Kapitulo 79

Isa ka Pungsod nga Nadula, Apang Indi Tanan

WALA madugay sa tapos makighambal si Jesus sa mga nagtipon sa guwa sang balay sang Fariseo, ginsugiran sia sang pila “nahanungod sa mga Galileanhon nga ang ila dugo ginsimbog [sang Romanong gobernador nga si Poncio] Pilato sa mga halad nila.” Mahimo nga ining mga Galileanhon amo ang mga ginpatay sang ang linibolibo ka Judiyo nagprotesta sa paggamit ni Pilato sang kuwarta gikan sa pundo sang templo sa pagtukod sing tubo sang tubig pasulod sa Jerusalem. Ang mga nagapanugid kay Jesus mahimo nga nagapanugda nga ang mga Galileanhon nag-antos sang kalamidad bangod sang ila malaut nga mga buhat.

Apang, gintadlong sila ni Jesus, nga nagapamangkot: “Nagahunahuna bala kamo nga ining mga Galileanhon mga makasasala labaw sa tanan nga Galileanhon bangod nga nag-antos sila sining mga butang? Indi,” sabat ni Jesus. Nian gingamit niya ang hitabo sa pagpaandam sa mga Judiyo: “Kon indi kamo maghinulsol, tanan kamo mapatay man.”

Sa pagpadayon, ginpahanumdom ni Jesus ang isa pa ka lokal nga trahedya, ayhan may kahilabtanan man sa pagtukod sing tubo sang tubig. Nagpamangkot sia: “Ukon yadtong mga napulog-walo nga napukanan sang torre sa Siloe, kag nagpatay sa ila, nagahunahuna bala kamo nga malinapason sila sing labi sa tanan nga tawo nga nagapuyo sa Jerusalem?” Indi, indi bangod sang kalautan sining mga tawo nga napatay sila, siling ni Jesus. Sa baylo, “ang tion kag ang kahigayunan” amo ang may salabton sa sining mga trahedya. Walay sapayan, gingamit liwat ni Jesus ang okasyon sa pagpaandam: “Apang kon indi kamo maghinulsol, tanan kamo mapatay man.”

Nian si Jesus nagpadayon sa paghatag sing nagakaigo nga ilustrasyon, nga nagapaathag: “Ang isa ka tawo may higuera nga natanom sa iya ulubasan, kag nagkadto sia sa pagpangita sing bunga sa sini, kag wala sia sing nakita. Kag nagsiling sia sa manugtatap sang ubas, ‘Yari karon, sa tatlo na ka tuig nagakari ako sa pagpangita sing bunga sa sining higuera, kag wala ako sing nakita. Tapsa ini! Ngaa bala nagasablag pa ini sa duta?’ Kag nagsabat sia sa iya, ‘Ginuo, pabayai ini anay sa sining tuig pa, tubtob nga makutkutan ko ang palibot sini kag mabutangan ko sing abono; kag kon magpatubas ini kutob nian, maayo; apang kon indi, tapson mo ini.’ ”

Tatlo pa ka tuig nga gin­tinguhaan ni Jesus nga palambuon ang pagtuo sa tunga sang Judiyong pungsod. Apang pila ka gatos lamang nga disipulo ang sarang maisip subong bunga sang iya mga pinangabudlayan. Karon, sa sining ikap-at nga tuig sang iya ministeryo, gindugangan niya ang iya mga panikasog, malaragwayon nga nagakutkot kag nagabutang sing abono sa palibot sang Judiyong kahoy nga higuera paagi sa makugi nga pagbantala kag pagpanudlo sa Judea kag Perea. Apang sa wala sing pulos! Ang pungsod wala maghinulsol kag gani nagakabagay nga laglagon. Isa ka nagkalabilin lamang ang nagpamati.

Wala madugay pagkatapos sadto si Jesus nagpanudlo sa sinagoga sa Inugpahuway. Didto nakita niya ang isa ka babayi nga, bangod sang pagtublag sa iya sang demonyo, nagasiuktot sa sulod sang 18 ka tuig. Sing maluluy-on, si Jesus nagsiling sa iya: “Babayi, nahuklasan ka sang imo masakit.” Kag gintakdungan niya sia sang iya mga kamot, kag sa gilayon nagtadlong sia kag naghimaya sa Dios.

Apang, ang punuan sang sinagoga nangakig. “May anom ka adlaw nga dapat ipangabudlay,” protesta niya. “Gani sa ila magkari kamo kag magpaayo, kag dili sa adlaw nga inugpahuway.” Sa amo ginakilala sang opisyal ang gahom ni Jesus sa pag-ayo apang ginkondenar niya ang katawhan nga nagkari sila sa tion nga Inugpahuway agod ayuhon!

“Mga salimpapaw,” sabat ni Jesus, ”wala bala ang tagsatagsa sa inyo nagahubad sa adlaw nga inugpahuway sang iya baka ukon sang iya asno sa pasungan kag nagadala sa iya sa pagpainom? Kag indi bala dapat ining babayi nga anak ni Abraham, nga nagapos ni Satanas sa napulog-walo ka tuig, paghuklasan sining gapos sa adlaw nga inugpahuway?”

Ti, sang pagkabati sini, yadtong mga nagsumpong kay Jesus nahuy-an. Apang, ang kadam-an nagkalipay sa tanan nga mahimayaon nga butang nga nakita nila nga ginhimo ni Jesus. Bangod sini ginsulit ni Jesus ang duha ka matagnaon nga ilustrasyon nahanungod sa Ginharian sang Dios, yadtong ginsugid niya anay gikan sa sakayan sa Dagat sang Galilea mga isa ka tuig sang una. Lucas 13:​1-21; Manugwali 9:​11; Mateo 13:​31-33.

▪ Anong mga trahedya ang ginsambit diri, kag anong leksion ang ginkuha ni Jesus gikan sa sini?

▪ Anong aplikasyon ang mahimo nahanungod sa walay bunga nga kahoy sang higuera, subong man sa mga panikasog nga himuon ini nga magpamunga?

▪ Paano ginakilala sang punuan ang ikasarang ni Jesus sa pagpang-ayo, apang paano ginbuyagyag ni Jesus ang pagkasalimpapaw sang tawo?