Kapitulo 1

Mga Mensahe Gikan sa Langit

ANG bug-os nga Biblia, sa kamatuoran, isa ka mensahe gikan sa langit, kay gin-aman ini sang aton langitnon nga Amay sa pagtudlo sa aton. Apang, duha ka pinasahi nga mensahe ang ginhatag sang halos 2,000 ka tuig ang nagligad sang isa ka anghel nga “nagatindog malapit sa atubangan sang Dios.” Ang iya ngalan amo si Gabriel. Usisaon naton ang mga kahimtangan sining duha ka importante nga pagduaw sa duta.

Ang tuig 3 B.C.E. Sa pukatod sang Judea, ayhan indi tanto kalayo gikan sa Jerusalem, may nagakabuhi nga isa ka saserdote ni Jehova nga nagahingalan kay Zacarias. Tigulang na sia, kag amo man ang iya asawa, nga si Elisabet. Kag wala sila sing anak. Turno sang pag-alagad ni Zacarias subong saserdote sa templo sang Dios sa Jerusalem. Sa hinali nagpakita si Gabriel sa tuo nga bahin sang altar sang incienso.

Hinadlukan gid si Zacarias. Apang ginpakalma ni Gabriel ang iya kahadlok, sa pagsiling, “Dili ka mahadlok, Zacarias, kay ang imo pag-ampo ginpamatian, kag ang imo asawa nga si Elisabet magaanak sing lalaki sa imo, kag tawgon mo ang iya ngalan Juan.” Nagpadayon pa sa pagsiling si Gabriel nga si Juan “mangin daku sa atubangan ni Jehova” kag iya “ihanda para kay Jehova ang isa ka nakahanda nga katawhan.”

Apang, indi makapati sa sini si Zacarias. Daw imposible nga sia kag si Elisabet magaanak sa ila edad. Gani si Gabriel nagsiling sa iya: “Magaapa ka kag indi makahambal tubtob sa adlaw nga mahanabo ining mga butang, bangod nga wala ka magtuo sa akon mga pulong.”

Samtang, ang mga tawo sa guwa natingala kon ngaa kadugay kay Zacarias sa sulod sang templo. Sang magguwa sia sang ulihi, indi sia makahambal kundi nagasinyas lamang paagi sa iya mga kamot, kag narealisar nila nga may nakita sia nga labaw sa kinaugali.

Sang matapos ni Zacarias ang iya tion sang pag-alagad sa templo, nagpauli sia. Kag wala madugay pagkatapos sadto natabo gid matuod​—si Elisabet nagbusong! Samtang nagahulat sia sang iya pagbata, nagpuyo sia sa duog nga malayo sa mga tawo sing lima ka bulan.

Sang ulihi nagpakita liwat si Gabriel. Kag sa kay sin-o sia naghambal? Sa isa ka dalaga nga nagahingalan kay Maria gikan sa banwa sang Nazaret. Ano nga mensahe ang ginhatag niya sini nga tion? Pamatii! “Nahamut-an ka sang Dios,” siling ni Gabriel kay Maria. “Yari karon! magapanamkon ka sa imo tiyan kag magaanak sing lalaki, kag tawgon mo ang iya ngalan Jesus.” Si Gabriel nagdugang: “Mangin daku sia kag tawgon nga Anak sang Labing Mataas; . . . kag magahari sia sa panimalay ni Jacob sing dayon, kag ang iya ginharian wala sing katapusan.”

Mapat-od naton nga ginkabig ni Gabriel nga isa ka pribilehiyo ang paghatag sini nga mga mensahe. Kag sa aton pagbasa sing dugang pa nahanungod kay Juan kag kay Jesus, makita naton sing kapin pa kaathag kon ngaa ining mga mensahe gikan sa langit tuman ka importante. 2 Timoteo 3:​16; Lucas 1:​5-33.

▪ Anong duha ka importante nga mensahe ang ginhatag gikan sa langit?

▪ Sin-o ang nagdul-ong sang mensahe, kag sa kay sin-o ini ginhatag?

▪ Ngaa mabudlay patihan ang mga mensahe?