Kapitulo 70

Pag-ayo sa Tawo nga Bulag Kutob sa Pagkatawo

SANG magtinguha ang mga Judiyo nga batuhon si ­Jesus, wala sia maghalin sa Jerusalem. Sang ulihi, sang Adlaw nga Inugpahuway, sia kag ang iya mga disipulo nagalakat sa siudad sang makita nila ang isa ka tawo nga bulag kutob sa pagkatawo. Namangkot ang mga disipulo kay Jesus: “Rabbi, sin-o bala ang nakasala, ining tawo ukon ang iya mga ginikanan, nga natawo sia nga bulag?”

Ayhan nagpati ang mga disipulo, subong man sang pila ka rabbi, nga ang tawo makasasala na samtang yara pa sa sulod sang tiyan sang iya iloy. Apang nagsabat si Jesus: “Ini nga tawo wala makasala ukon ang iya mga ginikanan, kundi agod nga ang mga buhat sang Dios mapahayag sa iya.” Ang pagkabulag sang tawo indi resulta sang isa ka espisipiko nga sayop ukon sala sang tawo ukon sang iya mga ginikanan. Ang sala sang nahauna nga tawo nga si Adan nagresulta sa pagkadihimpit sang tanan nga tawo, kag sa amo posible nga maapektohan sang mga depekto subong sang matawo nga bulag. Ining depekto sa lalaki nagahatag karon sing kahigayunan para kay Jesus nga ipahayag ang mga buhat sang Dios.

Ginpadaku ni Jesus ang pagkahilingagawon sa paghimo sining mga buhat. “Kinahanglan kita magpangabudlay sa mga buluhaton sang nagpadala sa akon sa adlaw pa,” siling niya. “Nagaabot ang gab-i nga walay tawo nga makapangabudlay. Tubtob yari ako sa kalibutan, ako ang kapawa sang kalibutan.” Sa indi madugay ang kamatayon ni Jesus magatugdang sa iya sa kadudulman sang lulubngan nga sa diin wala na sia sing mahimo nga bisan ano. Samtang wala pa ina, sia ang tuburan sang kapawa sa kalibutan.

Sa tapos mahambal ining mga butang, nagdupla si Jesus sa duta kag paagi sa iya laway naghimo sia sing lunang. Ginhamlit niya ini sa mga mata sang tawo kag nagsiling: “Kadto, panghugas sa punong sang Siloe.” Nagtuman ang tawo. Kag sang ginhimo niya ini, makakita na sia! Malipayon gid sia sang magbalik sia, kay makakita na sia sa nahauna nga tion sa iya kabuhi!

Ang mga kaingod kag ang iban pa nga nakakilala sa iya natingala. “Indi bala amo ini anay ang tawo nga nagalingkod kag nagapakilimos?” pamangkot nila. “Amo sia,” sabat sang iban. Apang ang iban indi makapati: “Indi, kundi kaanggid lamang niya.” Apang ang tawo nagsiling: “Ako sia.”

“Paano, nian, nagmuklat ang imo mga mata?” luyag mahibaluan sang mga tawo.

“Ang tawo nga ginatawag si Jesus naghimo sing lunang kag ginhamlit sa akon mga mata kag nagsiling sa akon, ‘Kadto ka sa Siloe kag magpanghugas.’ Gani nagkadto ako kag nanghugas kag nakabaton ako sing itololok.”

“Diin yadto nga tawo?” pamangkot nila.

“Wala ako makahibalo,” sabat niya.

Nian gindala karon sang mga tawo ang bulag anay nga tawo sa ila relihioso nga mga lider, ang mga Fariseo. Ginpamangkot man sini nila sia kon paano sia nakabaton sing itololok. “Ginbutangan niya sing lunang ang akon mga mata, kag nanghugas ako, kag nakakita ako,” paathag sang tawo.

Sa pagkamatuod, dapat gid malipay ang mga Fariseo nga gin-ayo ang manugpakilimos! Apang sa baylo, ginpakamalaut nila si Jesus. “Ining tawo indi nagikan sa Dios,” siling nila. Ngaa nagsiling sila sini? “Bangod nga wala sia nagabantay sang Adlaw nga Inugpahuway.” Apang ang iban nga mga Fariseo nagpalibog: “Paano ang isa ka tawo nga makasasala makahimo sing subong sina nga mga tanda?” Gani nagbahinbahin sila.

Busa, ginpamangkot nila ang tawo: “Ano ang masiling mo nahanungod sa iya, sanglit ginpamuklat niya ang imo mga mata?”

“Manalagna sia,” sabat niya.

Wala magpati sa sini ang mga Fariseo. Nakombinse sila nga pat-od gid nga may sekreto nga pagsugtanay sa ulot ni Jesus kag sining tawo nga buangon ang mga tawo. Gani agod malubad ini nga butang, ginpatawag nila ang mga ginikanan sang manugpakilimos agod pamangkuton sila. Juan 8:59; 9:1-18.

▪ Ano ang kabangdanan sang pagkabulag sang tawo kag ano ang indi kabangdanan sini?

▪ Ano ang gab-i nga sa tion sini wala sing tawo nga makapangabudlay?

▪ Sang mag-ayo ang tawo, ano ang reaksion sang mga nakakilala sa iya?

▪ Paano nabahinbahin ang mga Fariseo tuhoy sa pag-ayo sang tawo?