Kapitulo 10

Mga Paglakbay Pa Jerusalem

NAG-ABOT ang tigpamulak. Kag tion na para sa pamilya ni Jose, upod sa mga abyan kag mga paryente, nga himuon ang ila tuigan nga paglakbay sa tion sang tigpamulak pa Jerusalem agod saulugon ang Paskuwa. Samtang ginasugdan nila ang mga 100 kilometros nga paglakbay, yara ang kinaandan nga kakunyag. Si Jesus 12 anyos na karon, kag ginpaabot niya nga may pinasahi nga interes ang piesta.

Para kay Jesus kag sa iya pamilya, ang Paskuwa indi isa ka adlaw lamang nga okasyon. Nagapabilin man sila para sa nagasunod nga pito ka adlaw nga Piesta sang Tinapay nga Wala sing Lebadura, nga ginakabig nila nga bahin sang panahon sang Paskuwa. Bangod sini, ang bug-os nga paglakbay halin sa ila balay sa Nazaret, lakip ang pagtener sa Jerusalem, nagadugay sing mga duha ka semana. Apang sini nga tuig, bangod sang isa ka butang nga nagdalahig kay Jesus, naglawiglawig pa ini.

Ang problema natalupangdan sang nagapauli sila pa Jerusalem. Gindumdom ni Jose kag ni Maria nga si Jesus yara sa grupo sang mga paryente kag mga abyan nga nagalakbay sing tingob. Apang wala sia makit-i sang magdulog sila agod magpaligad sang gab-i, kag ginpangita nila sia sa tunga sang ila mga kaupod nga nagalakbay. Indi sia makit-an. Gani nagbalik si Jose kag si Maria sa Jerusalem agod pangitaon sia.

Bug-os nga adlaw nga nangita sila, apang wala nila sia makita. Amo man sa ikaduha nga adlaw. Sang ulihi, sang ikatlo nga adlaw, nagkadto sila sa templo. Didto, sa isa sang mga kuwarto sini, nakita nila si Jesus nga nagapungko sa tunga sang Judiyong mga manunudlo, nga nagapamati sa ila kag nagapamangkot sa ila.

“Anak, ngaa ginhimo mo ini sa amon?” pamangkot ni Maria. “Tan-awa bala, nalisdan kami sang amay mo sa pagpangita sa imo.”

Nakibot si Jesus nga wala nila mahibal-i kon sa diin sia pangitaon. “Ngaa bala nga ginapangita gid ninyo ako?” pamangkot niya. “Wala bala kamo makahibalo nga kinahanglan nga yara ako sa balay sang akon Amay?”

Indi mahangpan ni Jesus kon ngaa wala ini mahibal-i sang iya mga ginikanan. Gani, nagpauli si Jesus upod sa iya mga ginikanan kag padayon nga nagpasakop sa ila. Nagdugang sia sa kaalam kag sa kataason kag nahamut-an sang Dios kag sang mga tawo. Huo, kutob sang iya pagkabata, nagpakita si Jesus sing maayong halimbawa indi lamang sa pagpangita sing espirituwal nga mga kaayuhan kundi sa pagpakita man sing pagtahod sa iya mga ginikanan. Lucas 2:​40-52; 22:7.

▪ Ano nga paglakbay sa tion sang tigpamulak ang regular nga ginahimo ni Jesus upod sa iya pamilya, kag daw ano kadugay ini?

▪ Ano ang natabo sa tion sang paglakbay sang si Jesus 12 anyos?

▪ Ano nga halimbawa ang ginapahamtang ni Jesus para sa mga pamatan-on karon?