginhatag sang Dios nga awtoridad sa tawhanon nga mga gumalahom sa pagdumala sang mga hilikuton sa duta. Si Jesus nagdugang: “Busa ang nagtugyan sa akon sa imo may daku pa nga sala.” Sa pagkamatuod, ang mataas nga saserdote nga si Caifas kag ang iya mga kaupdanan kag si Judas Iscariote may mabug-at pa nga salabton sang sa kay Pilato bangod sang dimakatarunganon nga pagtrato kay Jesus.

Labi pa nga natingala kay Jesus kag hinadlukan nga basi si Jesus may balaan nga ginhalinan, ginliwat ni Pilato ang iya mga panikasog nga buhian sia. Apang, ang mga Judiyo nagpamatok kay Pilato. Ginliwat nila ang ila politikal nga sumbong, malimbungon nga nagpahog: “Kon buhian mo ining tawo, indi ka abyan ni Cesar. Ang tagsatagsa nga nagapakahari sa iya kaugalingon nagasumpong kay Cesar.”

Walay sapayan sang mahimo malain nga matabo, gindala liwat ni Pilato si Jesus sa guwa. “Tan-awa! Ang inyo hari!” apelar niya liwat sa ila.

“Dalha sia! Dalha sia! Ilansang sia!”

“Ilansang ko bala ang inyo hari?” desperado nga pamangkot ni Pilato.

Akig ang mga Judiyo sa idalom sang pagginahom sang mga Romano. Sa pagkamatuod, ginatamay nila ang paggahom sang Roma! Apang, sing salimpapaw, ang punong saserdote nagsiling: “Wala kami sing hari kundi si Cesar.”

Nagaulikid sa iya politikal nga posisyon kag reputasyon, ginpasugtan sang ulihi ni Pilato ang wala sing kaluoy nga ginapangayo sang mga Judiyo. Gintugyan niya si Jesus. Gin-uba sang mga soldado ang kunop ni Jesus kag ginpasul-uban sia sang iya mga panapton. Sang gindul-ong si Jesus agod ilansang, ginpapas-an sa iya ang iya kaugalingon nga usok sang pag-antos.

Uluadlaw na diutay sang Biernes, Nisan 14; ayhan manug-udto na. Wala sing tulog si Jesus kutob pa sang Huebes sang kaagahon, kag nag-antos sia sing mabudlay nga mga eksperiensia. Sing halangpunon, naubos sang ulihi ang iya kusog bangod sang kabug-at sang usok. Gani si Simon nga taga-Cirene sang Aprika nga naglabay ginpilit nga magpas-an sini para sa iya. Samtang nagalakat sila, madamo nga katawhan, lakip ang mga babayi, ang nagsunod nga nagahaya kag nagapanalabiton kay Jesus.

Nagbalikid sa mga babayi, si Jesus nagsiling: “Mga babaying anak sang Jerusalem, dili kamo maghibi tungod sa akon. Kundi, maghibi kamo tungod sa inyo kaugalingon kag tungod sa inyo mga anak; kay, yari karon! nagaabot ang mga adlaw nga magasiling sila, ‘Malipayon ang mga baw-as, kag ang mga tiyan nga wala makadala kag ang mga suso nga wala makapasuso!’ . . . Kay kon ginahimo nila ini sa hilaw pa nga kahoy, ano bala ang mahanabo kon laya na ini?”

Ginpatuhuyan ni Jesus ang kahoy sang Judiyong pungsod, nga may diutay pa nga hun-og sang kabuhi sa sini bangod sang presensia ni Jesus kag sang pagluntad sang nagkalabilin nga nagapati sa iya. Apang kon kuhaon ini gikan sa pungsod, ang patay sa espirituwal nga kahoy lamang ang mabilin, huo, ang laya nga organisasyon sang pungsod. O daku gid nga paghibi kon ang Romanong mga hangaway, nga nagaalagad subong mga manugpatay sang Dios, magahapay sa Judiyong pungsod! Juan 19:​6-17; 18:​31; Lucas 23:​24-31; Mateo 27:​31, 32; Marcos 15:​20, 21.

▪ Ano ang ginsumbong sang relihiosong mga lider batok kay Jesus sang ang ila politikal nga sumbong napaslawan?

▪ Ngaa hinadlukan sing kapin si Pilato?

▪ Sin-o ang may daku pa nga sala sa natabo kay Jesus?

▪ Paano nahaylo sang mga saserdote si Pilato nga itugyan si Jesus para patyon?

▪ Ano ang ginsiling ni Jesus sa mga babayi nga naghibi tungod sa iya, kag ano ang buot niya silingon sang ginpatuhuyan niya ang kahoy nga “hilaw” kag “laya”?