Kapitulo 55

Madamong Disipulo ang Nag-untat sa Pagsunod kay Jesus

SI Jesus nagatudlo sa sinagoga sang Capernaum nahanungod sa iya bahin subong ang matuod nga tinapay halin sa langit. Maathag nga ang iya pamulongpulong kasugpon sang paghambalanay nga ginsugdan sang mga tawo sang makita nila sia sang pagbalik nila gikan sa nasidlangan nga bahin sang Dagat sang Galilea, diin nagkaon sila gikan sa gin-aman sing milagruso nga mga tinapay kag mga isda.

Ginpadayon ni Jesus ang iya komento, nga nagasiling: “Ang tinapay nga akon ihatag tungod sa kabuhi sang kalibutan amo ang akon unod.” Duha ka tuig antes sina, sang tigpamulak sang 30 C.⁠E., ginsilingan ni Jesus si Nicodemo nga ginhigugma gid sang Dios ang kalibutan sa bagay nga ginhatag niya ang iya Anak subong Manluluwas. Busa, ginapakita karon ni Jesus nga ang bisan sin-o nga tawo nga magakaon sing simbuliko sang iya unod, paagi sa pagtuo sa halad nga pagahimuon niya sa dili madugay, magabaton sing kabuhi nga wala sing katapusan.

Apang, nasandad ang mga tawo sa ginsiling ni Jesus. “Paano bala nga paghatag sining tawo sa aton sang iya unod nga kaunon?” pamangkot nila. Luyag ni Jesus nga mahangpan sang iya mga tagpalamati nga ang pagkaon sang iya unod pagahimuon sa malaragwayon nga paagi. Gani, agod ipadaku ini, may ginsiling sia nga labi pa gid nga indi mabaton kon hangpon sa literal nga paagi.

“Kon indi kamo magkaon sang unod sang Anak sang tawo kag mag-inom sang iya dugo,” siling ni Jesus, “wala kamo sing kabuhi sa inyo kaugalingon. Ang nagakaon sang akon unod kag nagainom sang akon dugo may kabuhi nga wala sing katapusan, kag banhawon ko sia sa katapusan nga adlaw; kay ang akon unod kalan-on gid, kag ang akon dugo ilimnon gid. Ang nagakaon sang akon unod kag nagainom sang akon dugo nagapabilin sa akon, kag ako sa iya.”

Matuod, makangilil-ad gid ang panudlo ni Jesus kon kanibalismo ang ginapahangop niya. Apang, sa pagkamatuod, indi ang literal nga pagkaon sang unod ukon pag-inom sang dugo ang ginapahangop diri ni Jesus. Ginapadaku lamang niya nga ang tanan nga magabaton sang kabuhi nga walay katapusan dapat magtuo sa halad nga pagahimuon niya kon ihatag niya ang iya himpit tawhanon nga lawas kag ibubo ang iya dugo. Apang, bisan ang madamo niya nga mga disipulo wala magpanikasog nga mahangpan ang iya panudlo kag gani nagbais: “Makahaladlok ini nga pululungon; sin-o bala ang makapamati sini?”

Sang mahibal-an nga madamo sang iya mga disipulo ang nagakumod, si Jesus nagsiling: “Nagapasandad bala ini sa inyo? Nian ano bala kon makita ninyo ang Anak sang tawo nga nagakayab sa diin sia sadto anay? . . . Ang mga pulong nga napamulong ko sa inyo amo ang espiritu kag kabuhi. Apang may iban sa inyo nga wala nagatuo.”

Si Jesus nagpadayon: “Bangod sini nagsiling ako sa inyo, Walay tawo nga makakari sa akon kon indi natugut sa iya sang Amay.” Bangod sina, madamo sang iya mga disipulo ang naglakat kag wala na magsunod sa iya. Gani ginbalikid ni Jesus ang iya 12 ka apostoles kag nagpamangkot: “Buot man bala kamo maghalin?”

Si Pedro nagsabat: “Ginuo, kay sin-o bala kami makadto? Ikaw may mga pulong sang kabuhi nga walay katapusan; kag kami nagatuo kag nagakilala nga ikaw ang Balaan sang Dios.” Daw ano katahom nga pagpakita sing katutom, bisan pa nga ayhan wala mahangpi sing bug-os ni Pedro kag sang iban nga mga apostoles ang kahulugan sang panudlo ni Jesus tuhoy sini nga butang!

Bisan pa nga nahamuot sa ginsabat ni Pedro, si Jesus nagsiling: “Wala bala ako magpili sa inyo nga napulog-duha? Apang, ang isa sa inyo manugpasipala.” Nagpamulong sia nahanungod kay Judas Iscariote. Ayhan sa sini nga punto namutikan ni Jesus kay Judas ang “ginsuguran,” ukon ang umpisa, sang sayop nga dalanon.

Bag-o lang ginpaslaw ni Jesus ang mga tawo sa ila pagpamilit nga himuon sia nga hari, kag mahimo nangatarungan sila, ‘Paano sia mangin ang Mesias kon indi niya pagkuhaon ang matarong nga posisyon sang Mesias?’ Ini, man, butang nga preska pa sa hunahuna sang mga tawo. Juan 6:51-71; 3:16.

▪ Kay sin-o ginahatag ni Jesus ang iya unod, kag paano nila ‘kaunon ang iya unod’?

▪ Ano ang dugang nga pinamulong ni Jesus nga nagpakibot sa mga tawo, apang ano ang iya ginapadaku?

▪ Sang madamo ang nag-untat sa pagsunod kay Jesus, ano ang ginsabat ni Pedro?