Kapitulo 38

Kulang Bala sing Pagtuo si Juan?

SI Juan Bautista, nga mga isa ka tuig na nga bilanggo karon, nakabaton sing report nahanungod sa pagkabanhaw sang anak nga lalaki sang babayi nga balo sa Nain. Apang luyag ni Juan nga makabati sing direkta gikan kay Jesus tuhoy sini, gani ginpadala niya ang duha sang iya mga disipulo agod mamangkot: “Ikaw bala ang Manugpakari ukon magahulat pa kami sing lain?”

Daw makatilingala ini nga pamangkot, labi na nga nakita ni Juan ang espiritu sang Dios nga nagkunsad kay Jesus kag nabatian ang tingog sang pagkahamuot sang Dios sang ginbawtismuhan niya si Jesus halos duha ka tuig na ang nagligad. Bangod sang pamangkot, mahimo nga maghinakop ang iban nga nagluya ang pagtuo ni Juan. Apang indi subong sini. Si Jesus indi magadayaw kay Juan, subong sang ginhimo niya sa sining okasyon, kon nagaduhaduha na si Juan. Ngaa, nian, namangkot sini si Juan?

Luyag lamang ni Juan nga batunon ni Jesus nga Sia gid ang Mesias. Makapalig-on gid ini kay Juan samtang yara sia sa bilangguan. Apang mahimo nga may kahulugan pa ang pamangkot ni Juan. Maathag nga luyag niya mahibaluan kon bala may lain pa nga manug-abot, isa ka halili, nga magakompleto sang katumanan sang tanan nga butang nga gintagna nga tumanon sang Mesias.

Suno sa mga tagna sang Biblia nga nahibaluan gid ni Juan, ang Hinaplas sang Dios mangin hari kag manluluwas. Apang bilanggo gihapon si Juan, sa sulod sang madamo nga binulan sa tapos sang bawtismo ni Jesus. Gani mahimo nga ginpamangkot ni Juan si Jesus: ‘Ikaw gid bala ang magatukod sang Ginharian sang Dios paagi sa kitaon nga gahom, ukon may yara bala lain pa, isa ka halili, nga hulaton namon sa pagtuman sang tanan nga matahom nga mga tagna nga may kaangtanan sa himaya sang Mesias?’

Sa baylo nga sugiran ang mga disipulo ni Juan, ‘Sa pagkamatuod ako ang manug-abot!’ sadto gid nga oras si Jesus nagpakita sing talalupangdon nga pasundayag paagi sa pag-ayo sa madamo nga tawo, nga ginabulong ang tanan nga sahi sang masakit kag balatian. Nian ginsilingan niya ang mga disipulo: “Lakat kag sugiri ninyo si Juan sang inyo nakita kag nabatian: ang mga bulag nagabaton sang ila itululok, ang mga piang nagalakat, ang mga aruon nagaayo, ang mga bungol nakabati, ang mga patay nagakabanhaw, sa mga imol ginawali ang maayong balita.”

Sa iban nga pulong, ang pamangkot ni Juan mahimo naga­pahangop nga si Jesus ginpaabot sa paghimo sing kapin sa iya ginahimo kag ayhan hilwayon si Juan. Apang, ginsilingan ni Jesus si Juan nga indi magpaabot sing kapin pa sa mga milagro nga ginahimo ni Jesus.

Sang makalakat ang mga disipulo ni Juan, si Jesus nagliso sa kadam-an kag ginsugiran sila nga si Juan amo ang “mensahero” ni Jehova nga gintagna sa Malaquias 3:​1 kag sia man si manalagna Eliseo nga gintagna sa Malaquias 4:​5, 6. Sa amo gindayaw niya si Juan subong katupong sang bisan sin-o nga manalagna nga nauna sa iya, nga nagapaathag: “Sa pagkamatuod nagasiling ako sa inyo, Sa mga nagkalatawo sa mga babayi wala sing naglutaw nga daku pa kay Juan Bautista; apang ang labing diutay sa ginharian sang langit daku pa sa iya. Apang kutob sa mga adlaw ni Juan Bautista tubtob karon ang ginharian sang langit amo ang tulumuron nga ginapanikasugan gid sang mga tawo.”

Ginapakita diri ni Jesus nga si Juan indi makasulod sa langitnon nga Ginharian, kay ang labing diutay didto daku pa kay Juan. Ginhanda ni Juan ang dalan para kay Jesus apang napatay sia sa wala pa mapat-inan ni Cristo ang katipan, ukon kasugtanan, upod sa iya mga disipulo, agod sila mangin kaupod nga mga manuggahom niya sa iya Ginharian. Amo kon ngaa si Jesus nagsiling nga si Juan indi makasulod sa langitnon nga Ginharian. Si Juan, sa baylo, mangin dutan-on nga sakop sang Ginharian sang Dios. Lucas 7:18-30; Mateo 11:2-15.

▪ Ngaa namangkot si Juan kon bala si Jesus ang Manug-abot ukon may hulaton pa nga lain?

▪ Anong mga tagna ang ginsiling ni Jesus nga natuman ni Juan?

▪ Ngaa indi makaupod ni Jesus si Juan Bautista sa langit?