Kapitulo 57

Kaluoy sa Nasit-an

SA TAPOS mapakamalaut ang mga Fariseo bangod sang ila makinaugalingon nga mga tradisyon, naglakat si Jesus kaupod ang iya mga disipulo. Wala madugay antes sina, nga ayhan inyo nadumduman, ang iya paninguha nga makapalagyo sa ila agod makapahuway natublag sing makadali sang makita sila sang kadam-an. Karon, upod sa iya mga disipulo, nagkadto sia sa mga rehiyon sang Tiro kag Sidon, madamong kilometro ang kalayuon pa naaminhan. Mahimo nga amo lamang ini ang paglakbay nga ginhimo ni Jesus kaupod ang iya mga disipulo nga lampas sa mga dulunan sang Israel.

Sang makakita sing balay nga madayunan, ginpahibalo niya nga indi niya luyag nga may makahibalo kon diin sila. Apang, bisan sa sining di-Israelinhon nga teritoryo, indi mahimo nga indi sia matalupangdan. Nakita sia sang isa ka Griega, nga natawo diri sa Phoenicia sang Syria kag nagpakiluoy: “Kaluoyi ako, Ginuo, Anak ni David. Ang akon anak nga babayi ginasakit sing tama sang demonyo.” Apang, wala sia magsabat sing isa ka pulong.

Sang ulihi, ginsilingan sang iya mga disipulo si Jesus: “Pahalina sia; kay nagasunudsunod sia sa aton kag nagagahod.” Nagapaathag sang iya rason sa indi pagsapak sa iya, si Jesus nagsiling: “Ako ginpadala para lamang sa nadula nga mga karnero sang panimalay sang Israel.”

Apang, wala mag-untat ang babayi. Ginpalapitan niya si Jesus kag nagyaub sa iya. Nagpakiluoy sia, “Ginuo, tabangi ako!”

Mahimo nga natandog gid ang tagipusuon ni Jesus sa hanuot nga pangabay sang babayi! Apang, ginhambal niya liwat ang iya una nga responsabilidad, ang mag-alagad sa katawhan sang Dios nga Israel. Sa amo man nga tion, ayhan agod tilawan ang iya pagtuo, ginpatalupangod niya ang pagpakalain sang mga Judiyo sa iban nga nasyonalidad, nga nagasiling: “Indi nagakaigo nga kuhaon ang tinapay sang mga anak kag ipilak sa diutay nga mga ido.”

Paagi sa iya maluluy-on nga tono sang tingog kag pangguyahon, pat-od nga ginpakita ni Jesus ang iya mapinalanggaon nga balatyagon sa mga di-Judiyo. Ginpahaganhagan pa gani niya ang pagpaanggid sa mga Gentil sa mga ido paagi sa pagpatuhoy sa ila subong “diutay nga mga ido,” ukon mga totoy. Sa baylo nga masaklaw, nahangpan sang babayi ang pagpatuhoy ni Jesus sa pag-ihig-ihig sang mga Judiyo kag mapainubuson nga nagsiling: “Matuod, Ginuo; walay sapayan ang diutay nga mga ido nagakaon sang mga usik nga nagakahulog sa lamesa sang ila mga agalon.”

“O babayi, pagkadaku sang imo pagtuo,” sabat ni Jesus. “Paghimuon sa imo suno sa imo luyag.” Kag amo gid sina ang natabo! Sang magpauli sia, nakita niya ang iya anak nga babayi sa katre, nga lubos nga nag-ayo.

Halin sa baybayon nga rehiyon sang Sidon, si Jesus kag ang iya mga disipulo nagkadto sa lugar padulong sa Suba sang Jordan. Gintabok nila ang Jordan didto ayon sa Dagat sang Galilea kag naglatas sa rehiyon sang Decapolis sa nasidlangan sang dagat. Didto nagtaklad sila sa bukid, apang nakita sila sang kadam-an kag gindala kay Jesus ang ila mga piang, mga pingkaw, mga bulag, kag mga apa, kag madamo pa nga balatianon kag may sablag. Naghapa sila sa tiilan ni Jesus, kag gin-ayo niya sila. Natingala ang katawhan, sang nakita nila ang apa nga nagahambal, ang piang nga nagalakat, kag ang bulag nga nakakita; kag gindayaw nila ang Dios sang Israel.

Pinasahi nga gintalupangod ni Jesus ang isa ka tawo nga bungol kag halos indi makahambal. Ang bungol masunson nga madali mahuy-an, labi na sa isa ka kadam-an. Ayhan natalupangdan ni Jesus ang pagkanerbioso sini nga tawo. Gani maluluy-on nga gindala sia ni Jesus malayo sa kadam-an. Sang silahanon na lang, ginsugid ni Jesus kon ano ang himuon niya sa iya. Gingulo niya ang iya mga tudlo sa mga dulunggan sang tawo kag, nagdupla sia, kag gintandog ang iya dila. Nian, nagahangad sa langit, si Jesus nanghakroy kag nagsiling: “Magbukas ka.” Kag nag-anting ang iya mga igdulungog, kag nakahambal sia sing maathag.

Sang ginhimo ni Jesus ining madamo nga pagpang-ayo, nag-apresyar ang kadam-an. Nagsiling sila: “Nahimo niya sing maayo ang tanan nga butang. Ginahimo niya nga makabati ang bungol kag makahambal ang apa.” Mateo 15:21-31; Marcos 7:​24⁠-⁠37.

▪ Ngaa wala dayon pag-ayuha ni Jesus ang anak sang Griega?

▪ Pagkatapos sadto, diin gindala ni Jesus ang iya mga disipulo?

▪ Paano gin-ayo sing maluluy-on ni Jesus ang bungol nga tawo nga halos indi makahambal?