Kapitulo 108

Napaslawan Sila sa Pagsiod kay Jesus

SI Jesus bag-o lang magpanudlo sa templo kag ginsugiran niya ang relihioso nga mga kaaway sing tatlo ka ilustrasyon nga nagbuyagyag sang ila kalautan, naakig ang mga Fariseo kag naghimbon sa pagsiod sa iya nga pahambalon sia sing butang agod madakop niya sila. Naghimo sila sing plano kag ginpakadto nila ang ila mga disipulo, upod ang mga sumulunod ni Herodes, agod siuron sia.

“Manunudlo,” siling sining mga tawo, “nahibaluan namon nga ikaw maminatud-on kag nagatudlo ka sang dalanon sang Dios sang kamatuoran, kag wala nagapasulabi sa bisan kay sin-o, kay wala ka nagatamod sa pagkahimtang sang mga tawo. Busa sugiri kami, ano bala sa hunahuna mo? Tugot bala ang pagbayad sing buhis kay Cesar ukon indi?”

Wala madaya si Jesus sang ila pang-into. Narealisar niya nga kon sia magsiling, ‘Indi, indi batok sa kasuguan ukon husto ang pagbayad sining buhis,’ makasala sia sing sedisyon batok sa Roma. Apang, kon sia magsiling, ‘Huo, dapat kamo magbayad sining buhis,’ ang mga Judiyo, nga nagatamay sang ila pagpasakop sa Roma, magadumot sa iya. Gani sia nagsabat: “Ngaa bala ginatilawan ninyo ako, kamo nga mga salimpapaw? Ipakita sa akon ang kuwarta sa buhis.”

Sang gindalhan sia nila sing isa, sia namangkot: “Kay sin-o ini laragway kag sinulat?”

“Kay Cesar,” sabat nila.

“Busa ihatag kay Cesar ang mga butang nga iya ni Cesar, apang sa Dios ang mga butang nga iya sang Dios.” Ti, sang mabatian sining mga tawo ang maayo gid nga sabat ni Jesus, nagdayaw sila. Kag naglakat sila kag ginpabay-an sia.

Sang makita sang mga Saduceo nga nagasiling nga wala sing pagkabanhaw, nga napaslawan ang mga Fariseo sa pagsiod kay Jesus, nagpalapit sila sa iya kag namangkot: “Manunudlo, si Moises nagsiling, ‘Kon ang isa ka lalaki mapatay, nga wala sing mga anak, ang iya utod dapat magpangasawa sang iya balo kag magpamata sia para sa iya utod nga napatay.’ Karon may pito ka mag-ulutod nga lalaki sa amon; ang kamagulangan nagpangasawa, kag napatay, kag ginbilin niya nga wala sing mga anak ang iya asawa sa iya utod. Amo man ang natabo sa ikaduha nga utod, kag sa ikatlo, tubtob sa ikapito. Sa katapusan ang babayi napatay man. Busa sa pagkabanhaw kay sin-o sia asawa? Kay tanan sila nagpangasawa sa iya.”

Si Jesus nagsabat sa ila: “Nagsala gid kamo, kay wala kamo makasayasat sang mga Kasulatan ukon sang gahom sang Dios? Kag sa pagkabanhaw, ang mga lalaki kag mga babayi indi na mag-alasawahay, kundi mangin kaangay sila sang mga anghel sa langit. Apang nahanungod sa pagkabanhaw sang mga minatay, wala bala ninyo mabasahi sa tulun-an ni Moises, sa kasaysayan nahanungod sa nagadabdab nga sapinit, sang ang Dios nagsiling sa iya, ‘Ako ang Dios ni Abraham, kag ang Dios ni Isaac, kag ang Dios ni Jacob’? Sia Dios, indi sang mga patay, kundi sang mga buhi. Nagsala gid kamo.”

Sa liwat nagdayaw ang kadam-an sa sabat ni Jesus. Bisan ang iban sa mga escriba nagbaton: “Manunudlo, maayo ka maghambal.”

Sang makita sang mga Fariseo nga napahipos ni Jesus ang mga Saduceo, nagpalapit sila sa iya nga isa ka grupo. Sa pagtilaw sa iya sing dugang pa, ang isa ka escriba sa tunga nila namangkot: “Manunudlo, ano ang labing daku nga sugo sa Kasuguan?”

Si Jesus nagsabat: “Ang nahauna amo, ‘Pamatii, O Israel, si Jehova nga aton Dios isa lamang ka Jehova, kag dapat mo higugmaon si Jehova nga imo Dios sa bug-os mo nga tagipusuon kag sa bug-os mo nga kalag kag sa bug-os mo nga hunahuna kag sa bug-os mo nga kusog.’ Ang ikaduha amo, ‘Dapat mo higugmaon ang imo isigkatawo subong sang imo kaugalingon.’ Wala na sing iban nga sugo nga daku pa sa sini.” Sa kamatuoran, nagdugang pa si Jesus: “Sa sining duha ka sugo natingob ang bug-os nga Kasuguan, kag ang mga Manalagna.”

“Manunudlo, ang imo ginsiling nahisanto gid sa kamatuoran,” ugyon sang isa ka escriba. “ ‘Sia Isa lamang, kag wala na sing iban luwas sa Iya’; kag ang paghigugma sa iya upod sa bug-os tagipusuon sang isa kag upod sa bug-os nga paghangop sang isa kag upod sa bug-os nga kusog sang isa kag ang paghigugma sa isigkatawo subong sang kaugalingon labi pa sa tanan nga halad nga sinunog kag mga halad.”

Sang mahantop ni Jesus nga maalam sa pagsabat ang escriba, ginsilingan niya sia: “Indi ka malayo sa ginharian sang Dios.”

Sa sulod sang tatlo ka adlaw na karon​—⁠Domingo, Lunes, kag Martes​—⁠si Jesus nagpanudlo sa templo. Nalipay sa pagpamati sa iya ang mga tawo, apang luyag sia patyon sang relihioso nga mga lider, kag tubtob sini nga tion napaslawan sila sa ila plano. Mateo 22:​15-40; Marcos 12:​13-34; Lucas 20:​20-40.

▪ Ano ang ginplano sang mga Fariseo agod siuron si Jesus, kag ano ang mangin resulta kon magsabat sia sing huo ukon indi?

▪ Paano ginpaslaw ni Jesus ang panikasog sang mga Saduceo nga siuron sia?

▪ Ano pa ang ginhimo sang mga Fariseo agod tilawan si Jesus, kag ano ang resulta?

▪ Sa tion sang iya katapusan nga ministeryo sa Jerusalem, pila ka adlaw nagpanudlo si Jesus sa templo, kag ano ang epekto?