Kapitulo 72

Nagpadala si Jesus sing 70

TIGPAMULAK karon sang 32 C.⁠E., bug-os nga tatlo ka tuig sugod sang ginbawtismuhan si Jesus. Sia kag ang iya mga disipulo bag-o lang makatambong sa Piesta sang mga ­Payagpayag sa Jerusalem, kag mahimo nga malapit pa sila. Sa kamatuoran, ginhinguyang ni Jesus ang kalabanan sang nabilin nga anom ka bulan sang iya ministeryo sa Judea ukon sa tabok lamang sang Suba sang Jordan sa distrito sang Perea. Ining teritoryo dapat man tuptupan.

Matuod, sa tapos sang Paskuwa sang 30 C.⁠E., mga walo ka bulan nga nagbantala si Jesus sa Judea. Apang sang magtinguha ang mga Judiyo nga patyon sia didto sang Paskuwa sang 31 C.⁠E., ginhinguyang niya ang masunod nga isa ka tuig kag tunga sa pagpanudlo sing halos sa Galilea lamang. Sa sulod sadto nga tion, nakatukod sia sing isa ka daku, nahanas sing maayo nga organisasyon sang mga manugbantala, butang nga wala sia sang una. Gani ginsugdan niya karon ang hingapusan nga pagpanaksi sing maid-id sa Judea.

Ginsugdan ni Jesus ining kampanya paagi sa pagpili sing 70 ka disipulo kag ginpadala sila sing tagduhaduha. Sa amo, may yara sa kabilugan 35 ka paris sang mga manugbantala sang Ginharian sa pagtuptop sa teritoryo. Nag-una ini sila sa tagsa ka siudad kag duog nga ginaplano ni Jesus nga kadtuan, upod ang iya mga apostoles.

Sa baylo nga suguon ang 70 nga magkadto sa mga sinagoga, ginsugo sila ni Jesus nga magsulod sa pribado nga mga puluy-an, nga nagapaathag: “Kon magsulod kamo sa balay magsiling anay, ‘Kabay nga may paghidait sa sining balay.’ Kag kon may abyan sang paghidait didto, ang inyo paghidait magapabilin sa iya.” Ano ang ila mangin mensahe? “Sugiri sila,” siling ni Jesus, “ang ginharian sang Dios malapit na sa inyo.” Tuhoy sa hilikuton sang 70, ang Matthew Henry’s Commentary nagareport: “Kaangay sang ila Agalon, sa bisan diin sila magduaw, sila nagbantala sa balay kag balay.”

Ang mga instruksion ni Jesus sa 70 kaanggid man sa iya ginhatag sa 12 sang ginpadala niya sila agod magbantala sa Galilea mga isa ka tuig ang nauna. Indi lamang nga ginpaandaman niya ang 70 tuhoy sa pagpamatok nga maatubang nila, ginahanda sila sa pagpresentar sang mensahe sa mga tagbalay, kundi ginhatagan niya sila sing gahom sa pag-ayo sa masakiton. Sa amo, sang mag-abot si Jesus wala madugay sa tapos sadto, madamo ang nalangkag nga makita ang Agalon sang mga disipulo nga may ikasarang sa paghimo sing makatilingala nga mga butang.

Ang pagbantala sang 70 kag ang pagpanghikot ni Jesus sa tapos nila malip-ot lamang. Wala madugay ang 35 ka paris sang mga manugbantala sang Ginharian nagbalalik kay Jesus. “Ginuo,” siling nila sing malipayon, “bisan ang mga demonyo nagatuman sa amon sa imo ngalan.” Yadto nga maayong report sang pag-alagad pat-od nga nagpahalipay kay Jesus, kay nagsabat sia: “Nakita ko na si Satanas nga nahulog subong sang kilat gikan sa langit. Yari karon! nahatag ko sa inyo ang pagbulut-an sa pagtapak sa mga man-ug kag mga iwiiwi.”

Nahibaluan ni Jesus nga sa tapos sang pagkabun-ag sang Ginharian sang Dios sa tion sang katapusan, si Satanas kag ang iya mga demonyo itagbong gikan sa langit. Apang karon ining pagtagbong sang mga tawo lamang sa dimakita nga mga demonyo isa ka dugang pa nga pasalig sinang nagapakari nga hitabo. Busa, nagapamulong si Jesus tuhoy sa palaabuton sadto nga pagkapukan ni Satanas gikan sa langit subong pat-od gid nga matabo. Busa, simbuliko ang kahulugan sang paghatag sa 70 sing pagbulut-an sa pagtapak sa mga man-ug kag mga iwiiwi. Apang, si Jesus nagsiling: “Dili kamo magkalipay tungod sini, nga ang mga espiritu nagatuman sa inyo, kundi magkalipay kamo nga ang inyo mga ngalan nasulat sa langit.”

Daku gid ang kalipay ni Jesus kag gindayaw niya sing dayag ang iya Amay nga gingamit niya ining mapainubuson nga mga alagad niya sa sinang gamhanan nga paagi. Nagliso sia sa iya mga disipulo, kag nagsiling: “Malipayon ang mga mata nga nakakita sang mga butang nga inyo nakita. Kay nagasiling ako sa inyo, Madamo nga manalagna kag mga hari ang naghandum sa pagtan-aw sang inyo ginatan-aw apang wala sila makakita, kag sa pagpamati sang inyo ginapamatian apang wala sila makabati.” Lucas 10:​1-24; Mateo 10:​1-42; Bugna 12:​7-12.

▪ Sa diin nagbantala si Jesus sa nahauna nga tatlo ka tuig sang iya ministeryo, kag ano nga teritoryo ang gintuptupan niya sa iya katapusan nga anom ka bulan?

▪ Sa diin ginsugo ni Jesus ang 70 nga pangitaon ang katawhan?

▪ Ngaa nagsiling si Jesus nga nakita na niya si Satanas nga nahulog gikan sa langit?

▪ Sa anong kahulugan gintapakan sang 70 ang mga man-ug kag mga iwiiwi?