Kapitulo 95

Mga Leksion sa Diborsio kag sa Gugma sa Kabataan

SI Jesus kag ang iya mga disipulo manugpakadto sa Jerusalem sa pagtambong sa Paskuwa sang 33 C.⁠E. Nagtabok sila sa Suba Jordan kag nag-agi sa distrito sang Perea. Mga pila ka semana ang nagligad yari diri sa Perea si Jesus, apang ginpatawag sia sa pagkadto sa Judea bangod ang iya abyan nga si Lazaro nagmasakit. Samtang didto anay sa Perea, si Jesus nakighambal sa mga Fariseo nahanungod sa diborsio, kag karon ginpautwas nila liwat ang nahanungod sini.

Sa tunga sang mga Fariseo may madamong opinyon nahanu­ngod sa diborsio. Si Moises nagsiling nga ang babayi mahimo bulagan bangod sang ‘butang nga makahuluya sa iya.’ Ang iban nagpati nga nagapatuhoy lamang ini sa pagkadiputli. Apang ginakabig sang iban ang “butang nga makahuluya” nga nagalakip sang magagmay kaayo nga mga sala. Gani, sa pagtilaw kay Jesus, ang Fariseo namangkot: “Tugot bala sa isa ka tawo ang pagsikway sang iya asawa sa bisan anong kabangdanan?” Nagasalig sila nga bisan ano man ang isabat ni Jesus mabudlayan sia sa mga Fariseo nga lain ang opinyon.

Malantipon nga ginsabat ni Jesus ang pamangkot, nga wala ginapasundan ang bisan anong opinyon sang tawo, kundi ginpatuhuyan niya ang orihinal nga katuyuan sang pag-asawahay. “Wala bala ninyo mabasahi,” pamangkot niya, “nga ang nagbuhat sa ila sa ginsuguran nagbuhat sa ila nga lalaki kag babayi kag nagsiling, ‘Bangod sini bayaan sang lalaki ang iya amay kag iloy kag maghiusa sa iya asawa, kag ang duha mangin isa ka unod’? Sa bagay nga indi na sila duha, kundi isa ka unod. Busa ang gintingob sang Dios, dili pagbulagon sang tawo.”

Ang orihinal nga katuyuan sang Dios, siling ni Jesus, amo nga ang mag-asawa magtingob, nga indi sila magbulagay. Kon amo sina, ang mga Fariseo nagsabat, “nian, ngaa bala nagsugo si Moises sa paghatag sing sulat sa pagbulagay kag sa pagsikway sa iya?”

“Bangod sang katig-a sang inyo tagipusuon si Moises nagtugot sa inyo sa pagbulag sa inyo mga asawa,” sabat ni Jesus, “apang kutob sa ginsuguran indi amo sini.” Huo, sang gintukod sang Dios ang matuod nga talaksan sang pag-asawahay sa katamnan sang Eden, wala sia maghimo sing probisyon para sa diborsio.

Si Jesus padayon nga nagsiling sa mga Fariseo: “Ako nagasiling sa inyo nga ang bisan sin-o nga magbulag sa iya asawa, kon indi bangod sa pagpakighilawas [Griego, por·neiʹa], kag magpangasawa sing iban nagapanglahi.” Busa ginpakita niya nga ang por·neiʹa, nga isa ka mabug-at nga imoralidad sa sekso, amo lamang ang aprobado sang Dios nga rason para sa diborsio.

Sang marealisar nga ang pag-asawahay isa ka nagapadayon nga paghiusa nga may amo lamang sini nga rason sa diborsio, ang mga disipulo napahulag sa pagsiling: “Kon amo ina ang kahimtangan sang tawo upod sa iya asawa, maayo nga indi magpangasawa.” Wala sing pangduhaduha nga ang isa nga nagahunahuna sa pagpakasal dapat magbinagbinag sing serioso sang pagkapermanente sang higot sang pag-asawahay!

Si Jesus nagpadayon sa paghambal nahanungod sa pagkadiminyo. Nagsiling sia nga ang iban nga mga tawo ginbun-ag nga mga eunuco, nga wala sing ikasarang sa pagpangasawa bangod nga wala maglambo sa sekso. Ang iban ginhimo nga mga eunuco sang tawo, kay sila mapintas nga ginkapon. Sa katapusan, ang iban nagpugong sang handum sa pagpangasawa kag sa paghulid agod mahugod nila sing labi pa ang ila kaugalingon sa mga butang nga may kaangtanan sa Ginharian sang mga langit. “Ang makasarang sa pagbaton [sang pagkadiminyo] magbaton sini,” siling ni Jesus.

Karon gindala sang mga tawo ang ila mga kabataan kay Jesus. Apang, ginsabdong sang mga disipulo ang mga kabataan kag gintinguhaan nga papalayuon sila, sa wala sing duhaduha agod amligan si Jesus gikan sa dinagakaigo nga kahuol. Apang si Jesus nagsiling: “Tuguti ninyo ang kabataan sa pagkari sa akon; dili sila pagdumilian, kay ang ginharian sang Dios ila sang mga kasubong nila. Sa pagkamatuod nagasiling ako sa inyo, Ang bisan sin-o nga indi magbaton sang ginharian sang Dios subong sang bata nga diutay indi sia makasulod sa sini.”

Maayo gid nga leksion ang ginhatag diri ni Jesus! Agod mabaton ang Ginharian sang Dios, dapat naton ilugon ang pagkamapainubuson kag pagkadali matudluan sang mga kabataan. Apang ang halimbawa ni Jesus nagalaragway man kon daw ano gid ka importante, labi na sa mga ginikanan, ang maghinguyang sing tion upod sa ila mga kabataan. Ginpakita ni Jesus ang iya gugma sa mga kabataan paagi sa pagpandong sa ila sang iya mga kamot kag sa pagpakamaayo sa ila. Mateo 19:​1-15; Deuteronomio 24:​1; Lucas 16:​18; Marcos 10:​1-16; Lucas 18:​15-17.

▪ Ano ang lainlain nga opinyon sang mga Fariseo nahanungod sa diborsio, kag paano nila gintilawan si Jesus?

▪ Paano gin-atubang ni Jesus ang panikasog sang mga Fariseo nga tilawan sia, kag ano ang ginhatag niya subong ang lamang nga rason para sa diborsio?

▪ Ngaa ang mga disipulo ni Jesus nagsiling nga indi maayo ang magpangasawa, kag ano ang ginrekomendar ni Jesus?

▪ Ano ang ginatudlo ni Jesus sa aton paagi sa iya pagpakig-angot sa mga kabataan?