Kapitulo 64

Isa ka Leksion Tuhoy sa Pagkamapinatawaron

MAHIMO nga si Jesus didto pa sa isa ka balay sa Capernaum upod sa iya mga disipulo. Ginhambalan niya upod sa ila kon paano husayon ang mga problema sa ulot sang mga kauturan, gani namangkot si Pedro: “Ginuo, makapila bala ang akon utod makasala sa akon kag mapatawad ko sia?” Sanglit ang Judiyong relihioso nga mga manunudlo nagapanugda nga magpatawad tubtob sa makatlo, mahimo nga ginkabig ni Pedro nga maalwan gid ang panugda nga “tubtob sa makapito?”

Apang ang bug-os nga ideya nga isipon ina sayop. Gintadlong ni Jesus si Pedro: “Nagasiling ako sa imo, indi, Tubtob sa makapito, kundi, Tubtob sa kapituan kag pito.” Ginapakita niya nga indi dapat limitehan ang pagpatawad ni Pedro sa iya utod.

Agod ipasalop sa mga disipulo ang ila obligasyon nga mangin mapinatawaron, nagsugid si Jesus sing isa ka ilustrasyon. Nahanungod ini sa hari nga luyag makighusay sa iya mga ulipon nga nakautang sa iya. Ang isa ka ulipon gindala sa atubangan niya nga nakautang sa iya sing daku nga utang nga 60,000,000 ka talanton. Mahimo nga indi niya mabayaran ini. Gani, suno sa paathag ni Jesus, nagmando ang hari nga ibaligya niya ang iya kaugalingon kag ang iya asawa kag ang iya kabataan kag bayaran sia.

Sa amo nga tion naghapa ang ulipon sa tiilan sang iya agalon kag nagpakiluoy: “Angan-angana ako kag bayaran ko ikaw sang tanan.”

Bangod sang kaluoy sa iya, ginpanas sang agalon ang daku nga utang sang ulipon. Apang sa tapos sini, padayon ni Jesus, naglakat ining ulipon kag ginpangita ang pareho niya nga ulipon nga nakautang sa iya sing 100 ka talanton lamang. Ginliab sang tawo ang iya masigkaulipon kag ginkuga sia, nga nagasiling: “Bayari ang utang mo.”

Apang ang masigkaulipon wala sing kuwarta. Gani naghapa sia sa tiilan sang ulipon nga iya nautangan, nga nagapakiluoy: “Angan-angana ako kag bayaran ko ikaw.” Indi kaangay sang iya agalon, ang ulipon indi maluluy-on, kag ginpabilanggo niya ang iya masigkaulipon.

Ti, padayon ni Jesus, ang iban pa nga mga ulipon nga nakakita sang natabo naglakat kag nanugid sa agalon. Akig nga ginpatawag niya ang ulipon. “Malaut nga ulipon,” siling niya, “ginpatawad ko ikaw sa tanan nga nautang mo, sang nagpakiluoy ka sa akon. Indi bala dapat nga ginkaluy-an mo man ang imo masigkaulipon, subong nga ginkaluy-an ko man ikaw?” Sa kaakig, gintugyan sang agalon ang dimaluluy-on nga ulipon sa mga manugbilanggo tubtob nga mabayaran niya ang tanan nga nautang niya.

Nian naghinakop si Jesus: “Sa sini man nga paagi magapakig-angot sa inyo ang akon langitnon nga Amay kon indi kamo magpatawad sing tinagipusuon sa inyo utod.”

Daw ano kaayo nga leksion sa pagkamapinatawaron! Kon ipaanggid sa daku nga utang nga sala nga ginpatawad sa inyo sang Dios, ang bisan anong paglapas nga mahimo makomiter batok sa aton sang isa ka Cristianong utod diutay sa pagkamatuod. Dugang pa, linibolibo ka beses na nga ginpatawad kita ni Jehova nga Dios. Sa masami, indi gani naton matalupangdan ang aton mga sala batok sa iya. Busa, indi bala naton mapatawad ang aton utod sing pila ka beses, bisan pa kon may makatarunganon kita nga kabangdanan sa pagreklamo? Dumduma, subong gintudlo ni Jesus sa Wali sa Bukid, ang Dios ‘magapatawad sa aton sang aton utang, subong nga ginpatawad man naton ang mga nakautang sa aton.’ Mateo 18:21-35; 6:12; Colosas 3:13.

▪ Ano ang nagpahulag kay Pedro nga mamangkot nahanungod sa pagpatawad sa iya utod, kag ngaa mahimo nga kabigon niya nga maalwan ang iya panugda nga magpatawad sing makapito?

▪ Sa anong paagi ang reaksion sang hari sa pakiluoy sang iya ulipon tuhay sa reaksion sang ulipon sa pakiluoy sang iya masigkaulipon?

▪ Ano ang matun-an naton gikan sa ilustrasyon ni Jesus?