Kapitulo 62

Naghatag si Jesus sing Leksion Tuhoy sa Pagkamapainubuson

SA TAPOS maayo ang gindemonyo nga bata nga lalaki sa rehiyon malapit sa Cesarea Filipos, luyag magpauli ni Jesus sa Capernaum. Apang, luyag niya nga sila lamang sang iya mga disipulo ang maglakbay agod mahanda niya sila sing dugang pa para sa iya kamatayon kag sa ila mga salabton sa tapos sini. “Ang Anak sang tawo itugyan sa mga kamot sang mga tawo,” paathag niya sa ila, “kag patyon nila sia, apang, walay sapayan nga patyon sia, banhawon sia sa ikatlo nga adlaw.”

Bisan pa nasambit na ini anay ni Jesus, kag aktuwal nga nakita sang tatlo ka apostoles ang pagbaylo sing dagway nga sa amo nga tion ang iya “pagtaliwan” ginhambalan, wala gihapon ini mahangpi sang iya mga sumulunod. Bisan pa wala sing isa sa ila ang nagapanghiwala nga patyon sia sa ulihi, subong sang ginhimo anay ni Pedro, nahadlok sila nga pamangkuton sia sing dugang pa nahanungod sini.

Sang ulihi nag-abot sila sa Capernaum, nga daw nangin puluy-an ni Jesus sa tion sang iya ministeryo. Amo man ini ang banwa ni Pedro kag sang iban pa nga apostoles. Didto, ginpalapitan si Pedro sang mga tawo nga nagapangolekta sing buhis sa templo. Ayhan sa tuyo nga dalahigon si Jesus sa isa ka paglapas sa ginabaton nga kinabatasan, namangkot sila: “Wala bala nagabayad ang inyo manunudlo sing duha ka dracma nga buhis [sa templo]?”

“Huo,” sabat ni Pedro.

Si Jesus, nga mahimo bag-o lang mag-abot sa balay, nakabati sang natabo. Gani bisan sa wala pa sia masugiri sini ni Pedro, si Jesus namangkot: “Ano bala sa hunahuna mo, Simon? Sa kay sin-o bala nagasukot sing mga balayran ukon buhis ang mga hari sa duta? Sa ila mga anak ukon sa mga dumuluong?”

“Sa mga dumuluong,” sabat ni Pedro.

“Kon amo, gali, hilway ang mga anak,” siling ni Jesus. Sanglit ang Amay ni Jesus amo ang Hari sang uniberso, ang Isa nga ginasimba sa templo, sa pagkamatuod indi kinahanglan nga ang Anak sang Dios magbayad sing buhis sa templo. “Apang agod nga indi naton sila mapasandad,” siling ni Jesus, “kadto ka sa dagat kag itawtaw ang taga, kag dakpa ang una nga isda nga mahulik, kag kon matingal mo ini, makita mo ang isa ka siclo [apat ka dracma]. Kuhaa ina kag ihatag mo sa ila para sa akon kag sa imo.”

Sang magtilipon ang mga disipulo sang makabalik na sila sa Capernaum, ayhan sa balay ni Pedro, namangkot sila: “Sin-o gid ang labing daku sa ginharian sang langit?” Nahibaluan ni Jesus kon ngaa nagapamangkot sila, bangod nahibaluan niya ang nagakatabo samtang nagasunod sila sa iya sang nagapauli sila gikan sa Cesarea Filipos. Gani namangkot sia: “Ano ang ginbaisan ninyo sa dalanon?” Nahuya sa natabo, naghipos ang mga disipulo, kay ginbaisan nila kon sin-o ang mas daku sa tunga nila.

Sa tapos sang halos tatlo ka tuig nga pagpanudlo ni Jesus, daw indi bala mapatihan nga ang mga disipulo nagabaisay pa sadto? Ti, ginapakita sini ang mabaskog nga impluwensia sang tawhanon nga pagkadihimpit, subong man sang relihioso nga ginhalinan. Ang Judiyo nga relihion nga gindak-an sang mga disipulo nagpadaku sang posisyon ukon ranggo sa tanan nga butang. Dugang pa, ayhan si Pedro, bangod sang ginsaad ni Jesus nga makabaton sia sing mga “yabi” sa Ginharian, nagbatyag nga labaw sia. Mahimo nga amo man sini ang ginahunahuna ni Santiago kag ni Juan bangod ginpaboran sila nga masaksihan ang pagbaylo dagway ni Jesus.

Ano man ang kabangdanan, nagpakita si Jesus sing makatalandog nga pasundayag agod tadlungon ang ila mga panimuot. Nagkuha sia sing bata nga diutay, ginpatunga sia sa ila, gin-agbayan sia, kag nagsiling: “Kon indi kamo magliso kag mangin kaangay sang kabataan, indi kamo nga mas-a makasulod sa ginharian sang langit. Busa, ang bisan sin-o nga magpaubos sang iya kaugalingon subong sining bata nga diutay amo ang labing daku sa ginharian sang langit; kag ang bisan sin-o nga magbaton sang isa nga subong sining bata nga diutay sa akon ngalan nagabaton man sa akon.”

Daw ano ka dalayawon nga paagi sa pagtadlong sa iya mga disipulo! Si Jesus wala nagapangakig sa ila kag nagatawag sa ila nga bugalon, makagod, ukon ambisyuso. Wala, kundi gin-ilustrar niya ang iya nagatadlong nga pagtudlo paagi sa paggamit sang huwaran sang diutay nga kabataan, nga kinaandan nga mapainubuson kag wala sing ambisyon kag wala nagahunahuna sing ranggo sa tunga nila. Sa amo ginapakita ni Jesus nga dapat magpalambo ang iya mga disipulo sing mga kinaiya sang mapainubuson nga kabataan. Subong ginahinakop ni Jesus: “Ang labing diutay sa inyo tanan amo ang daku.” Mateo 17:22–27; 18:1-5; Marcos 9:30-37; Lucas 9:43-48.

▪ Sang magbalik sa Capernaum, ano nga panudlo ang ginsulit ni Jesus, kag paano ini ginbaton?

▪ Ngaa indi obligado si Jesus nga magbayad sing buhis sa templo, apang ngaa nagbayad sia sini?

▪ Ano mahimo ang ginbangdan sang pagbaisay sang mga disipulo, kag paano sila gintadlong ni Jesus?