Kapitulo 89

Isa ka Misyon sang Kaluoy sa Judea

MGA senemana ang nagligad, sa Piesta sang Dedikasyon sa Jerusalem, gintinguhaan sang mga Judiyo nga patyon si Jesus. Gani naglakbay sia paaminhan, ayhan sa isa ka lugar nga indi malayo gikan sa Dagat sang Galilea.

Sining karon lang, naglakbay sia pabagatnan liwat padulong sa Jerusalem, nga nagabantala sa mga minuro sang Perea, isa ka distrito sa sidlangan sang Suba Jordan. Sa tapos masugid ang ilustrasyon nahanungod sa tawo nga manggaranon kag kay Lazaro, padayon nga gintudluan niya ang iya mga disipulo sang mga butang nga gintudlo niya anay sa ila sa Galilea.

Nagsiling sia, halimbawa, nga mas maayo para sa isa nga “bitayan sa iya liog sing bato nga galingan kag itagbong sia sa dagat” sang sa sandaron niya ang isa sining “mga magamay” sang Dios. Ginpadaku man niya ang pagkakinahanglanon sang pagpatawad, nga nagasiling: “Bisan pa kon makasala [ang isa ka utod] sa imo sing makapito sa isa ka adlaw kag makapito magbalik sia sa imo, nga nagasiling, ‘Nagahinulsol ako,’ patawara sia.”

Sang ang mga disipulo nagpangabay, “Dugangi ang amon pagtuo,” si Jesus nagsabat: “Kon kamo may pagtuo subong sang lamigas sang binhi nga mustasa, makasiling kamo sa sining sicamino, ‘Magabot ka kag matanom ka sa dagat!’ kag magatuman ini sa inyo.” Gani bisan ang diutay nga pagtuo makahimo sing daku.

Masunod, si Jesus nagsugid sing matuodtuod nga hitabo nga nagailustrar sang nagakaigo nga panimuot sang isa ka alagad sang labing gamhanan nga Dios. “Sin-o bala sa inyo nga may ulipon nga nagaarado ukon nagabantay sang karnero,” siling ni Jesus, “nga magasiling sa iya sang nakaabot sia gikan sa uma, ‘Kari ka sa gilayon kag maglingkod sa pagkaon’? Sa baylo, indi bala magasiling sia sa iya, ‘Ihanda ang panihapon ko, kag mag-ilis ka kag mag-alagad sa akon tubtob nga makakaon ako kag makainom, kag sa tapos sini magkaon ka kag mag-inom’? Nagapasalamat bala sia sa ulipon bangod nga naghimo sia sang ginsugo? Subong man kamo, sang nahimo ninyo ang tanan nga ginsugo sa inyo, magsiling kamo, ‘Mga ulipon kami nga walay pulos. Ginhimo lamang namon ang amon katungdanan.’ ” Busa, ang mga alagad sang Dios indi dapat mag­batyag nga nagahimo sila sa Dios sing pabor paagi sa pag-alagad sa iya. Sa baylo, dapat nila pirme dumdumon ang ila pribilehiyo sa pag-alagad sa iya subong ginsaligan nga mga katapo sang iya panimalay.

Mahimo nga nag-abot ang isa ka mensahero wala lamang madugay sa tapos mahatag ni Jesus ining ilustrasyon. Ginpadala sia nanday Maria kag Marta, nga mga utod ni Lazaro, nga nagapuyo sa Betania sang Judea. “Ginuo, tan-awa! ang imo ginahigugma nagamasakit,” siling sang mensahero.

Si Jesus nagsabat: “Ining masakit indi ikamatay, kundi ini tungod sa himaya sang Dios, agod nga ang Anak sang Dios mahimaya paagi sini.” Sa tapos magpabilin sing duha ka adlaw sa kon diin sia, si Jesus nagsiling sa iya mga disipulo: “Makadto kita liwat sa Judea.” Apang, ginpahanumdom nila sia: “Rabbi, bag-o pa lamang ang mga Judiyo magtinguha sa pagbato sa imo, kag makadto ka liwat didto?”

“Indi bala nga may dose ka oras sa isa ka adlaw?” pamangkot ni Jesus sa pagsabat. “Kon ang tawo nagalakat kon adlaw indi sia makasandad, kay makakita sia sang kapawa sining kalibutan. Apang kon ang tawo nagalakat sa gab-i, makasandad sia, kay wala sia sing kapawa.”

Sing hayag ang buot silingon ni Jesus amo nga ang “oras sa isa ka adlaw,” ukon ang tion nga gintugot sang Dios para sa ministeryo ni Jesus sa duta, wala pa matapos kag tubtob nga ginatugot pa, wala sing bisan sin-o nga makahalit sa iya. Dapat niya gamiton sing bug-os ang malip-ot nga tion sang “isa ka adlaw” nga nabilin sa iya, kay pagkatapos sini magaabot ang “gab-i” nga patyon sia sang iya mga kaaway.

Si Jesus nagdugang: “Ang aton abyan nga si Lazaro natulugan, apang makadto ako agod nga pukawon sia sa katulugon.”

Sa paghunahuna nga si Lazaro nagapahuway lang sa katulugon kag isa ini ka positibo nga tanda nga magaayo sia, ang mga disipulo nagsabat: “Ginuo, kon sia natulugan, maumpawan sia.”

Nian ginsilingan sila ni Jesus sing maathag: “Si Lazaro napatay, kag nagakalipay ako bangod sa inyo nga wala ako didto, sa katuyuan nga magtuo kamo. Apang makadto kita sa iya.”

Bisan pa nahibaluan nila nga si Jesus mahimo nga mapatay sa Judea, apang bangod luyag nila nga sakdagon sia, si Tomas nagsiling sa iya mga masigkadisipulo: “Makadto man kita, agod nga manginmatay kita upod sa iya.” Gani bisan pa delikado ang ila kabuhi, gin-updan sang mga disipulo si Jesus sa iya misyon sang kaluoy sa Judea. Lucas 13:​22; 17:​1-10; Juan 10:​22, 31, 40-42; 11:​1-16.

▪ Diin nagbantala si Jesus sining karon lang?

▪ Anong mga panudlo ang ginsulit ni Jesus, kag anong matuodtuod nga hitabo ang ginsugid niya sa paglaragway sa anong punto?

▪ Anong balita ang nabaton ni Jesus, kag ano ang buot niya silingon sang “isa ka adlaw” kag “sa gab-i”?

▪ Ano ang buot silingon ni Tomas sang magsiling sia, ‘Makadto kita agod nga manginmatay kita upod sa iya’?