Kapitulo 65

Isa ka Sekreto nga Paglakbay sa Jerusalem

TIGRAGAS sang 32 C.⁠E. sadto, kag ang Piesta sang mga Payagpayag malapit na. Halos sa Galilea lamang nagpanghikot si Jesus kutob sang Pentecostes sang 31 C.⁠E., sang gintinguhaan sia nga patyon sang mga Judiyo. Mahimo nga sugod sadto nakaduaw lamang si Jesus sa Jerusalem agod magtambong sa tatlo ka tuigan nga mga piesta sang mga Judiyo.

Ang mga utod ni Jesus nagpangabay sa iya: “Taliwan ka diri kag magkadto sa Judea.” Ang Jerusalem amo ang panguna nga siudad sang Judea kag ang relihioso nga sentro sang bug-os nga pungsod. Ang iya mga utod nangatarungan: “Kay wala sing tawo nga nagapanghikot sa tago kon sia nagatinguha nga makilala sa dayag.”

Bisan pa nga si Santiago, si Simon, si Jose, kag si Judas wala nagapati nga ang ila magulang, nga si Jesus, amo gid ang Mesias, luyag nila nga ipakita niya ang iya milagruso nga gahom sa tanan nga nagtilipon sa piesta. Apang, nahibaluan ni Jesus ang katalagman. “Ang kalibutan indi makadumot sa inyo,” siling niya, “apang nagadumot ini sa akon bangod nga nagapanaksi ako nahanungod sini nga ang iya mga buhat malaut.” Gani ginsilingan ni Jesus ang iya mga utod: “Taklad kamo inyo sa piesta; ako indi pa magtaklad sa sining piesta.”

Ang Piesta sang mga Payagpayag pito ka adlaw nga selebrasyon. Sa ikawalo nga adlaw ginatapos ini paagi sa solemne nga mga hilikuton. Ang piesta nagatanda sang katapusan nga tuig sa pagpanguma kag tion sang daku nga kasadya kag pasalamat. Mga pila ka adlaw sang makataliwan na ang mga utod ni Jesus sa pagtambong upod sa madamo nga manlalakbay, sia kag ang iya mga disipulo naglakat sing sekreto, nga nagapahilayo sa kadam-an. Nag-agi sila sa Samaria, sa baylo sang ginaagihan sang kalabanan nga tawo malapit sa Suba Jordan.

Bangod si Jesus kag ang iya kaupdanan nagakinahanglan sing dalayunan sa Samaria­hanon nga minuro, ginpadala niya sing una ang mga mensahero sa paghimo sing mga paghanda. Apang, ang katawhan indi maluyag nga magpasilabot kay Jesus sang mahibal-an nila nga manugpakadto sia sa Jerusalem. Sing maakigon, si Santiago kag si Juan nagpamangkot: “Ginuo, buot mo bala nga magsugo kami nga manaug ang kalayo gikan sa langit kag sunugon sila?” Ginsaway sila ni Jesus bangod sang pagpanugda sina nga butang, kag naglakbay sila sa pihak nga minuro.

Samtang nagalakat sila sa dalan, ang isa ka escriba nagsiling kay Jesus: “Manunudlo, magasunod ako sa imo bisan diin ka makadto.”

“Ang mga ido nga talunon may mga lungib,” sabat ni Jesus, “apang ang Anak sang tawo wala gid sing olunlan sang iya ulo.” Ginpaathag ni Jesus nga ang escriba magaeksperiensia sing kabudlayan kon mangin sumulunod Niya sia. Kag ginapakita sini nga ang escriba tuman ka bugalon sa pagbaton sini nga pagkabuhi.

Sa isa pa ka tawo, si Jesus nagsiling: “Sunod ka sa akon.”

“Tuguti ako anay sa pagkadto kag sa paglubong sang akon amay,” sabat sang tawo.

“Bayai ang mga patay sa paglubong sang ila kaugalingon nga mga patay,” sabat ni Jesus, “apang lakat ka kag ibantala ang ginharian sang Dios.” Ang amay sang tawo maathag nga wala pa mapatay, kay kon patay na sia, mahimo nga ang iya anak wala diri nga nagapamati kay Jesus. Mahimo nga ang anak nagapangabay sa paghulat tubtob sa tion nga mapatay ang iya amay. Indi sia handa sa pag-una sa Ginharian sang Dios sa iya kabuhi.

Sang magpadayon na sila sa paglakat pakadto sa Jerusalem, ang isa pa gid ka tawo nagsiling kay Jesus: “Masunod ako sa imo, Ginuo; apang tuguti ako anay sa pagpaalam sa mga yara sa akon balay.”

Bilang sabat si Jesus nagsiling: “Wala sing tawo nga nagakapot sa arado kag nagabalikid nga takus sa ginharian sang Dios.” Yadtong mangin mga disipulo ni Jesus dapat maghugod sang ila mga mata sa pag-alagad sa Ginharian. Subong nga ang agi sang arado mahimo nga magtiko kon ang manug-arado wala nagatulok sa unahan sing tadlong, ang bisan sin-o man nga nagabalikid sa sining daan nga sistema sang mga butang masandad sa dalan nga nagapadulong sa dayon nga kabuhi. Juan 7:2-10; Lucas 9:51-62; Mateo 8:19-22.

▪ Sin-o ang mga utod ni Jesus, kag ano ang balatyagon nila sa iya?

▪ Ngaa ang mga Samariahanon indi matinahuron, kag ano ang luyag nga himuon ni Santiago kag ni Juan?

▪ Ano ang tatlo ka paghambalanay ni Jesus sa dalan, kag paano niya ginpadaku ang pagkinahanglan sing nagasakripisyo sa kaugalingon nga pag-alagad?