Kapitulo 97

Mga Manug-obra sa Ulubasan

“MADAMO nga nahauna,” bag-o lang masiling ni Jesus, “nga maulihi kag mga ulihi nga mauna.” Karon ginailustrar niya ini paagi sa pagsugid sing isa ka sugilanon. “Ang ginharian sang langit,” umpisa niya, “kaangay sa agalon sang panimalay nga naglakat sa kaagahon pa sa pagsuhol sa mga manug-obra sa iya ulubasan.”

Si Jesus nagpadayon: “Sang nakapakigsugot [ang agalon sang panimalay] sa mga manug-obra sa isa ka denario ang adlaw, ginpadala niya sila sa iya ulubasan. Kag sang magkadto sia sang mga ikatlo nga oras, nakita niya ang iban nga nagatindog nga wala sing ginahimo sa merkado; kag nagsiling sia sa ila, ‘Kadto man kamo sa ulubasan, kag suhulan ko kamo sang nagakaigo.’ Gani nagkadto sila. Sang naglakat sia liwat sang mga ikan-om kag ikasiam nga oras, amo gihapon ang ginhimo niya. Kag sang mga ikanapulog-isa nga oras naglakat sia kag nakita niya ang iban pa nga nagatindog, kag nagsiling sia sa ila, ‘Ngaa bala nagatindog kamo diri sa bug-os nga adlaw nga wala sing ginahimo?’ Nagsabat sila sa iya, ‘Kay wala sing may nagpaobra sa amon.’ Nagsiling sia sa ila, ‘Kadto man kamo sa ulubasan.’ ”

Ang agalon sang panimalay, ukon tag-iya sang ulubasan, amo si Jehova nga Dios, kag ang ulubasan amo ang pungsod sang Israel. Ang mga manug-obra sa ulubasan amo ang mga tawo nga ginpasulod sa Kasuguan nga katipan; sing ispisipiko sila amo ang mga Judiyo nga nagkabuhi sang panahon sang mga apostoles. Ang kasugtanan sa bayad ginhimo lamang sa bug-os adlaw nga mga manug-obra. Ang bayad isa ka denario ang adlaw. Sanglit ang “ikatlo nga oras” amo ang alas 9:​00 s.a., yadtong gintawag sa ika-3, ika-6, ika-9, kag ika-11 nga oras nagpangabudlay lamang sing 9, 6, 3, kag 1 ka oras, sing pasunod.

Ang 12-ka-oras, ukon bug-os adlaw, nga mga manug-obra nagalaragway sa Judiyong mga lider nga masako pirme sa relihioso nga serbisyo. Indi sila kaangay sang mga disipulo ni Jesus, nga, sa kalabanan nila nga pagkabuhi, nagpangabudlay sa pangisda ukon iban pa sekular nga mga trabaho. Tubtob lamang sang tigragas sang 29 C.⁠E. nga ginpadala sang “agalon sang panimalay” si Jesucristo sa pagtipon sa ila nga mangin mga disipulo niya. Busa sila “naulihi,” ukon ika-11 nga oras nga mga manug-obra sa ulubasan.

Sa katapusan, ang simbuliko nga adlaw sa pagpangabudlay natapos sang mapatay si Jesus, kag nag-abot ang tion sa pagbayad sa mga manug-obra. Ang dikinaandan nga pagsulundan sa pagbayad una sa mga naulihi ginsunod, subong sang ginpaathag: “Sang kahapunon na, nagsiling ang agalon sang ulubasan sa iya tulugyanan, ‘Tawga ang mga manug-obra kag bayari sila sang ila mga suhol, sumugod sa mga naulihi tubtob sa mga nahauna.’ Kag sang nag-abot yadtong mga ginsuhulan sa mga ikanapulog-isa nga oras, nagbaton ang tagsa ka tawo sing isa ka denario. Karon sang mag-abot ang mga nahauna, naghunahuna sila nga kapin ang ila batunon; apang ang tagsa ka tawo man nagbaton sing isa ka denario. Kag sang mabaton nila ini nagkumod sila batok sa agalon sang panimalay, nga nagasiling, ‘Ini nga mga naulihi nagpangabudlay sing isa ka oras lamang; kag ginhimo mo sila nga kaangay sa amon nga nagbatas sang kabug-atan sang adlaw kag sang tagiti nga init!’ Apang nagsabat sia sa ila, ‘Abyan, wala ta ikaw gindayai. Indi bala nagkasugot kita nga isa ka denario ang isuhol ko sa imo? Kuhaa ang imo suhol kag lakat ka. Akon ini luyag nga suhulan ining naulihi sing pareho sa imo. Indi bala tugot nga himuon ko kon ano ang luyag ko sa akon mga pagkabutang? Ukon malain bala ang imo panulok bangod nga ako maayo?’ ” Sa paghinakop, ginsulit ni Jesus ang punto nga ginsiling niya sang nagligad, nga nagasiling: “Gani ang mga naulihi mauna, kag ang mga nahauna maulihi.”

Ang pagbaton sa denario natabo, indi sang napatay si Jesus, kundi sang Pentecostes 33 C.⁠E., sang si Cristo, ang “tulugyanan,” nagpasagahay sang balaan nga espiritu sa iya mga disipulo. Ining mga disipulo ni Jesus kaangay sang “naulihi,” ukon ika-11 nga oras, nga mga manug-obra. Ang denario wala nagalaragway sa regalo nga balaan nga espiritu. Ang denario amo ang butang nga magamit sang mga disipulo diri sa duta. Butang ini nga nagakahulugan sang ila pangabuhian, sang ila kabuhi nga wala sing katapusan. Amo ini ang pribilehiyo nga mangin espirituwal nga Israelinhon, ginhaplas sa pagbantala nahanungod sa Ginharian sang Dios.

Sang ulihi namutikan sadtong ginpaobra sing una nga ang mga disipulo ni Jesus ginsuhulan, kag nakita nila sila nga nagagamit sang simbuliko nga denario. Apang kapin pa sa balaan nga espiritu kag sa kaupod nga mga pribilehiyo sa Ginharian ang luyag nila. Ang ila pagkumod kag pagpamatok ginhimo paagi sa paghingabot sa mga disipulo ni Cristo, ang “naulihi” nga mga manug-obra sa ulubasan.

Ang nahaunang-siglo nga katumanan amo lamang bala ang katumanan sang ilustrasyon ni Jesus? Indi, ang klero sang Cristiandad sa sining ika-20 nga siglo, bangod sang ila mga posisyon kag mga responsabilidad, amo ang “nauna” nga ginpaobra sa simbuliko nga ulubasan sang Dios. Ginkabig nila ang dedikado nga mga manugbantala nga kaupod sang Watch Tower Bible and Tract Society nga mga “naulihi” sa pagbaton sing tulumanon sa pag-alagad sa Dios. Apang, sa kamatuoran, amo ini sila, nga gintamay sang klero, ang nakabaton sing denario​—⁠ang kadungganan nga mag-alagad subong hinaplas nga mga embahador sang langitnon nga Ginharian sang Dios. Mateo 19:​30⁠–​20:16.

▪ Ano ang ginalaragway sang ulubasan? Sin-o ang ginalaragway sang tag-iya sang ulubasan kag sang 12-ka-oras kag 1-ka-oras nga mga manug-obra?

▪ San-o natapos ang simbuliko nga adlaw sa pagpangabudlay, kag san-o ginhimo ang pagbayad?

▪ Ano ang ginalaragway sang pagbayad sing denario?