Kapitulo 120

Mga Pagpanghiwala sa Luwang

SA TAPOS bayaan si Jesus sa katamnan sang Getsemani kag nagpalagyo sa kahadlok upod sang iban nga mga apostoles, sanday Pedro kag Juan nagdulog sa ila pagpalagyo. Ayhan naabtan nila si Jesus sang gindala sia sa puluy-an ni Annas. Sang ginpadala sia ni Annas kay Caifas nga mataas nga saserdote, sanday Pedro kag Juan nagsunod sa malayo, ayhan bangod nahadlok sila nga basi patyon sila apang nabalaka gid sila sa kon ano ang matabo sa ila Agalon.

Sa pag-abot sa malapad nga puluy-an ni Caifas, si Juan nakasulod sa luwang, bangod kilala sia sang mataas nga saserdote. Apang, si Pedro nagpabilin nga nagatindog sa guwa sang ganhaan. Wala magdugay nagbalik si Juan kag nakighambal sa manugbantay sang ganhaan, nga isa ka ulipon nga babayi, kag si Pedro gintugutan sa pagsulod.

Matugnaw ang panahon, kag ang mga suluguon sa balay kag mga opisyal sang mataas nga saserdote nagdabok sing kalayo sa mga uling. Si Pedro nagbuylog sa ila agod magpainit-init samtang nagahulat sang resulta sang pagbista kay Jesus. Didto, sa kapawa sang kalayo, ang manugbantay sang ganhaan nga nagpasulod kay Pedro nakahimutad sa iya. “Upod ka man ni Jesus nga Galileanhon!” siling niya.

Sa kahangawa nga nakilal-an sia, ginpanghiwala ni Pedro sa atubangan nila tanan nga kilala niya si Jesus. “Wala ako makahibalo ukon makahangop sang imo ginasiling,” siling niya.

Kag nagguwa si Pedro sa gawang. Didto, nakita naman sia sang isa pa ka babayi kag nagsiling man sa mga nagatindog didto: “Ini nga tawo upod ni Jesus nga Nazaretnon.” Sa liwat ginpanghiwala ini ni Pedro, nga nagasumpa: “Wala ako makakilala sa iya!”

Si Pedro nagpabilin sa luwang, nagahalong nga indi sia makilala. Ayhan sa sini nga punto natublag sia sa pagpamalo sang manok sa kaagahon. Samtang, ang pagbista kay Jesus nagpadayon, ayhan ginhiwat sa isa ka bahin sang balay sa ibabaw sang luwang. Wala sing duhaduha nga nakita ni Pedro kag sang iban nga nagahulat sa ubos ang pagsulod kag pagguwa sang lainlain nga mga saksi nga ginadala sa pagsaksi.

Mga isa ka oras na ang nagligad kutob sang katapusan nga nakilal-an si Pedro nga kaupod ni Jesus. Karon madamo sang mga nagatindog ang nagpalapit sa iya kag nagsiling: “Matuod gid nga ikaw man isa sa ila, kay ang imo panghambal nagapakilala sa imo.” Ang isa sa sadto nga grupo amo ang paryente ni Malco, nga gingilangan ni Pedro sing dulunggan. “Wala ko bala ikaw makita sa katamnan kaupod niya?” siling niya.

“Wala ko makilala ang tawo!” matigdas nga siling ni Pedro. Sa katunayan, gintinguhaan niya nga kombinsihon sila nga nag­sayop sila tanan paagi sa pagpanuloy kag pagpanumpa, nga sa ­epekto, nagsiling nga gabaan sia kon wala sia nagasugid sing kamatuoran.

Pagkatapos gid nga nagpanghiwala si Pedro sing makatlo, nagpamalo ang manok. Kag sadto nga tion, si Jesus, nga ayhan naggawa sa balkonahe sa ibabaw sang luwang, nagbalikid kag nagtulok sa iya. Sa gilayon, nadumduman ni Pedro ang ginsiling ni Jesus pila ka oras lamang ang nakaligad sa hulot sa ibabaw: “Sa indi pa makapamalo ang manok sing makaduha, ipanghiwala mo ako sing makatlo.” Nagkasubo sa mabug-at niya nga sala, si Pedro nagguwa kag naghibi sing mapait gid.

Paano ini natabo? Ngaa, sa tapos manigurado sang iya espirituwal nga kusog, paagisod nga ginpanghiwala ni Pedro ang iya Agalon sing makatlo? Mahimo gid nga wala makapangaman si Pedro. Ang kamatuoran ginpatiko, kag si Jesus ginlaragway subong isa ka malaut nga kriminal. Ang husto ginhimo nga sayop, ang wala sing sala subong nga nakasala. Gani bangod sang pag-ipit, nadula ni Pedro ang pagkatimbang. Sa hinali ginsikway niya ang iya katutom; nadaug sia sang kahadlok sa tawo nga ginkasubo niya. Kabay nga indi gid ina matabo sa aton. Mateo 26:​57, 58, 69-75; Marcos 14:​30, 53, 54, 66-72; Lucas 22:​54-62; Juan 18:​15-18, 25-27.

▪ Paano nakasulod sa gawang sang mataas nga saserdote sanday Pedro kag Juan?

▪ Samtang sanday Pedro kag Juan yara sa luwang, ano ang nagakatabo sa balay?

▪ Makapila nagpamalo ang manok, kag makapila ginpanghiwala ni Pedro nga kilala niya si Cristo?

▪ Ano ang buot silingon nga si Pedro nagpanuloy kag nagpanumpa?

▪ Ano ang kabangdanan nga ginpanghiwala ni Pedro nga kilala niya si Jesus?