Kapitulo 25

Kaluoy sa Aruon

SAMTANG ginaduaw ni Jesus kag sang iya apat ka disipulo ang siudad sang Galilea, ang balita nahanungod sa makatilingala nga mga butang nga iya ginhimo naglapnag sa bug-os nga distrito. Ang balita tuhoy sa iya binuhatan naglab-ot sa isa ka siudad diin may isa ka tawo nga may aro. Ginlaragway sia sang manugbulong nga si Lucas subong “nalipos sang aro.” Kon magalala, ining makangilil-ad nga balatian amatjhjhlk-amat nga magaab-ab sang lainlain nga bahin sang lawas. Gani ini nga aruon yara sa makaluluoy nga kahimtangan.

Sang mag-abot si Jesus sa siudad, ginpalapitan sia sang aruon. Suno sa Kasuguan sang Dios, ang aruon dapat maghambal sing abanse, “Dimatinlo ako, dimatinlo!” agod ang iban indi magpalapit kag indi malatnan. Ang aruon naghapa sa duta kag nagpakiluoy kay Jesus: “Ginuo, kon buot mo, magaayo ako.”

Daw ano ka daku ang pagtuo sang tawo kay Jesus! Apang, makaluluoy gid ang iya hitsura bangod sang iya balatian! Ano ang himuon ni Jesus? Ano ang himuon mo? Bangod sang kaluoy, gin-untay ni Jesus ang iya kamot kag gintandog sia, nga nagasiling: “Buot ako. Mag-ayo ka.” Kag sa gilayon ang aro naghalin sa iya.

Luyag mo bala nga mangin hari ang isa nga may kaluoy kasubong sini? Kon paano gintratar ni Jesus ini nga aruon nagahatag sing pasalig nga sa Iya paggahom sa Ginharian, ang tagna sang Biblia matuman: “Magakaluoy sia sa mga imol kag sa mga nawad-an, kag luwason niya ang mga kalag sang mga nawad-an.” Huo, pagatumanon ni Jesus ang handum sang iya tagipusuon nga buligan ang tanan nga nasit-an.

Bisan sang wala pa gin-ayo ang aruon, ang ministeryo ni Jesus nakahatag sing daku nga kalipay sa katawhan. Bilang katumanan sang tagna ni Isaias, ginmanduan karon ni Jesus ang tawo nga nag-ayo: “Indi magsugid kay bisan sin-o nga tawo tuhoy sini.” Ginsilingan niya sia: “Kadto ka kag ipakita ang imo kaugalingon sa saserdote kag maghalad tungod sa imo pag-ayo, suno sa ginsugo ni Moises, nga pagpamatuod sa mga tawo.”

Apang nalipay gid katama ang tawo amo kon ngaa wala niya matago sa iya kaugalingon ang milagro. Naglakat sia kag ginpalapnag niya ang balita bisan diin, nga mahimo gid nagpukaw sang interes kag pag-usisa sang mga tawo amo kon ngaa nga si Jesus wala magpabilin sa isa ka siudad. Sa amo, si Jesus nagpabilin sa masubo nga mga duog diin wala sing nagapuyo, kag ang mga tawo gikan sa tanan nga lugar nagkari sa pagpamati sa iya kag gin-ayo niya ang ila tanan nga balatian. Lucas 5:12-16; Marcos 1:40-45; Mateo 8:2-4; Levitico 13:45; 14:10-13; Salmo 72:13; Isaias 42:1, 2.

▪ Ano ang epekto sang aro, kag ano nga paandam ang ihatag sang aruon?

▪ Paano nakiluoy ang isa ka aruon kay Jesus, kag ano ang matun-an naton gikan sa sabat ni Jesus?

▪ Sa anong paagi wala pagtumana sang gin-ayo nga tawo si Jesus, kag ano ang mga resulta?