Kapitulo 45

Indi Mahimo nga Disipulo

DAW ano ka makahaladlok nga talan-awon sang magtakas si Jesus! Duha ka mabangis nga lalaki ang nagguwa gikan sa malapit nga patyo kag nagsugata sa iya. Gingamhan sila sang demonyo. Sanglit ang isa sa ila mas mabangis sang sa isa kag madugay na nga napaidalom sa pagkontrol sang yawa, sia ang nangin sentro sang igtalupangod.

Madugay na kaayo nga ining makaluluoy nga tawo nagkabuhi nga hubo sa tunga sang mga lulubngan. Sing dalayon, sa adlaw kag gab-i, nagasinggit sia kag nagapilas sang iya kaugalingon sa mga bato. Tuman sa iya kabangis nga wala sing isa ang maisog sa pag-agi sa sina nga dalan. Gintinguhaan na sia anay nga gapuson, apang ginpamugras niya ang mga kadena kag ginpamugto ang mga salsalon sa iya tiil. Wala sing tawo nga makasarang sa iya.

Sang ang tawo nagdalagan kay Jesus kag nagyaub sa iya tiilan, ang yawa nga nagakontrol sa iya naghimo sa iya nga magsinggit: “Ano bala ang labot mo sa akon, Jesus, nga Anak sang Dios nga Labing Mataas? Ginapakiluoy ko sa imo sa Dios nga indi ako pagsakita.”

“Guwa ka sa tawo, ikaw nga espiritung dimatinlo,” siling ni Jesus. Kag nagpamangkot si Jesus sa iya: “Sin-o bala ang ngalan mo?”

“Si Legion ang akon ngalan, kay madamo kami,” sabat niya. Ang mga demonyo nagaudyak sa pagtan-aw nga nagaantos ang ila ginasudlan, mahimo nga nagakalipay sila sa pagsalakay subong isa ka grupo sa espiritu sang katalaw. Apang sang maatubang nila si Jesus, nakiluoy sila nga indi pagdal-on sa kadadalman. Nakita naton nga si Jesus may daku nga gahom; nadaug niya bisan ang mabangis nga mga demonyo. Nagapakita man ini nga ang mga demonyo nakahibalo nga ang pagtagbong sa ila sa kadadalman kaupod sang ila pangulo, si Satanas nga Yawa, amo ang katapusan nga paghukom sang Dios sa ila.

Isa ka panong sang mga 2,000 ka baboy ang nagapang-ungab sa banglid sa malapit. Gani ang mga demonyo nagsiling: “Ipadala kami sa mga baboy, pasudla kami sa ila.” Sing hayag ang mga yawa may dikinaugali kag mapintas nga kalipay sa pagsulod sa lawas sang undanon nga mga tinuga. Sang gintugutan sila ni Jesus nga magsulod sa mga baboy, ang tanan nga 2,000 sini nagdinaguso sa banglid kag nagkalalumos sila sa dagat.

Sang makita ini sang mga manugsagod sang mga baboy, nagpalagyo sila kag nagbalita sini sa siudad kag sa kaumhan. Bangod sina, nagkadto ang mga tawo agod tan-awon kon ano ang natabo. Sang mag-abot sila, nakita nila ang tawo nga ginguwaan sang mga demonyo. Ti, napanaptan na sia kag sa iya maligdong nga panghunahuna, nagalingkod sa tiilan ni Jesus!

Ginsaysay sang mga nakasaksi kon paano nag-ayo ang tawo. Ginsugid man nila sa katawhan ang nahanungod sa dikinaandan nga pagkapatay sang mga baboy. Sang maba­tian ini sang mga tawo, hinadlukan sila, kag nagpakiluoy kay Jesus nga maghalin sa ila mga duog. Gani nagsakay sia sa sakayan. Ang ginsudlan anay sang demonyo nagpakiluoy sa iya nga mag-upod. Apang ginsilingan sia ni Jesus: “Pauli ka sa imo mga abyan, kag sugiri sila sang tanan nga ginhimo ni Jehova sa imo kag sang iya kaluoy sa imo.”

Sa masami ginasilingan ni Jesus ang mga ginaayo niya nga indi manugid sa iban, bangod indi niya luyag nga ang mga tawo maghinakop pasad sa tumalagsahon nga mga balita. Apang ini nga eksepsion nagakaigo bangod ang ginsudlan anay sang demonyo magapanaksi sa mga tawo nga ayhan indi na mabantalaan ni Jesus. Dugang pa, ang presensia sang tawo magahatag sing pamatuod sa gahom ni Jesus sa paghimo sing maayo, kag magapugong sang indi kalahamut-an nga balita nga mahimo ipalapta bangod sang pagkapatay sang mga baboy.

Nahisuno sa ginsiling ni Jesus, ang ginsudlan anay sang demonyo naglakat. Ginbantala niya sa bug-os nga Decapolis ang tanan nga butang nga ginhimo ni Jesus sa iya, kag natingala ang tanan nga tawo. Mateo 8:28-34; Marcos 5:1-20; Lucas 8:26-39; Bugna 20:1-3.

▪ Ngaa ginsentro ang igtalupangod sa isa ka ginsudlan sang demonyo samtang duha sila ang yara?

▪ Ano ang nagapakita nga nahibaluan sang mga demonyo ang nahanungod sa palaabuton nga pagtagbong sa ila sa kadadalman?

▪ Ngaa luyag sang mga demonyo nga magsulod sa mga tawo kag mga sapat?

▪ Ngaa ginhimo ni Jesus nga eksepsion ang ginsudlan anay sang demonyo, kag nagsugo sa iya nga isugid sa iban kon ano ang ginhimo Niya sa iya?