Kapitulo 40

Isa ka Leksion Tuhoy sa Kaluoy

MAHIMO nga sa Nain pa si Jesus, nga sa diin bag-o lang niya ginbanhaw ang anak nga lalaki sang isa ka babayi nga balo, ukon ayhan nagaduaw sia sa isa ka malapit nga siudad. Ang isa ka Fariseo nga nagahingalan kay Simon naghandum nga makita ang isa nga nagahimo sinang talalupangdon nga mga buhat. Gani gin-agda niya si Jesus nga magkaon upod sa iya.

Gintamod ni Jesus ang okasyon subong isa ka kahigayunan sa pagministro sa mga tawo nga didto sadto, gani ginbaton ni Jesus ang imbitasyon, subong nga ginbaton man niya ang imbitasyon nga magkaon upod sa mga manugsukot sing buhis kag mga makasasala. Apang, sang magsulod sia sa balay ni Simon, wala sia makabaton sing mainayuhon nga igtalupangod nga sa masami ginapakita sa mga bisita.

Ang nakasandalyas nga mga tiil nagainit kag nagahigko bangod sang paglakbay sa yab-ukon nga mga dalan, kag isa ka kinabatasan nga buhat sang pagkamaabiabihon nga hinawan ang mga tiil sang mga bisita sing mabugnaw nga tubig. Apang ang mga tiil ni Jesus wala ginhinawan sang mag-abot sia. Wala man sia ginhalukan bilang pag-abiabi, nga amo ang kinaandan nga paggawi. Kag ang kinabatasan nga lana sang pagkamaabiabihon wala ginhatag para sa iya ulo.

Sa tion sang pagkaon, samtang nagasaliay ang mga bisita sa lamisa, ang isa ka babayi nga wala gin-agda hipos nga nagsulod sa kuwarto. Kilala sia sa siudad subong imoral nga babayi. Mahimo gid nga nabatian niya ang mga panudlo ni Jesus, lakip ang iya imbitasyon para sa ‘tanan nga nabug-atan nga magkari sa iya para sa kapahuwayan.’ Kag bangod natandog sia sang iya nakita kag nabatian, ginpangita niya karon si Jesus.

Nagkadto ang babayi sa likod ni Jesus sa lamisa kag nagluhod sa tiilan niya. Sang magtulo ang iya mga luha sa iya mga tiil, ginpahiran niya ini sang iya buhok. Nagkuha man sia sing pahumot gikan sa iya tibudtibod, kag sa tapos mahalukan ang iya mga tiil, ginhaplasan niya ini sing ihalaplas. Wala maluyagi ni Simon ang iya nakita. “Ining tawo, kon manalagna sia,” pangatarungan niya, “nakahantop kuntani kon sin-o kag kon ano nga sahi sang babayi ang nagatandog sa iya, nga sia isa ka makasasala.”

Nahantop ang iya ginahunahuna, si Jesus nagsiling: “Simon, may isiling ako sa imo.”

“Manunudlo, isiling ina!” sabat niya.

“May duha ka tawo nga nakautang sa isa ka manugpautang,” sugod ni Jesus. “Ang isa nakautang sing lima ka gatos ka denario, apang ang isa kalim-an. Sang wala sila sing ibayad, ginpatawad niya sila nga duha. Busa, sin-o sa ila ang magahigugma sa iya sing labi?”

“Sa akon banta,” siling ni Simon, ayhan may hagyo nga indi pagsapak sa daw wala sing kaangtanan nga pamangkot, “sia nga ginpatawad sing labi.”

“Naghukom ka sing matarong,” siling ni Jesus. Kag nian sang nagliso sa babayi, nagsiling sia kay Simon: “Nakita mo bala ining babayi? Nagsulod ako sa imo balay; wala ka maghatag sa akon sing tubig para sa akon mga tiil. Apang ginbasa sining babayi ang akon mga tiil sang iya mga luha kag ginpahiran sang iya buhok. Wala mo ako paghaluki; apang sia kutob sang tion nga nagsulod ako wala mag-untat sa paghalok sang akon mga tiil. Wala mo paghisui sing lana ang akon ulo; apang ginhaplasan sining babayi ang akon mga tiil sing mahumot nga ihalaplas.”

Sa amo ang babayi naghatag sing tinagipusuon nga paghinulsol sa iya imoral nga nagligad. Gani si Jesus naghinakop, nga nagasiling: “Bangod sini, ang iya mga sala, nga madamo, ginpatawad, kay naghigugma sia sing daku; apang ang ginpatawad sing diutay, nagahigugma sing diutay.”

Wala gid ginapasapayanan ukon ginatugutan ni Jesus ang imoralidad. Sa baylo, ining hitabo nagapahayag sang iya maluluy-on nga paghangop sa mga tawo nga nakahimo sing mga sala sa kabuhi apang dayon nagapamatuod nga ginakasubo nila ini kag gani nagakari kay Cristo para sa kaumpawan. Sa paghatag sing matuod nga kapahuwayan sa babayi, si Jesus nagsiling: “Ginpatawad ang imo mga sala. . . . Ang imo pagtuo nagluwas sa imo; lakat ka sa paghidait.” Lucas 7:36-50; Mateo 11:28-30.

▪ Paano si Jesus ginbaton sang iya tagbalay, nga si Simon?

▪ Sin-o ang nagpangita kay Jesus, kag ngaa?

▪ Ano nga ilustrasyon ang ginhatag ni Jesus, kag paano niya gin-aplikar ini?