Kapitulo 67

Napaslawan Sila sa Pagdakop sa Iya

SAMTANG ginasaulog gihapon ang Piesta sang mga Payagpayag, ang relihioso nga mga lider nagpadala sing mga tulugyanan sa pagdakop kay Jesus. Wala sia magpanago. Sa baylo, nagpadayon si Jesus sa pagpanudlo sing dayag, nga nagasiling: “Sa diutay pa nga tion kaupod ako ninyo, kag nian magakadto ako sa nagpadala sa akon. Kamo magapangita sa akon kag indi makakita sa akon, kag kon diin ako indi kamo makakadto.”

Wala makahangop ang mga Judiyo, kag gani nagpinamangkutanay sila: “Diin bala makadto ining tawo nga indi naton sia makita? Makadto bala sia sa mga nag-aplaag nga mga Judiyo sa tunga sang mga Griego kag magatudlo sa mga Griego? Ano bala ining pulong nga ginsiling niya, ‘Kamo magapangita sa akon kag indi makakita sa akon’?” Sa pagkamatuod, si Jesus nagahambal nahanungod sa iya nagahilapit nga kamatayon kag pagkabanhaw padulong sa kabuhi sa langit, diin indi makakadto ang iya mga kaaway.

Nag-abot ang ikapito kag katapusan nga adlaw sang piesta. Sa kada aga sang piesta, ang saserdote nagabubo sing tubig, nga ginkuha niya gikan sa Punong sang Siloe, amo kon ngaa nagailig ini sa tiilan sang halaran. Nagapahanumdom sa katawhan tuhoy sining matag-adlaw nga seremonya, si Jesus nagpahayag: “Kon ang bisan sin-o ginauhaw, magkari sia sa akon kag mag-inom. Ang nagatuo sa akon, subong sang nasiling sang Kasulatan, ‘Gikan sa tagipusuon niya magailig ang mga suba sang tubig nga buhi.’ ”

Sa pagkamatuod, ginahambal diri ni Jesus ang nahanungod sa daku nga mahanabo kon ang balaan nga espiritu ibubo. Ining pagbubo sa balaan nga espiritu natabo sang Pentecostes sang masunod nga tuig. Didto, ang mga suba sang tubig nga buhi nag-ilig sang ang 120 ka disipulo nagsugod sa pagministeryo sa katawhan. Apang tubtob sadto, wala pa sing espiritu sa kahulugan nga wala pa sing disipulo ni Cristo ang ginhaplasan sing balaan nga espiritu kag gintawag sa langitnon nga kabuhi.

Bilang sabat sa panudlo ni Jesus, ang iban nagsugod sa pagsiling: “Amo gid ini Ang Manalagna,” maathag nga nagapatuhoy sa manalagna nga labi pa kay Moises nga ginsaad nga magakari. Ang iban nagsiling: “Ini amo ang Cristo.” Apang ang iban nagprotesta: “Nagagikan bala ang Cristo sa Galilea? Wala bala magsiling ang Kasulatan nga ang Cristo magagikan sa kaliwatan ni David, kag gikan sa Betlehem nga minuro diin didto anay si David?”

Gani may pagbinahinbahin sa katawhan. Ang iban sa ila buot magdakop kay Jesus, apang wala sing nagdakop sa iya. Sang magbalik ang mga tulugyanan nga indi kaupod si Jesus, ang puno nga mga saserdote kag mga Fariseo nagpamangkot: “Ngaa bala wala ninyo pagdalha sia?”

“Wala pa gid sing tawo nga nagpamulong subong sining tawo,” sabat sang mga tulugyanan.

Naakig sing daku, ang relihioso nga mga lider nagpakanubo sang ila kaugalingon paagi sa pagyaguta, pagbutig, kag pagpamuyayaw. Nag-uligyat sila: “Ginpatalang man bala kamo? May yara bala sang mga manugdumala ukon sang mga Fariseo nga nagtuo sa iya? Apang ining kadam-an nga wala makahibalo sang Kasuguan pinakamalaut.”

Bangod sini, si Nicodemo, nga isa ka Fariseo kag manugdumala sang mga Judiyo (kon sayuron, katapo sang Sanhedrin), nagpangisog sa paghambal tungod kay Jesus. Ayhan madumduman ninyo nga sang nagligad nga duha ka tuig kag tunga, si Nicodemo nagkadto kay Jesus sa kagab-ihon kag nagpabutyag sing pagtuo sa iya. Karon si Nicodemo nagsiling: “Nagahukom bala sa tawo ang aton kasuguan kon indi sia anay pagpamatian kag mahibaluan ang iya ginahimo?”

Labi pa gid nga naakig ang mga Fariseo nga isa sang ila kaupod ang nagpangapin kay Jesus. “Ikaw man bala taga-Galilea?” nagauligyat nga siling nila. “ Usisaa kag makita mo nga wala sing manalagna nga nagalutaw sa Galilea.”

Bisan pa nga ang Kasulatan wala nagasiling sing direkta nga ang isa ka manalagna magahalin sa Galilea, ginapakita sini nga ang Cristo magagikan didto, paagi sa pagsiling nga makita sa sining rehiyon ang “daku nga kapawa.” Dugang pa, si Jesus natawo sa Betlehem, kag kaliwat sia ni David. Bisan pa nga nahibaluan ini sang mga Fariseo, ayhan sila ang nagpalapta sang dimatuod nga balita nahanungod kay Jesus. Juan 7:32-52; Isaias 9:1, 2; Mateo 4:13-17.

▪ Ano ang nagakatabo kada aga sang piesta, kag paano ini ginpatalupangod ni Jesus?

▪ Ngaa napaslawan ang mga tulugyanan sa pagdakop kay Jesus, kag ano ang reaksion sang relihiosong mga lider?

▪ Sin-o si Nicodemo, ano ang iya panimuot kay Jesus, kag paano sia gintamod sang iya kaupod nga mga Fariseo?

▪ Ano ang pamatuod nga ang Cristo magahalin sa Galilea?