Kapitulo 87

Maghanda Para sa Palaabuton Paagi sa Praktikal nga Kaalam

BAG-O lang matapos ni Jesus ang pagsugid sang sugilanon tuhoy sa buhaha nga anak sa isa ka kadam-an nga nagalakip sa iya mga disipulo, dibunayag nga mga manugsukot sing buhis kag iban pa nga kilala nga mga makasasala, kag mga escriba kag mga Fariseo. Karon, sa iya mga disipulo, nagsugid sia sing isa ka paanggiran tuhoy sa isa ka manggaranon nga tawo nga nakabaton sing indi maayo nga report nahanungod sa iya enkargado, ukon tulugyanan.

Suno kay Jesus, ginpatawag sang manggaranon nga tawo ang iya tulugyanan kag ginsingganan sia nga pahalinon sia. “Ano ang himuon ko, kay kuhaon sa akon sang akon agalon ang pagkatinugyanan?” palibog sang tulugyanan. “Wala ako sing kusog sa pagkutkot, kag nahuya ako magpakilimos. A! nahibaluan ko na kon ano ang akon himuon, agod nga, kon kuhaon ako sa pagkatinugyanan batunon ako sang katawhan sa ila mga balay.”

Ano ang plano sang tu­lugyanan? Ginpatawag niya ang mga may utang sa iya agalon. “Pila ang utang mo,” pamangkot niya.

Ang una nag­sabat, ‘2,­200 ka litro nga lana sang olibo.’

‘Kuhaa ang imo listahan kag lingkod ka kag isulat nga 1,100 lang,’ siling niya sa iya.

Ginpamangkot niya ang isa pa: ‘Kag ikaw, pila ang utang mo?’

Sia nagsiling, ‘22,000 ka litro sang trigo.’

‘Kuhaa ang imo listahan kag isulat 18,000 lang.’

May kinamatarong pa ang tulugyanan nga buhinan ang mga pautang sang iya agalon, kay sia pa ang nagadumala sang pinansial nga mga butang sang iya agalon. Paagi sa pagbuhin sang mga utang, nagpakig-abyan sia sa mga tawo nga makabalos sa iya kon madula niya ang iya obra.

Sang mabatian sang agalon ang natabo, nahamuot sia. Sa kamatuoran, iya ‘gindayaw ang tulugyanan, bisan pa dimatarong, bangod naghikot sia nga may praktikal nga kaalam.’ Sa pagkamatuod, si Jesus nagdugang: “Ang mga anak sining kalibutan maalam pa sa mga anak sang kapawa sa praktikal nga paagi sa ila kaliwatan.”

Karon, sa pagpatalupangod sang leksion para sa iya mga disipulo, si Jesus nagpalig-on: “Maghimo kamo sing mga abyan paagi sa manggad nga dimatarong, agod nga kon madula ini mabaton nila kamo sa mga puluy-an nga walay katapusan.”

Wala gindayaw ni Jesus ang tulugyanan bangod sang iya pagkadimatarong kundi bangod sang iya maayo nga panan-aw sa palaabuton, kag praktikal nga kaalam. Sa masami tuso nga ginagamit sang “mga anak sining sistema sang mga butang” ang ila manggad ukon posisyon sa pagpakig-abyan sa mga tawo nga makabalos sa ila. Gani, dapat man gamiton sang mga alagad sang Dios, “ang mga anak sang kapawa,” ang ila materyal nga mga pagkabutang, ang ila “mga manggad nga dimatarong,” sa isa ka maalamon nga paagi agod makapulos sila.

Apang subong ginsiling ni Jesus, dapat sila maghimo sing mga abyan paagi sa sining mga manggad sa mga makabaton sa ila “sa mga puluy-an nga walay katapusan.” Para sa mga katapo sang diutay nga panong, ining mga duog yadto sa langit; para sa “iban nga mga karnero,” yari ini sa Paraiso nga duta. Sanglit si Jehova nga Dios kag ang iya Anak lamang ang makabaton sa mga tawo sa sining mga duog, dapat kita magmaukod sa pagpalambo sang pagpakig-abyan sa ila paagi sa paggamit sang aton bisan ano nga “mga manggad nga dimatarong” sa pagsakdag sa mga interes sang Ginharian. Nian, kon mapaslawan ukon madula ang materyal nga mga manggad, subong amo gid ang matabo, ang aton walay katapusan nga palaabuton masigurado.

Nagpadayon sa pagsiling si Jesus nga ang mga tawo nga matutom sa pag-atipan sining materyal, ukon kubos, nga mga butang mangin matutom man sa pag-atipan sa kapin ka importante nga mga butang. “Busa,” padayon niya, “kon wala kamo magmatutom sa manggad nga dimatarong, sin-o ang magatugyan sa inyo sang manggad nga matuod [kon sayoron, espirituwal, ukon para sa Ginharian, nga mga interes]? Kag kon wala kamo magmatutom sa iya sang iban [ang mga interes sang Ginharian nga gintulin sang Dios sa iya mga alagad], sin-o ang magahatag sa inyo sang inyo kaugalingon [ang padya nga kabuhi sa walay katapusan nga mga puluy-an]?”

Indi kita mahimo mangin matuod nga mga alagad sang Dios kag sa amo man nga tion mangin mga ulipon sang dimatarong nga mga manggad, materyal nga mga manggad, kay si Jesus naghinakop: “Wala sing suluguon nga makaalagad sa duha ka agalon; kay magadumot sia sa isa kag magahigugma sa isa, ukon magadampig sia sa isa kag magatamay sa isa. Indi kamo makaalagad sa Dios kag sa manggad.” Lucas 15:​1, 2; 16:​1-13; Juan 10:⁠16.

▪ Paano ang tulugyanan sa paanggiran ni Jesus naghimo sing mga abyan sa mga makabulig sa iya sa ulihi?

▪ Ano ang “mga manggad nga dimatarong,” kag paano kita makahimo sing mga abyan paagi sa ila?

▪ Sin-o ang makabaton sa aton “sa mga puluy-an nga walay katapusan,” kag ano ining mga duog?