Kapitulo 126

“Matuod Gid nga Ini Anak sang Dios”

WALA pa dugay sa usok si Jesus sang matabo sang udto ang makatalanhaga nga tatlo ka oras nga kadulom. Indi ini solar nga eklipse, bangod nagakatabo lamang ini sa lati, kag ugsad ang bulan sa tion sang Paskuwa. Isa pa, ang solar nga eklipse nagalawig sing pila lamang ka minuto. Gani ang kadulom naghalin sa Dios! Ayhan nagpahunahuna ini sa mga nagyaguta kay Jesus, kag nagpauntat pa gani sang ila mga pag-uligyat.

Kon ining kahagnok natabo antes ginsaway sang malaut ang iya kaupod kag nangabay kay Jesus nga dumdumon sia, mahimo nga mangin kabangdanan ini sang iya paghinulsol. Mahimo nga sang madulom ang apat ka babayi, nga amo, ang iloy ni Jesus kag ang iya utod nga si Salome, si Maria Magdalena, kag si Maria nga iloy ni apostol Santiago nga Bataon Pa nagpalapit sa usok sang pag-antos. Kaupod man nila si Juan, ang hinigugma nga apostol ni Jesus.

Daw ‘ginpalapsan sing espada’ ang tagipusuon sang iloy ni Jesus samtang gintan-aw niya ang anak nga ginbatiti kag ginpadaku niya nga nagakabit didto sa kasakit! Apang, wala ginhunahuna ni Jesus ang iya kaugalingon nga kasakit, kundi ang kaayuhan sang iya iloy. Upod ang daku nga panikasog, nagliso sia kay Juan kag nagsiling sa iya iloy: “Babayi, yara karon! Ang imo anak!” Nian, nagliso kay Maria, nagsiling sia kay Juan: “Yara karon! Ang imo iloy!”

Busa gintugyan ni Jesus ang pag-atipan sa iya iloy, nga karon isa na ka balo, sa iya hinigugma katama nga apostol. Ginhimo niya ini bangod ang iban nga mga anak ni Maria wala pa magtuo sa iya. Busa naghatag sia sing maayo nga halimbawa sang pag-aman indi lamang para sa pisikal nga mga kinahanglanon sang iya iloy kundi para man sa iya espirituwal nga mga kinahanglanon.

Sang mga alas tres sang hapon, si Jesus nagsiling: “Ginauhaw ako.” Nabatyagan ni Jesus nga ginkuha na sang iya Amay ang pag-amlig sa iya agod matilawan sing bug-os ang iya integridad. Gani nagsinggit sia sa mabaskog nga tingog: “Dios ko, Dios ko, ngaa ginpatumbayaan mo ako?” Pagkabati sini, ang iban nga nagtindog didto nagsiling: “Tan-awa! Nagatawag sia kay Elias.” Sa gilayon nagdalagan ang isa sa ila kag, paagi sa espongha nga may langgaw nga natakod sa punta sang tabun-ak, ginpainom niya sia. Apang ang iban nagsiling: “Pabayai sia! Tan-awon ta kon makari si Elias sa pagluwas sa iya.”

Sang si Jesus nakabaton sang langgaw, nagsiling sia: “Natuman na!” Huo, gintapos niya ang tanan nga ginpahimo sa iya sang iya Amay sa duta. Sang ulihi, sia nagsiling: “Amay, sa imo mga kamot ginatugyan ko ang akon espiritu.” Gani gintugyan ni Jesus sa Dios ang iya puwersa sang kabuhi nagasalig nga ipasag-uli ini liwat sang Dios sa iya. Nian ginduko niya ang iya ulo kag napatay.

Sang nahun-os ang ginhawa ni Jesus, ang duta nagtay-ug, kag naglitik ang mga igang. Tuman gid kabaskog ang linog sa bagay nga ang mga lulubngan sa guwa sang Jerusalem nagbukas kag ang mga bangkay nagguwa. Sang nakita sang mga naglabay nga nagguwa ang mga bangkay, nagsulod sila sa siudad kag ginbalita ini.

Dugang pa, sang napatay si Jesus, ang kumbong nga nagatunga sang Balaan gikan sa Labing Balaan sa templo sang Dios napihak, kutob sa ibabaw tubtob sa idalom. Ayhan ining napunihan sing matahom nga kumbong mga 18 metros kataas kag tuman kabug-at! Ang makatilingala nga milagro wala lamang nagapakita sang kasingkal sang Dios batok sa mga manugpatay sang Iya Anak kundi nagapakita man nga ang pagsulod sa Labing Balaan, ang langit mismo, ginpaposible na karon bangod sang kamatayon ni Jesus.

Ti, sang nabatyagan sang mga tawo ang linog kag nakita ang mga butang nga nagkalatabo, hinadlukan sila. Ang kapitan nga nagdumala sa pagpatay naghimaya sa Dios. “Matuod gid nga ini Anak sang Dios,” siling niya. Ayhan didto sia sang ginhambalan ang pangangkon sang pagkaanak sang Dios sa tion nga ginbista si Jesus sa atubangan ni Pilato. Kag karon kombinsido sia nga si Jesus Anak sang Dios, huo, nga sia gid ang labing daku nga tawo nga nabuhi.

Hinadlukan man ang iban bangod sining milagruso nga mga hitabo, kag nagpauli sila nga nagpamukpok sang ila mga dughan, tanda sang ila daku nga kasubo kag kahuya. Madamong kababayin-an nga mga disipulo nga natandog sing tudok sining importante nga mga hitabo ang nagatan-aw sa malayo. Yara man si apostol Juan. Mateo 27:​45-56; Marcos 15:​33-41; Lucas 23:​44-49; 2:​34, 35; Juan 19:​25-30.

▪ Ngaa indi solar nga eklipse ang kabangdanan sang tatlo ka oras nga kadulom?

▪ Antes sang iya kamatayon, anong maayo nga halimbawa ang ginhatag ni Jesus para sa mga may tigulang nga mga ginikanan?

▪ Ano ang apat ka katapusan nga pinamulong ni Jesus antes sia napatay?

▪ Ano ang nahimo sang linog, kag ano ang kahulugan sang pagkapihak sang kumbong sa templo?

▪ Paano naapektohan sang mga milagro ang kapitan nga nagdumala sang pagpatay?