Kapitulo 122

Halin kay Pilato Pakadto kay Herodes kag Balik Liwat

BISAN pa wala ginlikom ni Jesus kay Pilato nga sia isa ka hari, ginpaathag niya nga ang iya Ginharian indi isa ka peligro sa Roma. “Ang akon ginharian indi iya sining kalibutan,” siling ni Jesus. “Kon ang akon ginharian iya sining kalibutan, ang akon mga alagad makig-away kuntani agod nga indi ako ikatugyan sa mga Judiyo. Apang, ang akon ginharian indi gikan sa kalibutan.” Busa ginbaton ni Jesus sing makatlo nga may Ginharian sia, bisan pa nga ini indi gikan sa duta.

Apang, si Pilato namangkot pa sa iya: “Ti, kon amo, hari ikaw?” Kon sayoron, hari bala ikaw bisan pa nga ang imo Ginharian indi iya sining kalibutan?

Ginpahibalo ni Jesus si Pilato nga husto ang iya konklusion, sa pagsabat: “Ginasiling mo nga ako hari. Tungod sini natawo ako, kag tungod sini nagkari ako sa kalibutan, agod nga magsaksi ako sa kamatuoran. Ang tagsatagsa nga yara sa kamatuoran nagapamati sang akon tingog.”

Huo, ang katuyuan gid sang pagkabuhi ni Jesus sa duta amo ang pagsaksi sa “kamatuoran,” labi na sa kamatuoran nahanungod sa iya Ginharian. Handa si Jesus nga magmatutom sa sina nga kamatuoran bisan pa magakahulugan ini sang iya kabuhi. Bisan pa nagpamangkot si Pilato: “Ano bala ang kamatuoran?” wala sia maghulat para sa dugang nga paathag. Bastante na ang nabatian niya para magdesisyon.

Nagbalik si Pilato sa kadam-an nga nagahulat sa guwa sang palasyo. Ayhan yara sa tupad niya si Jesus, ginsilingan niya ang puno nga mga saserdote kag ang mga kaupod nila: “Wala ako sing nakita nga kasal-anan sa sini nga tawo.”

Naakig sa desisyon, ang kadam-an nagsugod sa pag-insister: “Ginasugyot niya ang katawhan paagi sa pagpanudlo sa bug-os gid nga Judea, kutob sa Galilea bisan tubtob diri.”

Mahimo nga nakibot si Pilato sa dimakatarunganon nga panatisismo sang mga Judiyo. Gani, samtang padayon nga nagasinggit ang puno nga mga saserdote kag ang mga tigulang, si Pilato nagbalikid kay Jesus kag nagpamangkot: “Wala ka bala nagapamati sa madamo nga butang nga ginasaksi nila batok sa imo?” Apang, si Jesus wala magsabat. Ang kakalma niya sa atubangan sang matigdas nga mga sumbong nagpatingala sing daku kay Pilato.

Sang nahibaluan niya nga si Jesus Galileanhon, si Pilato nakakita sing paagi nga manginluwas sa responsabilidad. Ang manuggahom sang Galilea, si Herodes Antipas (anak ni Herodes nga Daku) yadto sa Jerusalem para sa Paskuwa, gani ginpadala ni Pilato si Jesus sa iya. Sang nagligad, ginpapugutan sing ulo ni Herodes Antipas si Juan Bautista, kag nian hinadlukan si Herodes sang nabalitaan niya ang nahanungod sa milagruso nga mga buhat ni Jesus, nahadlok nga basi si Jesus amo gid si Juan nga ginbanhaw.

Ti, nalipay sing daku si Herodes sa posibilidad nga makita niya si Jesus. Indi bangod nabalaka sia sa kaayuhan ni Jesus ukon nga luyag niya mahibaluan kon bala matuod ukon indi ang sumbong batok sa iya. Sa baylo, luyag lamang niya nga makita si Jesus nga maghimo sing milagro.

Apang, wala ginpasundan ni Jesus si Herodes. Sa katunayan, sang ginpamangkot sia ni Herodes, wala sia magsabat sing bisan ano. Nabang-awan, gin-uligyat ni Herodes kag sang iya mga soldado si Jesus. Ginpasul-uban nila sia sing panapton nga malahalon kag gin-uligyat sia. Nian ginpabalik niya sia kay Pilato. Subong resulta, si Herodes kag si Pilato, nga magkaaway sadto anay, nangin mag-abyanay.

Sang nagbalik si Jesus, gintipon ni Pilato ang puno nga mga saserdote, ang Judiyong mga manuggahom, kag ang katawhan kag nagsiling: “Gindala ninyo sa akon ining tawo subong sang isa nga nagapatalang sang katawhan, kag, yari karon! sang nausisa sia sa atubangan ninyo, ako wala sing nakita nga kasal-anan sa sining tawo sang bisan ano nga mga ginsumbong ninyo batok sa iya. Wala, bisan pa si Herodes, kay ginpabalik niya sia sa akon; kag, yari karon! wala sing ano nga takus sa kamatayon nga nahimo niya. Busa silutan ko sia kag buhian.”

Gani, makaduha nga ginpahayag ni Pilato nga si Jesus wala sing sala. Nalangkag sia nga buhian sia, kay nahibaluan niya nga bangod lamang sa kahisa nga gintugyan sia sa iya sang mga saserdote. Sang gintinguhaan ni Pilato nga buhian si Jesus, nakabaton sia sing isa pa ka makusog nga motibasyon nga himuon ina. Samtang yara sa iya lingkuran nga hukmanan, ang iya asawa nagpasugo sa iya, nga nagasiling: “Indi ka maghilabot sinang tawo nga matarong, kay nag-antos ako karon nga adlaw sing madamo nga butang sa damgo [ayhan halin sa Dios] bangod sa iya.”

Apang, paano buhian ni Pilato ining wala sing sala nga tawo, subong sang nahibaluan niya nga dapat niya himuon? Juan 18:​36-38; Lucas 23:​4-16; Mateo 27:​12-14, 18, 19; 14:​1, 2; Marcos 15:​2-5.

▪ Paano ginsabat ni Jesus ang pamangkot nahanungod sa pagkahari niya?

▪ Ano ang “kamatuoran” nga nahanungod sini ginhinguyang ni Jesus ang iya kabuhi sa duta sa pagpanaksi?

▪ Ano ang desisyon ni Pilato, ano ang reaksion sang mga tawo, kag ano ang ginhimo ni Pilato kay Jesus?

▪ Sin-o si Herodes Antipas, ngaa nalipay sia sing daku nga makita si Jesus, kag ano ang ginhimo niya sa iya?

▪ Ngaa luyag buhian ni Pilato si Jesus?