Kapitulo 4

Nagabusong Apang Indi Kasal

SI Maria nagabusong sing tatlo ka bulan. Madumduman ninyo nga ginhinguyang niya ang una nga bahin sang iya pagbusong sa pagduaw kay Elisabet, apang nagpauli na sia karon sa Nazaret. Sa indi madugay ang iya kahimtangan mahibaluan sang publiko sa iya banwa. Sia, sa pagkamatuod, yara sa isa ka mabudlay nga kahimtangan!

Ang nagpalain pa sang kahimtangan amo nga si Maria nakagon nga mangin asawa sang panday nga si Jose. Kag nahibaluan niya nga, sa idalom sang kasuguan sang Dios sa Israel, ang babayi nga nakagon sa isa ka lalaki apang kinabubut-on nga naghulid sa lain nga lalaki batuhon tubtob kamatayon. Paano niya mapaathag ang iya pagbusong kay Jose?

Sanglit tatlo ka bulan nga wala si Maria, mapat-od naton nga nalangkag si Jose nga makita sia. Sang magkitaay sila, mahimo gid nga ginbalita ini ni Maria sa iya. Mahimo ginpaathag niya sing maayo nga nagbusong sia paagi sa balaan nga espiritu sang Dios. Apang, subong mahanduraw mo, mabudlay patihan ini ni Jose.

Nahibaluan ni Jose ang maayo nga dungog ni Maria. Kag mahimo gid nga daku ang iya gugma sa iya. Apang, walay sapayan sang iya ginsiling, daw mahimo gid ginpabusong sia sang iban nga lalaki. Bisan pa kon amo sini ang natabo, indi luyag ni Jose nga batuhon sia tubtob kamatayon ukon mahuy-an sa publiko. Gani namat-od sia nga diborsiohan sia sing patago. Sadto nga mga adlaw, ang nakagon nga mga tawo ginatamod subong kasal na, kag kinahanglan ang pagdiborsio agod tapuson ang pagkanakagon.

Sang ulihi, samtang ginabinagbinag gihapon ni Jose ini nga butang, natulugan sia. Ang anghel ni Jehova nagpakita sa iya paagi sa damgo kag nagsiling: “Dili ka magkahadlok sa pagbaton kay Maria nga imo asawa, kay ang iya ginapanamkon iya sang balaan nga espiritu. Magaanak sia sing lalaki, kag tawgon mo ang iya ngalan Jesus, kay luwason niya ang iya katawhan gikan sa ila mga sala.”

Sang magmata si Jose, daw ano ang iya pagpasalamat! Sa wala sing pagpalantang ginhimo niya ang ginsiling sang anghel. Gindala niya si Maria sa iya puluy-an. Ining dayag nga buhat nangin subong isa ka seremonya sang kasal, nga nagapahibalo nga si Jose kag si Maria opisyal nga kasal na karon. Apang wala pagtanduga ni Jose si Maria tubtob nagabusong sia kay Jesus.

Tan-awa! Daku na ang tiyan ni Maria, apang ginapasakay sia ni Jose sa asno. Sa diin sila makadto, kag ngaa malakbay sila samtang manugbata na si Maria? Lucas 1:39-41, 56; Mateo 1:18-25; Deuteronomio 22:23, 24.

▪ Ano ang ginahunahuna ni Jose sang mahibal-an niya nga nagabusong si Maria, kag ngaa?

▪ Paano madiborsiohan ni Jose si Maria samtang wala pa sila makasal?

▪ Anong dayag nga buhat ang nangin seremonya sang kasal ni Jose kag ni Maria?