Kapitulo 82

Nagbalik si Jesus sa Jerusalem

WALA madugay naglakbay liwat si Jesus, nga nagapanudlo sa siudad kag siudad kag sa minuro kag minuro. Maathag nga sia yara sa distrito sang Perea, sa tabok sang Suba sang Jordan gikan sa Judea. Apang ang iya destinasyon amo ang Jerusalem.

Ang Judiyong pilosopiya nga limitado lamang ang maluwas amo mahimo ang nagtiklod sa isa ka tawo nga mamangkot: “Ginuo, diutay lamang bala ang maluwas?” Sa iya sabat, ginpilit ni Jesus ang mga tawo sa paghunahuna kon ano ang kinahanglanon para sa kaluwasan: “Panikasog kamo sing mabaskog [kon sayoron, maghimakas, ukon mag-antos] sa pagsulod sa ganhaan nga makitid.”

Hilingagawon ining mabaskog nga panikasog “kay madamo,” padayon ni Jesus, “ang magapaninguha sa pagsulod apang indi makasarang.” Ngaa indi sila makasarang? Sia nagpaathag nga ‘sa tion nga ang agalon sang panimalay nakatindog kag nakatakop sang ganhaan kag ang mga tawo magatindog sa guwa kag manuktok, nga nagasiling, “Ginuo, buksi kami,” sia magasiling: “Wala ako makahibalo kon tagadiin kamo. Palayo sa akon, tanan kamo nga manugbuhat sing kalautan!” ’

Ang mga nakandaduhan sa guwa mahimo nga nag-abot sa tion nga kombenyente lamang sa ila kaugalingon. Apang sadto nga tion ang ganhaan sang kahigayunan natakpan kag nakandaduhan na. Agod makasulod, dapat sila kuntani nag-abot sing temprano, bisan pa mahimo nga indi kombenyente para sa ila. Sa pagkamatuod, masubo nga resulta ang nagahulat sa mga nagapaisol sang paghimo sa pagsimba kay Jehova nga ila panguna nga katuyuan sa kabuhi!

Ang mga Judiyo nga sa ila ginpadala si Jesus agod magministeryo, sa kabilugan, napaslawan sa paghimulos sa ila dalayawon nga kahigayunan sa pagbaton sa aman sang Dios para sa kaluwasan. Gani nagasiling si Jesus nga sila magahibi kag magapabagrot sang ila ngipon kon ihaboy sila sa guwa. Sa pihak nga bahin, ang mga tawo gikan “sa sidlangan kag sa katundan, kag gikan sa aminhan kag sa bagatnan,” huo, gikan sa tanan nga pungsod, “magalingkod sa pagkaon sa ginharian sang Dios.”

Si Jesus nagpadayon: “May mga naulihi [ang gintamay nga mga di-Judiyo, subong man ang ginpakanubo nga mga Judiyo] nga mahauna, kag may nahauna [ang ginpaboran sa materyal kag relihion nga mga Judiyo] nga maulihi.” Ang ila pagkaulihi nagakahulugan nga ang mga tamaran kag dimapinasalamaton indi gid makasulod sa Ginharian sang Dios.

Nagdugok karon ang mga Fariseo kay Jesus kag nagsiling: “Halin ka kag maglakat, kay si Herodes [Antipas] luyag magpatay sa imo.” Mahimo nga si Herodes ang nag-umpisa sining huring-huring agod malagyo si Jesus gikan sa teritoryo. Mahimo nga nahadlok si Herodes nga madalahig sa pagkapatay sang isa pa ka manalagna sang Dios subong sang natabo sa pagpatay kay Juan Bautista. Apang ginsugiran ni Jesus ang mga Fariseo: “Lakat kamo kag sugiri yadtong ido nga talonon, ‘Yari karon! nagasubol ako sang mga demonyo kag nagapang-ayo karon kag buwas, kag sa ikatlong adlaw makatapos na ako.’ ”

Sang matapos ang iya hilikuton didto, nagpadayon si Jesus sa iya paglakbay padulong sa Jerusalem kay, suno sa iya paathag, “indi mahimo nga ang manalagna mapatay sa guwa sang Jerusalem.” Ngaa dapat paabuton nga si Jesus patyon sa Jerusalem? Bangod ang Jerusalem amo ang kapital nga siudad, nga sa diin nahamtang ang may 71 ka katapo nga mataas nga korte sang Sanhedrin kag sa diin ginahalad ang mga sapat nga halad. Busa, indi mahimo nga “ang Kordero sang Dios” patyon sa guwa sang Jerusalem.

“Jerusalem, Jerusalem, nga nagapatay sang mga manalagna kag nagabato sa mga ginpadala sa iya,” panganduhoy ni Jesus, “makapila kuntani nga buot ko tipunon ang imo mga anak subong sang munga nga nagatipon sang iya mga piso sa idalom sang iya mga pakpak, apang indi kamo! Yari karon! Ang inyo balay ginabiyaan sa inyo.” Bangod sang pagsikway sa Anak sang Dios, ang pungsod ginhukman sa kalaglagan!

Samtang nagapadayon si Jesus padulong sa Jerusalem, gin-agda sia sa balay sang isa ka manugdumala sang mga Fariseo. Adlaw nga Inugpahuway sadto, kag ginabantayan sia sing maayo sang mga tawo, kay may tawo sadto nga bilbilon, tubig nga nagsupot mahimo sa iya mga butkon kag mga batiis. Ginpatuhuyan ni Jesus ang mga Fariseo kag ang mga batid sa Kasuguan nga didto sadto, nga nagapamangkot: “Tugot bala ang pag-ayo sa adlaw nga inugpahuway, ukon indi?”

Wala sing isa nga nagtingog. Gani gin-ayo ni Jesus ang tawo kag ginpalakat sia. Nian namangkot sia: “Sin-o sa inyo, nga may asno ukon baka nga nahulog sa bubon, ang indi magkuha sini gilayon sa adlaw nga inugpahuway?” Sa liwat, wala sing isa nga nagsabat. Lucas 13:​22⁠–​14:​6; Juan 1:⁠29.

▪ Ano ang ginpakita ni Jesus nga kinahanglanon para sa kaluwasan, kag ngaa madamo ang nakandaduhan sa guwa?

▪ Sin-o ang “maulihi” nga mangin nahauna, kag ang “nahauna” nga maulihi?

▪ Ngaa mahimo ginsiling nga luyag ni Herodes nga patyon si Jesus?

▪ Ngaa indi mahimo nga ang manalagna patyon sa guwa sang Jerusalem?