Kapitulo 131

Hingapusan nga mga Pagpakita, kag Pentecostes 33 C.⁠E.

SA ISA ka tion naghimo si Jesus sing kahimusan nga makigkita sa iya ang tanan sang iya 11 ka apostoles sa isa ka bukid sa Galilea. Ang iban nga mga disipulo mahimo nga ginsugiran man nahanungod sa miting, kag kapin sa 500 ka tawo ang kabilugan nga nagtipon. Daw ano ka makalilipay nga kombension ini sang magpakita si Jesus kag gintudluan sila!

Lakip sa iban nga mga butang, ginpaathag ni Jesus sa daku nga kadam-an nga ginhatag sang Dios sa iya ang tanan nga awtoridad sa langit kag sa duta. “Busa lakat kamo,” sugo niya, “kag himuon nga mga disipulo ang katawhan sang tanan nga pungsod, nga nagabawtismo sa ila sa ngalan sang Amay kag sang Anak kag sang balaan nga espiritu, nga ginatudluan sila sa pagtuman sang tanan nga butang nga ginsugo ko sa inyo.”

Hunahunaa ini! Ang mga lalaki, mga babayi, kag mga kabataan nakabaton tanan sining pareho nga komisyon nga magpakigbahin sa paghimo sing disipulo nga hilikuton. Ang mga manugpamatok magatinguha sa pagpugong sang ila pagbantala kag pagpanudlo, apang ginpalig-on sila ni Jesus: “Yari karon! Ako kaupod ninyo sa tanan nga adlaw tubtob sa katapusan sang sistema sang mga butang.” Si Jesus nagapabilin upod sa iya mga sumulunod paagi sa balaan nga espiritu, sa pagbulig sa ila sa pagtuman sang ila ministeryo.

Nagpakita si Jesus nga buhi sa iya mga disipulo sa sulod sang 40 ka adlaw sa tapos sang iya pagkabanhaw. Sa tion sining mga pagpakita, gintudluan niya sila nahanungod sa Ginharian sang Dios, kag ginpadaku niya kon ano ang ila mga salabton subong mga disipulo niya. Sang isa ka okasyon nagpakita pa gani sia sa iya utod sa iloy nga si Santiago kag nakombinse niya ining indi tumuluo anay nga Sia sa pagkamatuod ang Cristo.

Samtang sa Galilea pa ang mga apostoles, mahimo gid nga ginsugo sila ni Jesus nga magbalik sa Jerusalem. Sang makigkita sia sa ila didto, nagsiling sia sa ila: “Dili kamo maghalin sa Jerusalem, kundi hulata ninyo ang ginsaad sang Amay, nga nabatian ninyo sa akon; kay sa pagkamatuod, si Juan nagbawtismo sa tubig, apang bawtismuhan kamo sa balaan nga espiritu sa indi madugay nga mga adlaw kutob karon.”

Sang ulihi nakigkita liwat si Jesus sa iya mga apostoles kag gintuytuyan sila paguwa sa siudad tubtob sa Betania, nga yara sa sidlangan nga bahin sang Bukid sang mga Olivo. Sing makatilingala, walay sapayan sang tanan nga ginsiling niya nahanungod sa iya pagtaliwan pa langit sa indi madugay, nagpati sila gihapon nga ang iya Ginharian tukuron sa duta. Gani namangkot sila: “Ginuo, ipasag-uli mo bala ang ginharian sang Israel sa sini nga tion?”

Sa baylo nga tadlungon liwat ang ila sayop nga paghangop, si Jesus nagsabat lamang: “Indi inyo ang paghibalo sang mga tion ukon mga dag-on nga ginpat-od sang Amay sa iya kaugalingon nga pagbulut-an.” Nian, sa pagpadaku liwat sang hilikuton nga dapat nila himuon, sia nagsiling: “Makabaton kamo sing gahom kon ang balaan nga espiritu mag-abot sa inyo, kag mangin mga saksi ko kamo sa Jerusalem kag sa bug-os nga Judea kag sa Samaria kag tubtob sa ukbong sang duta.”

Samtang nagatulok pa sila, si Jesus nagsugod sa pagpaibabaw pa langit, kag dayon gintabunan sia sang panganod. Sang mahuklas na niya ang iya undanon nga lawas, nagkayab sia pa langit subong isa ka espiritu nga persona. Samtang ang 11 nagatangla pa gihapon sa langit, may 2 ka tawo nga napanaptan sing maputi nga nagtindog sa luyo nila. Ining nagpakatawo nga mga anghel namangkot: “Mga tawo sang Galilea, ngaa bala nagatindog kamo nga nagatulok sa langit? Ining Jesus nga ginbayaw pa langit gikan sa inyo magabalik sa amo nga paagi subong nga nakita ninyo sia nga nagapalangit.”

Ang paagi sang bag-o lang nga pagtaliwan ni Jesus sa duta wala sing publiko nga ginahod kag ang nakakita lamang amo ang iya matutom nga mga sumulunod. Gani magabalik sia sa amo man nga paagi​—⁠wala sing publiko nga ginahod kag ang iya lamang matutom nga mga sumulunod ang makahantop nga nagbalik sia kag nagsugod sa paggahom sa Ginharian.

Nagdulhog karon ang mga apostoles sa Bukid sang mga Olivo, nagtabok sa Nalupyakan sang Kidron, kag ­nagsulod liwat sa Jerusalem. Nagpabilin sila didto bilang pagtuman sa sugo ni Jesus. Napulo ka adlaw sang ulihi, sa Judiyong Piesta sang Pentecostes 33 C.⁠E., samtang mga 120 sang mga disipulo ang nagatipon sa naibabaw nga hulot sa Jerusalem, hinali nga napuno ang bug-os nga balay sang isa ka gahod nga kaangay sang nagahuyop nga madlos. Nagpahayag ang mga dila nga daw kalayo, kag nagtungtong sa tagsatagsa sa ila nga yadto didto, kag ang mga disipulo nagsugod tanan sa paghambal sing lainlain nga mga hambal. Amo ini ang pagbubo sang balaan nga espiritu nga ginsaad ni Jesus! Mateo 28:​16-20; Lucas 24:​49-52; 1 Corinto 15:​5-7; Binuhatan 1:​3-15; 2:​1-4.

▪ Sin-o ang ginhatagan ni Jesus sing nagapaalam nga mga instruksion sa isa ka bukid sa Galilea, kag ano ining mga instruksion?

▪ Ano nga pagpalig-on ang ginhatag ni Jesus sa iya mga disipulo, kag paano sia magapabilin upod sa ila?

▪ Daw ano kalawig sa tapos sang iya pagkabanhaw si Jesus nagpakita sa iya mga disipulo, kag ano ang iya gintudlo sa ila?

▪ Sa kay sin-o nga tawo, nga mahimo indi pa disipulo antes sang kamatayon ni Jesus, nagpakita si Jesus?

▪ Ano ang duha ka hingapusan nga pagpakigkita ni Jesus sa iya mga apostoles, kag ano ang natabo sa sining mga okasyon?

▪ Paano nga si Jesus magabalik sa amo man nga paagi sang iya pagtaliwan?

▪ Ano ang natabo sang Pentecostes 33 C.⁠E.?